PSALMEN Bindu 21
Bindu 21
Doding Tarima Kasih halani Hamonangan ni Raja
1Bani pambobai koor. Psalm ni si Daud.
2Ham Jahowa, marmalas ni uhur do raja in halani hagogohon-Mu,
anjaha marolob-olob tumang do ia mangidah haluahon na hun Bamu. (Ps. 20:6)
3Ibere Ham do hubani pinindo ni uhurni,
anjaha seng itulak Ham pangindoan ni bibirni. Sela. (Ps. 20:5, 6; 37:4; 1 Raj 3:9)
4Ai ialo-alo Ham do ia marhasoman pasu-pasu na banggal,
igotongkon Ham do bani sortali omas. (Ps. 132:18; 2 Sam 12:30)
5Ipindo do hagoluhan hun Bamu;
ibere Ham do hu bani umur na ganjang ronsi sadokah ni dokahni. (2 Sam 7:8-29)
6Timbul do hasangaponni halani pangurupion na hun Bamu,
hatunggungon pakon hahormaton ibere Ham do hu bani.
7Ibahen Ham do ia gabe pasu-pasu torus,
ipasabou Ham do ia marhitei malas ni uhur ni bohi-Mu. (Ps. 16:11; 72:17; 1 Mus. 12:2)
8Ai martenger ni uhur bani Jahowa do raja in,
anjaha halani idop ni uhur ni Tang Sitimbulan in,
seng anjai rebeh ia.
9Sai na jumpah tangan-Mu do munsuh-Mu;
anjaha sai na jumpah tangan siamun-Mu do na mandomdomi Ham. (Ps. 118:19)
10Doskon pamurunan do sidea bahenon-Mu bani panorang paroh-Mu, Ham Jahowa,
bani parringis-Mu bonduton-Mu do sidea,
anjaha panganon ni apuy do sidea. (1 Mus. 19:24, 28; Mat 3:19)
11Boiskonon-Mu do niombah ni sidea hun tanoh on,
ginomparni hun tongah-tongah ni jolma manisia. (Ps. 109:13)
12Anggo ipingkiri sidea na jahat dompak Ham,
anggo iranggihon tahi-tahi seng anjai saud ai. (1 Mus. 50:20; Jes. 8:10)
13Sai na maporus do sidea bahenon-Mu;
tembakon-Mu do bohi ni sidea marhitei sior-Mu. (Ps. 7:13)
14Jongjong ma Ham, ale Jahowa, ibagas hagogohon-Mu,
ase ipuji anjaha idodingkon hanami kuasa-Mu.
Currently Selected:
PSALMEN Bindu 21: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.