I Kuurinthuus 10
10
Dhuŋun dhina dhuthi olaŋw gi odaije gwa liji la Israayiil
1Abi nyi, limega lai, gwati gwibupo danya dhimetha darnu baboŋa lega peth lijo kiburu ganu, a peth litui ŋau ganu no; 2a peth liⓐamidhinu di Muusa kiburu ganu, a gi ŋau ganu; 3a peth lithi ŋida ŋa dheny ŋetipo ŋiro dhigirim; 4a peth liyo ŋau ŋetipo ŋiro dhigirim; abi liyo gi kol gina giro dhigirim gina gigwudhilai; a kol giro al Masiiẖ. 5Abi loinyadhanu degen Kalo gati giŋir dhugore degen no; ŋinena malguthini gi leba. 6A ŋidi ibiŋa ŋimaje dilro aŋijo dega, dathiji ŋidi ŋina ŋike amradhi, gwiro ŋinena amradhina lijo ibile no. 7Athanya rui lina lathidijo ŋwoboŋ ŋwurko ŋwai no; gwiro ŋinena rona liji coŋ degen; gwiro ŋinena ulinuŋwna, Liji lijalo deny a diye, albaji aldire dilapai gwidera. 8Athil dhreyo laio, gwiro ŋinena dhrena liji coŋ degen laio, a lide gi lamun letipo talaata a ⓐashariin alf no. 9Athathil idhejo Kwelenya, gwiro ŋinena idhejina liji coŋ degen, albi juma rinya no. 10Athathanya ruiyo diman galo, gwiro ŋinena ruiyina coŋ galo degen, alrinyini malaak gwai gwadhi rinya gwina gwathirinya no. 11Abi ŋidi peth ibiŋa ŋuthi je ganu degen dilro aŋijo gi je ganu ja liji liter; alulini dijil ola, alŋa la ŋwamun ŋwa jidhila jina jamra ŋwina ŋwimobana. 12A minoŋ abricul gwina gwatharnu gwidhunadhi gwibur galo ŋwudimini galo momaŋ dathuŋw ido no. 13Idheje gwati gwijo dagalo no ŋwubiro gwina gwathi ŋoma gwan kwiji mutha dhugore; abi Kalo giŋir gina gati gajabrico nya lidhejini dhuŋun dhai dhina dhibuthanu ŋoma ŋalo no; abi idheje gwai gageta dhai dha dhabre ko, danya uthi ŋoma nya mutha dugore.
Aram alŋa ladoinya dhuŋuna dhadhidijo ŋwoboŋ ŋwurko ŋwai
14A minoŋ, limaguri lai lina luminyilo, abirul gi dhuŋun dha dhidijo ŋwoboŋ ŋwurko ŋwai. 15Nyi gwabiŋi gwiro ŋinena nyabiŋaijo lijo lina libebra; akimiyul nyaŋa dhuŋuna dhina dhinyabiŋi. 16Finjaan gwa baraka gwina gwathil barikiye gwati gwiro aicaijiye gwa ŋin ŋa al Masiiẖ na? A ⓐesh ina athil urta ganu, yati iro aicaijiye gwa aŋinu ya al Masiiẖ na? 17Ŋinena alŋa lina loinyadho liro ⓐesh yetipo a aŋinu yetipo; abi alŋa peth lathapai gweta gweta gi ⓐesh yetipo. 18Aŋadhul Israayiiluŋw gi dhuŋun dha aŋinu; ŋediŋa lina latheny ŋida ŋa jarimani lati luthi aicaijiyuŋw gi loboŋ ladhi jarimani na? 19Nyi gwarakwai? Darnu kwoŋ gwadhi jarimani gwuthi je ganu, i loboŋ luthi je ganu a? 20Abi nyi gwarnu ŋidi ŋina ŋathil Liumam dhuge, ŋathil dhugijo nyurinya, athilbi dhugijo Kaloŋa no; abi nyi gwati gwibupaje danya aicaijiye nyuriny nyai no. 21Nyaŋa lati luthi ŋoma leye finjaan gwa Kweleny, a finjaan gwa nyuriny no; nyaŋa lati luthi ŋoma dapai gi tharabeza dha Kweleny, a gi tharabeza dha nyuriny no. 22Alŋa lakiye Kaloŋa dhugore a? Alŋa liburanu nono dugun a?
23Ŋidi peth ŋuthi ŋoma ŋupini, abi peth ŋati ŋiŋir dapai no. Ŋidi peth ŋuthi ŋoma ŋupini, abi ŋidi peth ŋati ŋathaice no. 24Abricul gweta gweta athuŋw bupo ŋida ŋina ŋiŋir ŋan gwidom gwuŋun no, ŋwulbi bupe ŋan kwiji gwina gwathil jaijiye galo. 25Peth ŋina ŋathilini jazur ithilo, athanya ŋi utho galo dhuŋun dhai dha dhugor no; 26ŋinena ro kwiyaŋ a ŋidi peth ŋina ŋijina ganu ŋa Kweleny. 27Ada gweta gwina gwati gwuminyu no gwimaji urnaijo gimure, a nyaŋa limuminyi dela, ithul ŋida ŋina ŋajil dhedha, athanya utho galo no dhuŋun dhai dha dhugor. 28Abi ada gweta gwimajaici, Kwoŋ ibigwa gwidhuginijo loboŋ, athanya ithi no, dhuŋun dhai dha kwiji gwina gwimaji aŋajo, a dhugor. 29Nyi gware dhugor, abi dhugor dhuŋa dhati dhiro no, ŋwubiro dha kwiji gwiter. A minoŋ kworaŋ abi ẖurriiya gwiny akimini dhugor dhai dha kwiji gwiter? 30Ada nyi gwimapai shukr gwai, kworaŋ nyibi uŋnini gwan ŋidi ŋina ŋarinyina shukran? 31Ada nyaŋa limeny, i limeye, i limapai dhuŋuna dhiter, apul peth dhanya majidhe Kaloŋa. 32Athanya apo dhuŋuna dhina dhadhi dekajo Yahuud, i Yuunaaniyiin, i kaniisa ga Kalo no. 33Gwiro ŋinena nyi ko gwathiŋiriye lijo peth dugore gi dhuŋun peth, athathiny bupo ŋida ŋina ŋiŋir ŋan gwidom gwiny no, abi ŋan loinyadho dilgilaŋini.
Currently Selected:
I Kuurinthuus 10: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
