Yaˍkok 1

Yuˉdaˆ Hkritˆ yanˍ uiˍ na kuitˆ puiˉ naeˉ uiˉ tangˍ

1Gaˇ, Hpaˍcaoˍ nae Ang suingˉ Yeˍsuˆ Hkrit beu yaˍ cenˍ Yaˍkok mangˉ yaˇ. Nawng ku ti ti veu hpakˍ lang yao aeˉ jiˉ changˉ ceuˉ htiˍ cheˍ nyiˍ ceuˍ hingˍ hkaoˉ veu mawnˍ pyawˉ naeˉ uiˉ ca biˍ vo.

Yumˉ naeˉ nae pingˍ nyaˍ awˍ lawng

2Ga beu yaˍ changˍ mawngˉ namˉ yawng veuˉ, hpawngˍ naeˍ laiˉ ceuˍ na ya myangˉ hpuˍ beu mawnˍ yao ca voˍ. 3Aˉ mae yao nae baoˉ vaˍ, nawng yumˉ nae nuing ba hingˉ ngaˍ yakˍ naeˍ kap naeˉ hingˉ na ya myangˉ hpuˍ beu, nawng otˆ taw hkiˍ naeˍ hingˉ kaˍ huiˍ laˉ naeˉ na ang bae yaˇ. 4Nawng htiˍ ceuˍ nae muiˉ baˍ yawmˍ nga aengˉ nae, ku ceuˉ hkaoˉ veu htiˍ puing nae hpeuˍ laˉ naeˉ uiˉ saˍ laiˍ otˆ taw naeˉ uiˉ htiˍ puing ca laˉ beu htiˍ hkeu vaˍ o.

5Nawng hkaoˉ veu htiˍ hu hu pingˍ nyaˍ baˍ puing nae baoˉ vaˍ, Hpaˍcaoˍ kawngˉ paˉ voˍ. Hpaˍcaoˍ nawˍ baˍ iˍ nae changˉ hkaˉ hko laˉ hko na ang aeˍ piˍ laˍ naeˍ lawˉ, pingˍ nyaˍ paˉ naeˉ uiˉ changˉ na muiˉ piˍ naeˍ yaˇ. 6Caˇ, yumˉ naeˉ hkaoˉ veu paˉ voˍ. Nuing ba htawˉ nawtˆ kuitˆ nae aˍ kuitˍ jo. Aˉ mae yao nae baoˉ vaˍ, nuing ba htawˉ nawtˆ kuitˆ naeˉ uiˉ changˉ ngaˍ, chaˍ maeˍ lang ba na hawˉ manˉ taw yao langˉ uin an laˉ naeˉ na tuˉ naeˉ yaˇ. 7Haeˉ mae uiˉ changˉ ngaˍ, Ang suingˉ Hpaˍcaoˍ kawngˉ yaˇ htiˍ ceuˍ ceuˍ ya naeˉ yaˇ nae aˍ kuitˍ jo. 8Yaˇ nuing ba nyiˍ ceuˍ nae uiˉ changˉ hpeuˍ yao hkaˉ vaˍ naeˍ uiˉ hkaˉ hko laˉ hko uiˉ hkaoˉ veu baˍ yiˍ baˍ naenˍ hki nae uiˉ changˉ hpeuˍ naeˍ yaˇ.

9Hao tawngˍ kaˍ veu ca naeˉ yaˍ changˍ mawngˉ namˉ htiˍ hu, mun hpungˉ ang ca ca kyaˉ veu Hpaˍcaoˍ piˉ ca naeˉ pa nae, yaˇ mawnˍ kyaˍ yaˇ. 10Changˉ ang ca ang pang Hkritˆ yanˍ htiˍ hu hu mun hpungˉ baˍ ca nae taeˉ veu Hpaˍcaoˍ piˉ ca naeˉ pa nae, yang muiˉ mawnˍ pyawˉ kyaˇ yaˇ. Aˉ mae yao nae baoˉ vaˍ, changˉ ang ca pang nawˍ, mawˍ kaˍ vae yaˍ laˍ mae ang pyo aengˉ hkiˍ. 11Miˍ nuing taw langˉ yao ang hawngˉ ang daˉ nae beu, mawˍ kaˍ uiˍ haeo kui aengˉ naˇ. Ang vae uiˉ muiˉ lawnˉ yao kla aengˉ naˇ. Hu buiˍ naeˍ uiˉ ang ceuˉ muiˉ pyo aengˉ naˇ. Hingˉ lawˉ yaˇ changˉ ang ca ang pang nawˍ, yang kawngˍ ka yao ca naeˉ hingˉ hkaoˉ veu luˍ kangˍ yao aeˉ naeˉ.

