2 Hteˉsaˍlawˉniˆ 3
3
Hpaˍcaoˍ beu ang tangˍ buingˉ yao aeˉ naeˉ uiˉ saˍ laiˍ ang buinˉ paˉ jiˉ
1Yaˍ changˍ mawngˉ namˉ yawng veuˉ, kaˉ nawngˍ kaˍ lin veu ang tangˍ htiˍ htaeˍ yangˍ ningˉ mae ca jiˉ. Ang suingˉ Yeˍsuˆ beu ang tangˍ nawˍ, nawng hkaoˉ veu ang vaiˍ nae buingˉ nga aengˉ yao ang tangˍ hingˍ na hap yuˉ jiˉ lawˉ, htiˍ tawngˍ peunˉ yao htiˍ tawngˍ haeˉ mae hpeuˍ laˉ naeˉ uiˉ saˍ laiˍ gu saˍ laiˍ ang buinˉ paˉ lao. 2Vaˍ punˍ vaˍ leuˍ jiˉ changˉ nae changˉ haiˉ htiˍ baˍ uiˍ beu laˍ puˍ hkaoˍ veu gu ya caeˉ naeˉ uiˉ saˍ laiˍ muiˍ ang buinˉ paˉ lao. Aˉ mae yao nae baoˉ vaˍ changˉ hkaˉ hko laˉ hko yumˉ saˉ naeˉ uiˉ baˍ aˍ.
3Caˇ, Ang suingˉ Yeˍsuˆ nawˍ saˉ caˉ ang ca yaˇ. Yaˇ nawng nuing ba na yiˍ naenˉ laˉ biˍ yao, haiˉ naeˉ mangˉ htiˍ hu na nawng ya haenˉ tap naeˉ uiˉ saˍ laiˍ, yang hak sa laˍ naeˍ yaˇ. 4Gu nawng na ang tangˍ piˍ laˍ jiˍ uiˉ na nawng vaˍ yao ca naeˉ htaˍ veu, kaˉ huˍ veu muiˉ nawng vaˍ naeˍ yaˇ nae, ang suingˉ Yeˍsuˆ pa nae gu ang yumˉ maˉ manˉ yaˇ.
5Nawng beu nuing ba hingˉ ngaˍ, Hpaˍcaoˍ beu hak naeˉ paengˉ naeˉ hingˉ na naˉ ya yao Hkrit hkaoˍ veu nuing ba yiˍ naenˉ naeˉ uiˉ ca naeˉ uiˉ saˍ laiˍ, Ang suingˉ Yeˍsuˆ nawng na suiˍ chuingˉ laˍ yao ca bu.
Kanˉ baˍ vaˍ nae uiˉ changˉ na saˍ tiˍ piˍ jiˍ
6Yaˍ changˍ mawngˉ namˉ yawng veuˉ, gu beu Ang suingˉ Yeˍsuˆ Hkrit beu ang maengˉ hkaoˉ veu gu nawng na ningˉ mae ang tangˍ piˍ laˍ naeˍ yaˇ. Gu kawngˉ nawng ya henˍ yaˍ jiˉ ang liˍ ang kawngˍ ningˍ uiˉ kawngˉ baˍ lae nae htiˍ ceuˍ kanˉ baˍ vaˍ nae yaˍ changˍ mawngˉ namˉ uiˉ hkaˉ hko laˉ hko na ang changˍ baˍ taeng jo. 7Aˉ mae yao nae baoˉ vaˍ, gu vaˍ nae na nawng henˍ yaˍ yao vaˍ kyaˍ yaˇ nae, nawng ang bae yaˇ. Gu nawng kawngˉ ca beu, gu kanˉ baˍ vaˍ nae ang aeˍ nae baˍ ca. 8Aˍ sangˍ beu caˍ keungˍ na baˍ upˍ, ang huˍ baˍ piˍ nae gu caˍ naeˍ uiˉ baˍ aˍ. Nawng htiˍ hu nae muiˉ baˍ ya yapˆ naeˉ uiˉ saˍ laiˍ, gu aˍ muˍ hkiˍ nuing kawngˉ kanˉ coˇ caˇ yao ang vaˍ yaˇ. 9Hao piˉ yaˍ laˍ naeˍ uiˉ ang caˍ na ya ca naeˍ uiˉ saˍ laiˍ aˉ hkvangˍ ang ca nae yao gu ningˉ mae ha naeˉ baˍ aˍ. Nawng gu na henˍ yaˍ laˍ naeˍ uiˉ saˍ laiˍ, nawng saˍ laiˍ gu sai lawng ningˉ mae chiˉ yaeˉ yaˇˍ. 10Gu nawng kawngˉ ca beu, gu nawng na ningˉ mae ang tangˍ piˍ saˍ laˍ byaˇ. Changˉ htiˍ hu hu kanˉ baˍ vaˍ siˍ nae baoˉ vaˍ, caˍ keungˍ baˍ piˍ ca jo nae ciˍ saˍ byaˇ.
