I Kuurinthuus 15
15
Dhuŋun dhan dire dai
1Nyi gwajiliŋidhiye, limega lai, Dhuŋun dhai dhina Dhiŋir dhina dhabiŋaijaje dhina dhimanya uminyi dimutha, a dhimanya dhimuthini galo ko. 2A dhadhi gilaŋiye nya dhai ko, ada nyaŋa limamutha dhuŋuna dhina dhabiŋaijaje didiny, abi udubidi ada nyaŋa limuminyi tur. 3Kwerkwereny nyi gwimajidhedha dhuŋuna dhina dhimanya uminyi dimutha, darnu al Masiiẖ gwimai gwan ŋidi ŋega ŋina ŋike, gwiro ŋinena arna jitham ja Kalo; 4a darnu gwigwurcinu, a gwimadirni gi lamun la thirilŋa, gwiro ŋinena arna jitham ja Kalo. 5A gwaŋinijo S̱afaŋw, ŋwubaji ŋwulaŋinijo lina liro die‐a‐ram. 6Ŋwubaji ŋwaŋinijo limega loinyadhanu di khamsa miiya lamun letipo. A loinyadho degen loma limidho di ŋinena, abi coŋ lo lidhro. 7Ŋwubaji ŋwaŋinijo Yaⓐguubuŋw; a peth lina lukejinu. 8A gidon peth nyaŋinijo ko, gwiro ŋinena di gweta gwina gwirdejinu galo. 9Abi nyi gwiro gwina gwitinyunu degen peth lina lukejinu, a nyi gwati gwaudhi duthi jiriny jan gwina gwukejinu no, ŋinena irininy kaniisa ga Kalo. 10Abi niⓐma gwai gwa Kalo nyi gwimaro gwiro ŋinena rinyna; abi niⓐma gwuŋun gwina gwidhedhiny gwati gwidhedhininy duŋwjalo tur no; abi nyi gwapanu ŋiro degen peth; abi nyi gwati gwiro no, abi niⓐma gwa Kalo gwina gwijana gwai. 11Ada nyi gwimaro i ibile, minoŋ anaŋa lathabiŋaijo lijo dhuŋuna dha Kalo, a minoŋ nyaŋa limuminyi.
12Abi ada alŋa limathabiŋaijo lijo darnu al Masiiẖ gwimadire gi liji ganu lina laio, abi akwai athibi coŋ dagalo arnu dire gwati gi liji ganu lina laio no? 13Ada dire gwati gwimaje gi liji lina laio no, al Masiiẖ gwati gwimadirini no. 14Abi ada al Masiiẖ gwati gwimadirini no, minoŋ abiŋaije lijo dhuŋuna dha Kalo gwega gwiro tur, a imaan gwalo ko gwiro tur. 15Alŋa ko labujini liro shuhuud lina liro lidhuŋun gi dhuŋun dha Kalo; ŋinena arlo gi shahaada gwega Kalo gimadireye al Masiiẖuŋw; athuŋwbi direye no, ada minoŋ lina laio lati limadirini no. 16Abi ada lina laio lati limadirini no, al Masiiẖ gwati gwimadirini ko no. 17A ada al Masiiẖ gwati gwimadirini no, imaan gwalo gwiro tur; a nyaŋa loma gi ŋidi ŋalo ŋina ŋike. 18Ye, a peth lina lo lidhro gi Masiiẖ limageradhe galo. 19Ada alŋa gi midhe ibigwa dogo limageta dhunijuŋw gwega di al Masiiẖ, alŋa liro lina larani ŋina gi liji peth.
20Abi ŋinena al Masiiẖ gwimadirini gi liji ganu lina laio, a ŋwuro lira la dire dai la liji lina lo lidhro. 21Abi gwiro ŋinena idhina ai kwiji gwai, a ko dire dai ila kwiji gwai. 22Abi gwiro ŋinena gi Adam liji peth lai, a minoŋ ko gi al Masiiẖ liji peth lamidhini. 23Abi gweta gweta gi ruṯba gwuŋun; al Masiiẖ gwiro lira la dire dai, a gidon lina liro luŋun gi lamun lina laji luŋwul ila. 24A gidon mira ila, maji muŋw dhedha Kaloŋa a Babo ŋelenya, a muŋwirini ŋelenya peth ŋa leleny, a ŋeleny peth, a ŋoma peth. 25Abi aram ŋeda gwuthi ŋelenya di muŋwgeta dhuwanu ŋwora ganu ŋwuŋun. 26A dhuwan dhina dhimradhi dherna dhina dhan ai. 27Abi Kalo gimageta ŋida peth ŋwora ganu ŋwuŋun; abi dina athuŋw arnu ŋidi peth ŋimagitini ŋwora ganu ŋwuŋun, dhaŋinu darnu gwina gwimageta ŋida peth ŋwora ganu ŋwuŋun gwati gwadhuredhini degen ganu no. 28A maji ma ŋidi peth gitini ŋwora ganu ŋwuŋun, a Ŋari ko ŋaji ŋagitini ŋwora ganu ŋwuŋun ŋina ŋigeto ŋida peth ŋwora ganu ŋwuŋun, di Kalo ro ŋidi peth gi liji peth.
