2 Hteˉsaˍlawˉniˆ 2
2
Naˍ hokˍ yumˉ suingˉ mangˉ taw laˉ naeˉ uiˉ awˍ lawng
1Yaˍ changˍ mawngˉ namˉ yawng veuˉ, gu nawng na ningˉ mae paˉ laˍ naeˍ yaˇ. Gu beu Ang suingˉ Yeˍsuˆ Hkrit mangˍ lui laeˍ beu, yang na myangˉ lang naeˉ uiˉ saˍ laiˍ gu ya hpawm lang naeˉ uiˉ awˍ lawng na nawng baˍ kuitˍ man laeˍ jo. 2Ang suingˉ Yeˍsuˆ beu ang nuing hkeu laˉ jaˇ. Ang hkawˍ laˉ hkaoˉ veu hao ya myangˉ naeˉ na baˍ upˍ, Pawˉluˆ nae yang changˍ uiˍ ang laiˍ taemˉ yao piˍ jiˍ hingˉ uiˉ na baˍ upˍ, nae hao hkai lang naeˉ na baˍ upˍ, ang tangˍ hingˉ uiˉ pa nae, nawng ngaˍ nuing ba aˍ suk sak jo. 3Changˉ htiˍ hu nae muiˉ nawng na tuiˍ kaeˍ baˍ ya kaeˍ kaˍ naeˍ uiˉ saˍ laiˍ, saˍ tiˍ ca bu. Aˉ mae yao nae baoˉ vaˍ, ang nuing hingˉ baˍ hkeu laˉ beu hingˉ huˍ, ang daˍ beu Hpaˍcaoˍ na hpaw saˍ naeˍ uiˉ ceuˉ hpeuˍ laˉ yao, naˍ hokˍ yumˉ suingˉ nae haoˉ naeˉ, luˍ naeˍ kangˍ naeˍ uiˉ ang yaˍ htiˍ hu taw laˉ naeˉ yaˇ. 4Changˉ htiˍ hu hiˉ maˇ, hpaˍcaoˍ nae hao hkaˉ haoˉ naeˉ mangˉ na baˍ upˍ, ang tuˍ mawt naeˉ ang ceuˉ na baˍ upˍ, yawng kaˍ haengˍ nae hpaw saˍ yao, hingˉ uiˉ htiˍ baˍ htaˍ veu muiˉ yang ang to na yang kuitˆ huiˍ laeˍ naeˍ yaˇ. Yaˇ Hpaˍcaoˍ beu ang buinˉ paˉ kyaˉ cawngˉ ang huiˍ hkaoˍ veu duingˉ yao, yang ang to hingˉ hpaˍcaoˍ lawˍ yaˇ nae yang ciˍ naeˍ yaˇ.
5Ga nawng kawngˉ ca beu, awˍ lawng ningˉ uiˉ ga nawng na upˍ kyaˍ laˍ jiˍ na nawng baˍ kuitˍ puiˉ laeˍ laˍ. 6Changˉ tiˍ hu hiˉ maˇ, yang beu ang nyamˍ capˆ ngangˉ lui beu paenˉ paenˉ taw laˉ naˉ. Caˇ, ya muiˉ yang na aˉ mae ya haenˉ tap naeˉ uiˉ awˍ lawng na nawng ang bae yaˇ. 7Aˉ mae yao nae baoˉ vaˍ, naˍ hokˍ na vaˍ naeˍ ningˉ ceuˉ aˍ, ya muiˉ muiˉ ang paˉ veu kanˉ vaˍ yao ca ngaeˉ yaˇ. Caˇ, naˍ hokˍ na vaˍ naeˍ ningˉ ceuˉ na haenˉ tap naeˉ mangˉ baˍ awkˍ nga aengˉ nae baoˉ vaˍ, hingˉ na yang haenˉ tap naeˉ yaˇ. 8Haenˉ tap naeˉ mangˉ htiˍ hu awkˍ taw peunˉ na yao, naˍ hokˍ yumˉ suingˉ mangˉ hiˉ mangˉ paenˉ paenˉ nae taw laˉ naeˉ yaˇ. Ang suingˉ Yeˍsuˆ taw laˉ beu, changˉ hiˉ mangˉ na mi saeˍ yao, yang paenˉ paenˉ nae lui laeˍ beu changˉ hiˉ mangˉ na tiˍ kangˍ naeˍ uiˉ yaˇ. 9Changˉ hiˉ mangˉ laˉ naeˉ hingˉ ngaˍ, Saˍtanˍ vaˍ jiˍ kanˉ laˉ mae laˉ naeˉ uiˉ yaˇ. Tanˉ hkoˉ htiˍ puing ca naeˉ hkaoˉ veu na baˍ upˍ, hao na tuiˍ kaeˍ kaeˍ naeˍ uiˉ naˍ mek laek hkaˍ naˍ nae manˍ kyaˍ uiˍ na