11Nawng hkaoˉ veu changˉ htiˍ baˍ baˍ nawˍ ang awnˍ nae yao, hao beu kanˉ na tiˍ suk tiˍ sak biˍ yao, aˍ sangˍ yang beu ang to htiˍ ceuˍ kanˉ baˍ vaˍ naeˍ na gu ya kyaˍ yaeˍ yaˇ. 12Ningˉ mae uiˉ changˉ htiˍ baˍ na Ang suingˉ Yeˍsuˆ Hkrit hkaoˍ veu gu ningˉ mae ang tangˍ piˍ yao paˉ laˍ naeˍ yaˇ. A chuiˉ nae ca naeˉ hkaoˉ veu aˍ sangˍ yang beu kanˉ na vaˍ yao, aˍ sangˍ yang beu caˍ keungˍ na caˍ vo. 13Yaˍ changˍ mawngˉ namˉ yawng veuˉ, maenˍ naeˍ na vaˍ naeˍ hkaoˉ veu kaˍ baˍ piˍ daw jo.
14Ang laiˍ ningˍ keung taemˉ jiˉ ningˉ ang tangˍ ningˍ na changˉ htiˍ hu hu baˍ naˍ yuˉ nae baoˉ vaˍ, yang na cuiˍ yaˍ vo. Yang ya saˍ caw naeˉ uiˉ saˍ laiˍ yang na ang changˍ baˍ taeng jo. 15Caˇ, lanˍ suˍ laˍ mae yang na baˍ sawnˍ jo. Yaˍ changˍ mawngˉ namˉ laˉ mae yang na sawnˉ yao yang na saˍ tiˍ piˍ vo.
Ang buinˉ piˍ jiˍ ang tangˍ
16Kuitˆ mawnˍ kuitˆ pyawˉ biˍ naeˍ Ang suingˉ Yeˍsuˆ maˇ, nawng na hkaˉ hko laˉ hko hkaoˉ veu, aˉ mae beu muiˉ kuitˆ mawnˍ kuitˆ pyawˉ naeˉ uiˉ ca biˍ vo. Ang suingˉ Yeˍsuˆ nawng hkaˉ hko laˉ hko uiˉ kawngˉ ca biˍ vo.
17Ga Pawˉluˆ nawˍ, nawng na kuitˆ puiˉ naeˉ hkaoˉ veu ang tangˍ htiˍ htaeˍ ningˍ ga ang to nawng na taemˉ laˍ naeˍ yaˇ. Ga taemˉ jiˉ ang laiˍ cu pap hkaoˉ veu nawng ya bae naeˉ uiˉ saˍ laiˍ ningˉ mae ca jiˉ. Ga taemˉ jiˉ laˍ muiˉ hingˉ ngaˍ ningˉ mae ca jiˉ nae bae bu. 18Gu beu Ang suingˉ Yeˍsuˆ Hkrit beu ang buinˉ lapˍ sawngˍ nawng hkaˉ hko laˉ hko hkaoˉ veu ca biˍ vo.
Currently Selected:
2 Hteˉsaˍlawˉniˆ 3: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc.