29Abi liji larakwai lina limaⓐamidhini gwan liji lina laio? Ada lina laio lati limalirini gatur no, abi kworaŋ albi ⓐamidhini gwan ŋediŋa? 30Kworaŋ albi geta lidom lega saaⓐa peth gi dhai dhina dhathijirinya? 31Nyi gwaraji gwai ŋamilai ŋina ŋuthinyilo di Yasuuⓐ al Masiiẖ gwina gwiro Kweleny gwega, nyi gwathai ŋwamun peth. 32Ada nyi gwimaro ŋinena liji anaŋa limapai ŋoŋora owaŋ yai gi Afasus, abi teye galo gwiny gwiro dhaŋ? ada lina laio lati limadirini no. Abricije aleny, aliye; abi bigunu alai. 33Athanya ukinejinu ganu no; aicaijiye gwina gwike gwathikiye ŋadigirenya ŋina ŋiŋir. 34Birthul gwan dhuŋun dhina dhiŋir; athanya apo ŋida ŋina ŋike no; ŋinena athi coŋ liŋidhi Kaloŋa no. Nyi gwabiŋi dhuŋuna ibidha daji apie dhara.
35Abi gweta gwaji gwarnu lina laio laji ladirini akwai? A lila aŋinu yai iro dhaŋ? 36Girila gai, gwina gwathaŋa kwoi gwati gwamidhe ada gwati gwimai no. 37A gwina gwathaŋa kwoi ŋa gwati gwathi kwoi aŋina ina yaji yaro no, abi lon cucun, udubidi duŋwuro la ŋwon, i la ŋwulaŋ ŋwiter. 38Abi ŋathil Kalo dhedha aŋina gwiro ŋinena bupuŋwna, a lulaŋ leta leta lathuŋwdhedha aŋina yuŋun. 39Aŋinu peth yati iro aŋinu yetipo no; abi liji luthi aŋina yetipo, a dhola dhuthi aŋina yiter, a lum luthi aŋina yiter, a nyira nyuthi aŋina yiter. 40A aŋinu ya kabo yo, a aŋinu ya kwiyaŋ yo; abi majdh gwa aŋinu ya kabo gwiro gwetipo, a majdh gwa aŋinu ya kwiyaŋ gwiter. 41Majdh gwa aŋin gwiro gwetipo, a majdh gwa gwuwa gwiter, a majdh gwa ŋwudum gwiter; a ŋinena athi ludum leta dani ter gi ludum liter gi majdh. 42Dhiro minoŋ ko gi dire gwa lina laio. Gwathi kwuini gi digire; ŋwubidirini gwati gwidigiro no. 43Gwati gwathi kwuini gi neje no; ŋwubidirini gi majdh. Gwathi kwuini gi mule nono; ŋwubidirini gi ŋoma. 44Gwathi kwuini gi aŋinu ya ji a ŋin; ŋwubidirini gi aŋinu ina iro dhigirim. Gwiro ŋinena jina aŋinu ya ji a ŋin, a ko aŋinu yo ina iro dhigirim. 45A minoŋ ko dhulinu, Kwoma gwina gwiro kwerkwereny Adam gwimaro aŋinu ina yuthi midhuŋw; a Adam gwa gidon gwimaro dhigirim dhina dhathimidhiye. 46Minoŋ aŋinu ina iro dhigirim yati yathila kwerkwereny no, ŋwubiro ina iro ji a ŋin; abi gidon ina iro dhigirim. 47Kwoma gwa kwerkwereny gwiro fura gwa kwiyaŋ; a kwoma gwa gidon gwiro Kweleny gwina gwidhi gi Sama. 48Lina ligitinu fura gwai, liro ŋinena ŋeda gwina gwigitinu kwerkwereny fura gwai; a lina liro la Sama liro ŋinena ŋeda gwina gwidhi gi Sama. 49Gwiro ŋinena malgena s̱uura gwa gwina gwigitinu fura gwai, abricije algena ko s̱uura gwa ŋeda gwina gwidhi gi Sama. 50Nyi gwajaici minoŋ, limega lai, ji a ŋin lati luthi ŋelenya kidhila ga Kalo no; a digire gwati gwuthi ŋelenya gi ŋina ŋati ŋathi digire no.
51Aŋadhul, nyi gwajabiŋaijo dhuŋuna dhina dhigilibicinu. Alŋa lati ladhre peth no, abi alŋa peth laji lupeyini ganu. 52Gi lamun litinyunu, gi daice je kibur, gi lamun la ŋwal ŋwa ŋiridhe ŋina ŋiro gidon; abi ŋiridhe ŋaji ŋare, a lina laio ladirini lati luthi digiruŋw no, a alŋa laji lupeyini ganu. 53A minoŋ aŋinu ina idigiro aram yagena ina yati idigiro no, a ina yaio aram yagena ina yati yai no. 54Abi maji ma ina idigiro gena ina yati idigiro no, a ina yaio gena ina yati yai no, a minoŋ dhina dhulinu dhaji dhuthi je ganu, Ai gwima dhiŋadhini gi dhinyi. 55Ai gwai, dhugi dhuŋa dhada? Dhel dhai, dhinyi gwuŋa gwada? 56Abi dhugi dha dhai dhiro ŋidi ŋina ŋike; a ŋoma ŋa ŋidi ŋina ŋike ŋiro naamuus. 57Abi shukr di Kalo, gina gidhedhije dhinyuŋw Kweleny gwai gwega gwina gwan Yasuuⓐ al Masiiẖ. 58Minoŋ, limaguri lai lina luminyilo, dhunadhul libur galo, athanya aro galo no, nyapai ŋiro ŋa Kweleny dugor dai, ŋinena liŋidhanya darnu ŋiro ŋina ŋapanyalo di Kweleny ŋati ŋiro tur no.
Currently Selected:
I Kuurinthuus 15: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