Yakˍ naeˍ kap naeˉ nae camˍ naeˍ uiˉ na ya myangˉ naeˉ awˍ lawng

12Hpawngˍ naeˍ na ya myangˉ beu, otˆ hkiˍ naeˍ maˇ, ang buinˉ huiˍ naeˍ yaˇ. Aˉ mae yao nae baoˉ vaˍ, yakˍ naeˍ kap naeˉ hingˉ na otˆ taw naeˉ nawngˍ veu, htaˍ vaˍ raˆ a sak lapˍ sawngˍ na yang ya naeˉ yaˇ. Htaˍ vaˍ raˆ a sak lapˍ sawngˍ hingˉ ngaˍ Hpaˍcaoˍ na hak naeˉ uiˉ changˉ uiˉ na yang piˍ nae yaˇ nae saˉ caˉ piˍ saˍ jiˍ. 13Naˍ hokˍ hkaoˍ veu camˍ laˍ naeˍ na ya hkamˉ beu, Hpaˍcaoˍ camˍ laˍ naeˍ yaˇ nae htiˍ hu nae muiˉ baˍ ciˍ jo. Aˉ mae yao nae baoˉ vaˍ naˍ hokˍ uiˍ ceuˉ nawˍ Hpaˍcaoˍ na camˍ yao baˍ kaˍ. Naˍ hokˍ kanˉ na vaˍ naeˍ uiˉ saˍ laiˍ Hpaˍcaoˍ htiˍ hu na muiˉ baˍ camˍ. 14Changˉ nawˍ aˍ sangˍ yang seu lai naeˉ nuing ba hingˉ ngaˍ, naˍ hokˍ na vaˍ naeˍ uiˉ saˍ laiˍ yang na hpawngˍ yao ca naeˉ yaˇ. 15Seu lai naeˉ uiˉ nuing ba hingˉ ngaˍ, ang yaˍ hanˉ naeˉ lawˉ yawng hkaoˉ veu hanˉ laˉ yao, naˍ hokˍ na kuitˆ yaˍ taw laˉ biˍ naeˍ yaˇ. Naˍ hokˍ yangˍ muiˉ huiˍ laˉ puing laˉ yao, siˉ naeˉ hingˉ na kuitˆ yaˍ taw laˉ biˍ naeˍ yaˇ.

16Ga hak naeˉ yaˍ changˍ mawngˉ namˉ yawng veuˉ, baˍ kuitˍ si laeˍ jo. 17Maenˍ naeˍ uiˉ ang buinˉ hkaˉ hko laˉ hko nae, puing naeˉ uiˉ lapˍ sawngˍ hkaˉ hko laˉ hko, buingˍ htaˍ veu ca naeˉ ang chit ang pa veu Ang vangˉ mangˉ beu lungˍ luiˍ naeˍ yaˇ. Yaˇ baˍ penˍ hki. Yang beu ang chit hingˉ hkaoˉ veu chaˍ chaˍ pengˉ lengˉ muiˉ baˍ ca. 18Peungˍ cawngˉ saˍ jiˍ ang ceuˉ hingˉ uiˉ hkaoˉ veu gu aˍ kaˉ huˍ veu suiˍ luiˍ jiˍ hingˉ laˉ mae hpeuˍ laˍ yao, yang a loˍ capˆ naeˉ hingˉ hkaoˉ veu, sui naeˉ pawng naeˉ ang buinˉ tangˍ na cuˉ yao Hpaˍcaoˍ beu ang luˍ ang han laˉ mae piˉ hpeuˍ laˉ jiˉ yaˇ.

