I Kuurinthuus 9
9
Dhuŋun dhina dhuthi Buulus dhina dhiŋir dhadhilapai ŋinena muŋw abrico ŋelenya ŋuŋun gwan dhuŋun dha Kalo
1Nyi gwati gwiro gwina gwukejinu na? Nyi gwati gwiro ẖurr na? Nyi gwati gwaŋudhi Yasuuⓐuŋw gwina gwiro Kweleny gwega na? Nyaŋa lati liro ŋiro ŋiny gi Kweleny na? 2Ada nyi gwati gwimaro gwina gwukejinu gi liji liter no, titiganu nyi gwukejinu dagalo; gwiro ŋinena nyaŋa liro khithm ga ukejini gwiny gi Kweleny. 3Ibidha dhiro udhini galo gwiny gi liji lina lathinyidheje. 4Alŋa lati luthi ŋelenya deny a diye na? 5Alŋa lati luthi ŋelenya dodhani kwaio, gwina gwiro mega, gwiro ŋinena athina lina lukejinu liter odhani, a limega la Kweleny, a S̱afa na? 6I nyi a Barnaaba anaŋa dogo lati luthi ŋelenya dapai ŋiro ŋadhije no? 7Ei gwiro ejigur ina yathapai ŋiro a ŋwudhedha gwidom gwuŋun maahiiya? Ei gwiro gwina gwariye dugura, athuŋwbithi fruuta gwuŋun no? I ei gwiro gwina gwathie dhola, athuŋwbiyo ŋan ŋa dhola na? 8Nyaŋa larnu nyi gwabiŋu dhuŋuna ibidha gwiro ŋinena kwiji a? Abi naamuus gwati gwabiŋu dhuŋuna ibidha ko na? 9Dhulinu gi naamuus gwa Muusa, Athaŋa gitijo ŋidhra ŋina ŋathure ŋwona limimi gi linyu no. Kalo gathi gitijani nyidhra je, 10i gabiŋadhedhi dogo dega? Dhuludhinu dega; minoŋ gwina gwathikwure aram gwakwure gwadhunejo ŋida ŋuŋun; a gwina gwipidhi ŋwona gwadhuna dapai luro luŋun. 11Ada anaŋa limajikwurijo ŋida ŋa Dhigirim, dhuŋun dhipa dana uni ŋida ŋa aŋinu a? 12Ada liter limuthi luro dapai ŋelenya ibiŋa dagalo, anaŋa lati liŋiranu duthi ŋelenya dagalo na? Abi anaŋa lati lapo ŋelenya ibiŋa no; abi anaŋa lathimutha dugore gi ŋidi peth, dathathana dekajo Dhuŋuna dhina Dhiŋir dha al Masiiẖ no. 13Nyaŋa lati liliŋidhi darnu liji lina lathapai ŋiro gi ŋidi ŋina ŋijuro latheny gi ŋidi ŋa hekal na? A lina lathi dhuna kalo gadhidhuge lati lathaicaijiye kalo gai gadhi dhuge na? 14Minoŋ ko amr gwa Kweleny gwarnu lina lathabiŋaijo lijo Dhuŋuna dhina Dhiŋir lamidhe gi Dhuŋun dhina Dhiŋir. 15Abi nyi gwati gwimapai ŋida ŋiro minoŋ no; a nyi gwati gwulo dinyapai ŋida ibiŋa no; gwiŋiranu dinyai, di kwiji gweta ruje aruŋw ŋamilai gwiny tur. 16Abi ada nyi gwimabiŋaijo lijo Dhuŋuna dhina Dhiŋir, nyi gwati gwuthi aruŋw ŋamilai no; aram nyi gwapai ŋiro ibiŋa, abi dhuŋun dhabir diginy ada nyi gwati gwimabiŋaijo lijo Dhuŋuna dhina Dhiŋir no. 17Ada nyi gwimapai ŋiro ibiŋa bupe gwai gwiny, nyi gwuthi ujra; abi ada ŋiminyilapai athinyilbibupo no, nyi gwoma gwuminyinu dapai ŋiro ibiŋa. 18Aŋ gwiro ujra iny? Ada nyi gwimabiŋaijo lijo Dhuŋuna dhina Dhiŋir nyiruje Dhuŋun dhina Dhiŋir athuŋw uthi maahiiya no, dathiny apai ŋelenya ŋiny peth gi Dhuŋun dhina Dhiŋir no.
Gwathapai ŋiro momaŋ duŋwodha lijo di al Masiiẖ
19Kwereny nyi gwiro ẖurr gi liji peth, a nyi gwimaruje gwidom gwiny gine gi liji peth, dinyi teye lijo galo loinyadhanu. 20Nyi rujo Yahuud ŋinena nyi gwiro Yahuudi, dinyi teye Yahuud galo; a lina lo gi naamuus ganu nyil rujo ŋinena nyi gwo gi naamuus ganu, dinyil teye galo lina lo gi naamuus ganu. 21A gi lina lati luthi naamuus no, nyi gwiro ŋinena gwati gwuthi naamuus no, (abi nyi gwuthi naamuus di Kalo, abi gi naamuus ganu di al Masiiẖ,) dinyil teye galo lina lati luthi naamuus no. 22Liminyilrujo lina limulo nono gwiro ŋinena nyi gwimulo nono, dinyil teye galo lina limulo nono; liminyilrujo ŋidi peth, diny gilaŋiye coŋ dai dai peth. 23A ibidha dhathinyapai gi Dhuŋun dhina Dhiŋir, dinyina aicaijiye.
Dhuŋun dhadhapai ŋiro momaŋ dhathapa mukaafa
24Nyaŋa lati liliŋidhi darnu lina lathiginadhe gi kalo ga ginadhe peth lathortai, abi gwetipo gwathapai mukaafa na? Minoŋ ortul, danya apai. 25A gweta gweta gwina gwathije momaŋ di ginadhe gwathimutha aŋina yuŋun gi ŋidi peth. Abi liji ibile lathapai dhuŋuna ibidhe dilapai taaj dhina dhatherna; abi anaŋa dhina dhati dhatherna no. 26Minoŋ nyi gwathorta gwiro ŋinena nyi gwaji gwapai mukaafa; a minoŋ nyi gwathimiri gwiro ŋinena gwati gwamiri karuna no. 27Abi nyi gwathipi aŋina iny ŋurmin nyiruje gine; a maji miny abiŋaijo lijo liter dhuŋuna dha Kalo, dathathiny nyi gwirnini no.
Currently Selected:
I Kuurinthuus 9: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
