PSALMEN Bindu 22
Bindu 22
Ham Naibatangku, Mase Itadingkon Ham Ahu?
1Bani pambobai koor. Inggouni: Balua manlele siang.
Psalm ni si Daud.
2Ham Naibatangku, mase ma itadingkon Ham ahu,
mandaoh Ham humbani elek-elekku pakon humbani sora ni doruh-doruhku? (Mat 27:46; Heb. 5:7)
3Ham Naibatangku, dilo-dilo do ahu arian, tapi seng ibalosi Ham,
borngin pe, tapi seng jumpah ahu hasonangan. (Ps. 69:4)
4Tapi Ham do Na Pansing in,
na marhotak i atas ni sipujion ni Israel. (2 Mus. 15:11; Jes. 63:7)
5Ham do ihatengerhon ompungnami,
tenger do uhur ni sidea Bamu, gabe ipaluah Ham do sidea. (Ps. 78)
6Hu Bamu do sidea dilo-dilo, gabe maluah do sidea;
porsaya do sidea Bamu, jadi seng tarbador sidea; (Ps. 25:3; Panguh. 3:9)
7tapi anggo ahu goya mando, seng be jolma,
siapason ni halak, sidorunon ni halak na mabuei. (Ps. 69:8; Job 25:6; Jes. 41:14; 49:7; 53:3; 50:6)
8Haganup na mangidah ahu pahiri-hiri ahu,
ipambebeoti do ahu anjaha iupir-upirhon uluni, (Ps. 35:21; 109:25; Job 16:4, 10; Mat 27:39-44; Mrk 15:29)
9“Bani Jahowa ma ia marondos, ase ipaluah ia,
anggo na marosuh do tongon Ia bani!” (Ps. 18:20; 41:12)
10Ham do na manogu ahu humbani partapaan,
Ham do patenger uhurhu mangonsop bagod ni inang; (Ps. 71:6)
11humbani partubuhku nari Ham do parondosanku,
humbani partapaan nari Ham do Naibatangku.
12Sai ulang ma mandaoh-daoh Ham humbangku,
ai dohor do hasosakan, seng dong sipangurupi.
13Buei do lombu jonggi manlioti ahu,
anjaha horbou ni Basan mangurup ahu. (Jes. 34:7)
14Ipangangang bei do babahni dompak ahu,
songon singa na manoroh anjaha maraum.
15Durus do ahu songon bah,
mangkasirang holi-holingku,
uhurhu pe songon lilin do,
malala ibagas diringku. (Ps. 58:8; 2 Sam 14:14; Luk 22:44)
16Horah do tolonanku songon sanga-sanga,
anjaha dilahku longkot do bani langit-langitku;
bani orbuk ni hamatean do iparagei Ham ahu. (Jes. 53:16; Joh 19:28)
17Ai ilioti baliang do ahu,
anjaha hulanan ni parjahat manginggoti ahu,
itobaki do tanganku pakon naheihu. (Sak. 12:10; 13:6; Luk 24:39, 40; Joh 20:25-27)
18Boi do hubilangi haganup holi-holingku,
pasombuhkon do sidea mangidah ahu.
19Ibagi sidea do hiouhu,
manjomput na sinurat do sidea pasal baju-bajungku. (Mat 27:35; Joh 19:23)
20Tapi Ham Jahowa, ulang ma Ham mandaoh-daoh;
Ham hagogohonku, oloskon Ham ma mangurupi ahu! (Ps. 38:22, 23)
21Sai paluah Ham ma hosahku humbani podang,
tonduyhu na lungunan on humbani sisilon ni baliang. (Sak. 13:7; Ps. 35:17)
22Sai paluah Ham ma ahu humbani babah ni singa,
anjaha bansah bahen Ham humbani tanduk ni horbou jalang.
23Ambilankononku ma goran-Mu bani saninangku,
pujionku ma Ham i tongah-tongah ni kuria in. (Ps. 9:15; Joh 20:17; Heb. 2:11, 12)
24Nasiam na mangkabiari Jahowa, puji nasiam ma Ia;
haganup ginompar ni si Jakob, pasangap ma Ia,
mabiar ma nasiam Bani, nasiam ginompar ni Israel.
25Ai seng ongga ipahiri anjaha magigi Ia
bani hadoyukon ni na madoyuk,
anjaha seng ongga iponopkon bohi-Ni hu bani,
itangihon do sanggah dilo-dilo Bani. (Ps. 72:12-14; 9:13; Jes. 57:15; Heb. 5:7)
26Hun Bamu do harohan ni puji-pujianku i tongah-tongah ni kuria na banggal in,
galaronku ma bagah-bagahku i lobei ni sagala na mangkabiari-Si. (Ps. 50:14; 116:14; 118:23)
27Sai na mangan anjaha maningon bosur do halak na masombuh;
maningon mamuji-muji Jahowa do halak na mangindahi-Si.
Sai hinsah do uhur ni sidea sadokah ni dokahni. (Ps. 24:6; 69:33; Jes. 65:13; Mat 5:5, 6)
28Dingaton ni sagala ujung ni tanoh on ma ai anjaha mulak bani Jahowa;
sagala bangsa sipajuh begu-begu maningon manrogop do i lobei-Ni. (Ps. 72:11)
29Ai Jahowa do simada harajaon,
anjaha Ia do na mamarentah sagala bangsa. (Obaja 21; Sak. 14:9)
30Nai ma, maningon marsombah do hu Bani sagala na sangap-sangap ni tanoh on,
anjaha maningon do manrogop hu lobei-Ni sagala na dob tuad hubagas orbuk
ampa halak na so manggoluh be tonduyni. (Ps. 2:10-12; Pil. 2:10)
31Sai balosan ni ginompar ni na i pudi do Ia,
baritahononkon do pasal Jahowa bani sundut na roh. (Jes. 53:10)
32Ambilankonon do hapintoron-Ni bani sagala bangsa na laho tubuh ope,
paboa Ia do na pasaudkonsi. (Ps. 110:3; Joh 19:30)
Currently Selected:
PSALMEN Bindu 22: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.