Rom 10
10
1Ba̱wumbeyang, n cat ka̱yat rya nzuk ba̱nyet Yahuda na ba̱nyet nzuk ba a̱ shya sucet. Kozan ka̱ram n naai Ka̱za a̱zi hywak mba. 2N drok n sswa nak mba ba cat myim Ka̱za di rya yring, ma cat mba na si nwa i cyi. 3Ba bvwo ryen na Ka̱za kan cat ba̱nyet a̱ ka̱ myim ni ba. Rot a̱mi ba cat tssup na̱ta̱ryen mba a̱ ga myim Ka̱za, a̱ si rak wrak a̱ccu mba ryen na Ka̱za ka nan tyyi ba̱nyet a̱ ka̱ myim ni. 4Kristi a̱ ka̱n tyyi Truwang ji tyak, rot a̱mi sa̱rei a̱yin nu a̱ ku ryi rya nu na ni a̱ ni myim Ka̱za.
Sucet a yet nyyi koyan
5Rot Musa a̱ yin jem di ki a̱yin a̱ yet a̱zizrak a̱ sswa cet ba ku me i swat ka̱sa nu na, di na̱ yya a̱ka̱tukyya ko nkrang ka̱yring ba, a̱mi meyang na̱ nin kaat. 6Ma dizizrak ti ba nyyai di ntyyi rya ni hywa, Ba se a cat nat Tazwa n shya Yesu Kristi da̱ ga na̱ brang ba, rot a̱ ka̱n ba. 7Da̱ nwan ni cat nat ka̱yat nkom i gi brek bu Kristi ba mi i sucet brak ba, rot a̱ ka̱n ta̱za. 8Ma kyang a ba hywa ni nkpa yet, “Ba̱ryat Ka̱za a̱ shyi shishrek ba̱ nyin. Ba shyi a kpa na̱nu nyin na bu ka̱yat ndya.” -- mba yet ba̱ryat ntyyi rya ba zi tyyei ni. 9Ka yrang ka̱nu nwan n hywa, “Yesu a̱ yet A̱gwam,” i bu shim ka̱yat rya nwan ka Ka̱za a̱ yin ku shyek nyyai a̱yabyen, a ni kaat. 10Rot ki zi shim ka̱yat ndya njit ka, zi ni myim Ka̱za. Ki zi bu hywa di ka̱nu njit ka, zi ni kaat. 11Ba̱ryat Ka̱za a̱ hywa, “A̱yin nu a̱ tyyi rya nu a̱za̱ nu ni a̱ ni hok nsum ba.” 12Ba̱ryat bani a̱ yet ba̱nying koyan, rot di ba̱nyet Yahuda di kpikpit nwap a zi yet bu ka̱yring. Ka̱za a̱ shyi bu ka̱yring, a̱gwam ba̱nyet sa̱rei, kuma ba̱nyet ba a̱ ka̱ yei ni, ba ni shya ka̱nu-a̱tan ba̱gingang da̱ nu. 13Da̱ni di ba̱ryat Ka̱za ba ban hywa ni, “A̱yin nu a̱ yei diyrek A̱gwam Ka̱za ni a̱ ni shya sucet.”
14Ma ba ni yya ni a̱n yei diyrek nu ti, ki ba ku ryi ndya mba na ba? Ki ba ni yya ni a̱ ku ryi ndya mba na, ki ba hok ba̱ryat nu ba ba? Ki ba ni yya ni a̱n hok ba̱ryat nu ba, ki ba ba̱ tyyei ba? 15Ki ba ni yya ni a̱n tyyei ba̱ryat ba, ki ba tom ba̱nyet tyyei ba ba? Ba̱ryat Ka̱za ba a̱ hywa, “Ka̱sham kyang a̱mi a̱ yet a̱tak ba̱nyet tyyei Ka̱sham Ba̱ryat!” 16Ma ba sa̱rei mba a̱mi a̱ san Ka̱sham Ba̱ryat ka ba. Ishaya di ka̱nu nu a̱ yin hywa, “A̱gwam Ka̱za, a̱nyan a̱ shim ba̱ryat njit ba?” 17To, tyyi rya na nyyai pfong ba̱ryat ba, ba̱ryat ba a̱ nyyai pfong wa'azi Kristi nu.
18Ma kyang a n zzim ni, ba yin hok ba̱ryat ba baa? Ba yin ba̱ hok ba̱zizrak. Rot ba̱ryat Ka̱za a̱ hywa,
“Na̱wan mba na a̱ yin nat koke i ka̱sa ka;
ba̱ryat mba ba a̱ si tat a̱ngbom ka̱sa nu.”
19Kyang a n bo ni zzim ni: Ba̱nyet Isreila ba a̱ yin bvwo baa? Musa a̱mi a̱ yet ka̱son shim ka ka̱sak ka ba nin bvwo ni. Ka̱za a̱ yin tyyi Musa na̱ hywa,
“N ni tyyi yi kpa swam ba̱nyet a a̱ maai yet wap ni ba.
N tyyi yi yya diryen ba̱ a̱bvwon wap.”
20Ishaya ma a̱ gbung rya a̱ ra̱u a̱mi a̱ ryat ba̱ryat Ka̱za ba a̱ hywa,
“Ba̱nyet ba a̱ n cat i ba, a̱mi a̱ n shya.
N tyyei diccu nzuk di ba̱nyet ba a̱ n zzim ni ba.”
21Ma tazwa Isreila ka hywa, “N neyak bvak nzuk n kpa nom n ga n san ba̱nyet rak hok bu ba̱nyet hweyak a̱pfo.”
Currently Selected:
Rom 10: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