Ang tangˍ na kyaˍ yao vaˍ naeˍ changˉ awˍ lawng

19Ga hak naeˉ yaˍ changˍ mawngˉ namˉ yawng veuˉ, tawngˍ kaˍ veu awˍ lawng ningˉ na nawng bae kyaˉ yaˇ. Hao hkaˍ muˍ hkai naeˉ na maenˍ nae naˉ voˍ. Hkaˍ muˍ ang vaiˍ nae baˍ tawpˍ laeˍ jo. Nuing ba ang vaiˍ nae aˍ yinˍ jo. 20Aˉ mae yao nae baoˉ vaˍ changˉ nuing ba yinˍ naeˍ ningˉ ngaˍ, Hpaˍcaoˍ beu sui naeˉ pawng naeˉ hingˉ na baˍ piˍ taw laˉ taw. 21Ningˉ pa nae, chaˍ kyaˍ kaeˍ kyaˍ kanˉ nae ang haiˉ kanˉ na vaˍ saˍ jiˍ uiˉ hkaˉ hko laˉ hko na paek taw saˍ bao. Nawng beu ang hkawˍ laˉ na htaiˍ awkˍ taw naeˉ uiˉ, nawng na piˉ bae laˍ yao ca jiˉ ang buinˉ tangˍ na nuing ba dawˍ naeˍ hkaoˉ veu hap yuˉ bao. 22Nawng ngaˍ, ang buinˉ tangˍ na kyaˍ yao vaˍ naeˍ uiˉ changˉ hpeuˍ bu. Kyaˍ naeˍ uiˉ changˉ baˍ hpeuˍ jo. Kyaˍ yao baˍ vaˍ nae uiˉ changˉ ngaˍ, aˍ sangˍ yang beu ang to hingˉ na tiˍ kaeˍ kaeˍ laeˍ naeˍ uiˉ changˉ hpeuˍ naeˍ yaˇ. 23Ciˍ tangˍ hingˍ na kyaˍ yao baˍ vaˍ nae uiˉ changˉ aˉ mangˉ na baˍ upˍ, kaˉ vaengˍ hkaoˍ veu aˍ sangˍ yang beu mae kaˍ na hu naeˉ uiˉ changˉ na tuˉ laˉ naeˉ yaˇ. 24Yang mae kaˍ na hu peunˉ laeˍ yao, yang awkˍ taw aengˉ beu yang beu mae kaˍ hingˍ nga aˉ mae ca jeuˇ nae yang luimˉ yaˍ laeˍ naeˍ yaˇ. 25Caˇ, changˉ na piˉ caeˉ naeˉ uiˉ puing naeˉ uiˉ ang liˍ ang kawngˍ na henˍ yaˍ yao ca naeˉ changˉ hiˉ maˇ, kyaˍ yao luimˉ yaˍ laeˍ naeˍ uiˉ baˍ aˍ. Yang kyaˍ yao vaˍ naeˍ pa nae, yang hkaˉ vaˍ naeˍ kanˉ hingˉ uiˉ htaˍ veu ang buinˉ huiˍ naeˍ yaˇ. 26Changˉ htiˍ hu hu yang ang tu mawt naeˉ ang liˍ hingˍ na maenˍ nae ang cheˉ yaˇ nae kuitˆ yao muiˉ, yang beu maenˍ haˍ hingˍ na baˍ kaˍ yaˍ nae baoˉ vaˍ yang beu nuing ba hingˉ na tiˍ kaeˍ kaeˍ yao ca naeˉ yaˇ. Yang koˉ koiˍ naeˍ hingˉ ngaˍ a coˇ baˍ ca. 27A vangˉ Hpaˍcaoˍ tawngˍ naˍ veu chaˍ naeˍ kaeˍ naeˍ uiˉ baˍ ca nae ang seungˍ sangˉ na koˉ koiˍ naeˍ hingˉ ngaˍ ningˉ mae yaˇ. Mae maiˉ ba yaˍ nae mae maiˉ ba uiˉ ya tuk ya hpan beu, yawng na hu hpa yao, aˍ sangˍ yang beu ang to veu nuingˉ chaˍ htaˍ veu chaˍ naeˍ uiˉ kanˉ#1:27 2Ti 3:2-4; Efs 4:19 baˍ ya yang naeˉ uiˉ saˍ laiˍ ya chawng naeˉ yaˇ.

Currently Selected:

Yaˍkok 1: pyy

Highlight

Copy