vaˍ yao na baˍ upˍ, 10chaw kangˍ yao changˉ hingˉ uiˉ na tuiˍ kaeˍ kaeˍ kaˍ naeˍ uiˉ saˍ laiˍ, baˍ sui baˍ pawng nae uiˉ ku ceuˉ ceuˉ na caiˍ naeˍ hkaoˉ veu na baˍ upˍ, yang lui naeˉ yaˇ. Kangˍ yao chaw yao aeˉ naeˉ uiˉ changˉ htiˍ baˍ nawˍ, htaiˍ awkˍ naeˍ uiˉ na ya naeˉ uiˉ saˍ laiˍ, mawnˍ pyawˉ naeˉ ang buinˉ tangˍ na baˍ hap yuˉ nae pa, kangˍ yao chaw yao aeˉ naeˉ. 11-12Hingˉ pa nae, baˍ aˍ baˍ aˍ nae uiˉ na yawng yumˉ naeˉ saˉ naeˉ uiˉ saˍ laiˍ baˍ aˍ baˍ aˍ nae kuitˆ naeˉ uiˉ htiˍ ceuˍ na Hpaˍcaoˍ yawng kawngˉ piˉ hkeu lui naeˉ yaˇ. Nae yao, maˉ manˉ nae yaˍ keung naeˉ hingˉ na baˍ yumˍ nae, baˍ sui baˍ pawng nae uiˉ kanˉ hkaoˉ veu mawnˍ pyawˉ naeˉ uiˉ changˉ hkaˉ hko laˉ hko na aˉ muˍ tatˆ biˍ naeˍ yaˇ.
Htaiˍ awkˍ naeˍ uiˉ na ya naeˉ uiˉ saˍ laiˍ Hpaˍcaoˍ yawng na cheˉ yuˉ jiˉ
13Ang suingˉ Yeˍsuˆ hak naeˉ yaˍ changˍ mawngˉ namˉ yawng veuˉ, nawng saˍ laiˍ Hpaˍcaoˍ na aˉ lawˍ beun muiˉ ya chiˍ mawng naeˉ yaˇ. Aˉ mae yao nae baoˉ vaˍ, htaiˍ awkˍ naeˍ uiˉ na ya naeˉ uiˉ saˍ laiˍ tawngˍ hpanˍ ngang beu nae Hpaˍcaoˍ nawng na cheˉ yuˉ yao chiˉ laˍ byaˇ. Ang hkawˍ laˉ nawng na piˉ seungˍ piˉ sangˉ nga laˉ laˍ yao, sui naeˉ pawng naeˉ ang tangˍ na nawng yumˉ naeˉ pa yaˇ. 14Hingˉ laˉ mae hpeuˍ laˉ naeˉ uiˉ saˍ laiˍ, gu maˍ naeˍ mawnˍ pyawˉ naeˉ uiˉ ang buinˉ tangˍ na cuˉ yao, Hpaˍcaoˍ nawng na haoˉ yuˉ nga laˍ byaˇ. Yang ningˉ mae ha naeˉ ningˉ ngaˍ, gu Ang suingˉ Yeˍsuˆ Hkrit kawngˉ nawng htuˍ yaˍ laˉ mae mun hpungˉ na nawng ya naeˉ uiˉ saˍ laiˍ vaˍ naeˍ yaˇ. 15Hingˉ pa nae yaˍ changˍ mawngˉ namˉ yawng veuˉ, yiˍ naenˉ nae ca voˍ. Gu nawng na hkaˍ muˍ hkai laˍ naeˍ na baˍ upˍ, ang laiˍ taemˉ laˍ naeˍ naˍ baˍ upˍ, gu maˍ laˍ jiˍ ang liˍ ang kawngˍ ningˍ uiˉ na maenˍ nae chu yao htamˍ yao ca voˍ.
16-17Gu beu A vangˉ Hpaˍcaoˍ nawˍ, gu na hak laˍ yao, yang beu ang buinˉ pa nae tuingˍ co tuingˍ cat kuitˆ pyawˉ naeˉ uiˉ hkaoˉ veu na baˍ upˍ, maenˍ nae kuitˆ yao chiˉ jiˉ uiˉ hkaoˉ veu na baˍ upˍ, gu na piˍ hko laˍ byaˇ. Gu beu Ang suingˉ Yeˍsuˆ Hkrit beu ang to nae gu beu A vangˉ Hpaˍcaoˍ nawˍ, nawng beu nuing ba na kaˍ piˍ laˍ yao, maenˍ naeˍ uiˉ kanˉ nae maenˍ naeˍ uiˉ ang tangˍ ku ceuˉ ceuˉ hkaoˉ veu nawng na piˉ yiˍ piˉ naenˉ laˉ biˍ vo.
Currently Selected:
2 Hteˉsaˍlawˉniˆ 2: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc.
