I Kuurinthuus 8
8
Dhuŋun dhadhi ireye je galo gi dhuŋun dha ŋidi ŋina ŋathillidhugijo ŋwoboŋ
1Abi gi ŋidi ŋina ŋimal lidhugijo ŋwoboŋ, alŋa liliŋidhi peth darnu alŋa luthi liŋuŋw. Liŋa gwathalije alaŋ, abi uminyi gwathaice. 2Ada gweta gwimarnu gwiliŋidhi kwoiny gweta, a ŋeda gwati gwiliŋidhi kwoiny gwetipo gwiro ŋinena adhuŋwun liŋa no. 3Abi ada gweta gwimuminyi Kaloŋa, dhuŋun ibidha dhiliŋidhinu dugun. 4Minoŋ gi dhuŋun dha ŋidi ŋa dheny ŋina ŋimal lidhugijo ŋwoboŋ, alŋa liliŋidhi darnu loboŋ lati liro kwoŋ gwetipo kidhila no, a Kalo gati giter no, abi Kalo giro getipo. 5Abi ada kalo gimaje giter gi Sama i kwiyaŋ, (gwiro ŋinena jina kalo goinyadho a leleny loinyadho,) 6abi dega Kalo giro getipo, gina giro Babo, gina guthi ŋida peth, a alŋa liro luŋun; a Kweleny gwetipo gwan Yasuuⓐ al Masiiẖ, gwina gwijo gwai ŋidi peth, a ŋeda gwai alŋa lathije.
Dhuŋun dhadhi gathaje mega uwa gwina gwuthi dhugore dhina dhimulo nono gi dhuŋun dha Kalo
7Abi liŋa gwati gwo gi liji peth no; abi coŋ dugor dai degen loma latheny ŋida ŋiro ŋinena ŋidhugijillo ŋwoboŋ; a dugor degen dina dimamule nono diro ŋirle. 8Abi ŋidi ŋa dheny ŋati ŋiji apai gi je ganu ja Kalo no; ada alŋa lati limeny no, alŋa lati lamarathe no; i ada alŋa limeny, alŋa lati lagedhadhe no. 9Abi ethadhinul galo dathathi ŋoma ŋalo ŋadhapai dhuŋuna ibidha rui idheje di liji lina limulo nono no. 10Ada gweta gwimaŋa aŋa gwina gwuthi liŋuŋw gwijalo deny di ŋwoboŋ, ada ŋeda gwimamule nono dhugor dhuŋun dhati dhaicini deny ŋida ŋina ŋidhugijillo ŋwoboŋ na? 11Gi dhuŋun dha liŋa gwuŋa mega gwina gwimulo nono gwai, gwina gwima al Masiiẖ eijo na? 12A minoŋ ada nyaŋa limupijo limega ŋida ŋike a nya gitijo dugore degen dina dimulo nono nyuri, nyaŋa lathapai ŋida ŋina ŋike di al Masiiẖ. 13Minoŋ, ada ŋidi ŋa dheny ŋimathidheje maguri, nyi gwati gweny ji manaŋ gatur no, dathathiny idhejo maguri no.
Currently Selected:
I Kuurinthuus 8: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
