Rom 11
11
Dizot Ka̱za ti tazwa Isreila
1N si bo n zzim: Ka̱za a̱ rak ba̱nyet nka baa? Ko ba̱cincong! Nzuk ma n ma̱n yet a̱ntyok Isreila, ka̱mbvon Ibrahim nyyai an sot Banyami. 2Ba̱nyet ba Ka̱za ka tssa a̱ tun nyyai doson ni ka ka̱n ba̱ kaai a̱ wwon ba. Yi bvwo kyang a ba̱ryat Ka̱za ba hywa ni ka̱ram ka Iliya na̱ yin naai Ka̱za tazwa nkyang ka ba̱nyet Isreila ba yya ni. 3A̱ yin hywa, “A̱gwam Ka̱za, ba ka̱n hywaai sa̱rei ba̱nyet tyyei ba̱ryat nwan ba a̱ wop sa̱rei na̱bvwa ba̱hyum a; nzuk n bvat ba̱diyin, ba kwan zwang n hywat.” 4Ka̱za a̱ hywa da̱ nu, “N ri ya bvat ba̱nyet ncyi kop a̱tiyring, ba̱nyet ba a̱ ka̱n ta̱gbok a̱ sook Ba'al ntong ni ba.” 5Ko ba̱nyying ma ku ri ryi a̱mi, a̱yayring a̱ ri nshyi ba̱nyet ba Ka̱za ka gang a̱ tun rot ka hok dizot mba ni. 6Ba̱nyet ba ka cat i a̱mi ka gang a̱ pfong dizot mba ti, ba ba̱nyet ba a̱ kwan da̱ a̱ccu mba ni ba; ka̱ a̱mi, ba a̱yin nu a̱ bon dyi dizot nu ti ni ba.
7A̱nzan a̱ yya? Ba̱nyet Isreila ba a̱ yin shya kyang a ba cat i ba. Ba̱nyet ba̱cincong ba Ka̱za ka yin tssa ni a̱mi a̱ yin shya. Ka̱za a̱ hweyak a̱pfo kpikpit ba̱nyet a ba ga wi hok yei nka na. 8Da̱ni di ba̱ryat Ka̱za ba ban hywa ni, “Ka̱za a̱ yin ba̱ ta̱kwu a̱huhwa bu ndya na, har ka̱pfun ba maai ryi da̱ a̱ssi mba ko ba hok da̱ a̱pfo mba ba.” 9Dawuda a̱ naai Ka̱za a̱ hywa,
“Ka̱za a̱ brak a̱swa mba nu na̱ yet a̱grung,
ka bo tyyi ba kwei a̱grung u ka bo ba̱ yya shirya.
10Ka̱za a̱ ba̱ muk a̱ssi na ho ba bu cyang.
Ka̱za a̱ yya ban hwan ka̱bvung mba ka.”
11To, kyang a n bo ni zzim ni: ba̱nyet Yahuda na yin kpa n hwan o? Ko ba̱cincong! Rot a̱ka̱tukyya mba nu kpikpit nwap a shya sucet, ba̱nyet Yahuda na i gi hok swam. 12Ki dikpak ba̱nyet Yahuda ti si ba di ka̱sa ka ka̱nu-a̱tan, dizot mba ti ka̱yat ntswa bu ba di kpikpit nwap a ka̱nu-a̱tan, to, ka̱nu-a̱tan nu a̱ ma ri-ryi na ni ki ka̱tswa mba ka sa̱rei a̱ bu ba ba̱cicrak?
Sucet a kpikpit nwap a ba shya ni
13N dyat ba̱ nyin kpikpit nwap a. Da̱ni di n ni yet a̱ntyok wa'azi di kpikpit nwap a ni, dolet n hyong pfong nzuk a. 14Shim n tyyi ba̱nyet wap nzuk ba a̱ hok swam nyin, ba̱yanyet mba a̱ ga shya shot. 15Rot ka̱ram ka Ka̱za kan ba̱ yrik a̱ sak zan ni, a̱ kwwat kpikpit ba̱nyet ka̱sa na ba̱gingang a̱ nat i shishrek ba̱ nka. To, ki ba san ba̱nyet Yahuda na naanini, ku ni ryi anye sa̱rei ba̱nyet ba a̱ ku san ni a̱ shyek nyyai i dikwu yemi baa?
16Ka̱ a̱yin a̱ wrak dikum burodi ka̱son ti ti yet tinying Ka̱za, to, sa̱rei dikwang burodi ti yet tinuu. Ka̱ a̱nan ka̱kon na a̱ yet a̱nying Ka̱za, to, sa̱rei mbvak ka̱kon na ma̱n yet nnuu. 17Ba ka̱n tyet mbvak ka̱kon a̱lemu nzaan a̱ jing a̱ ba bu bvak ka̱kon ka̱yit a̱ bun pfwok. Nyin kpikpit nwap a yi ryi di ka̱kon ka̱yit ka ni. Yi shya nwa hok ansham a ba̱nyet Yahuda na ba byyi ni. 18Rot a̱mi yi ryok byyai ba̱nyet ba ba yin tyet a̱ jing ni ba. Yi ni yya ni n ya cin? Yi yet bu mbvak, nyin a̱mi breng a̱nan na ba. A̱nan na a̱mi a̱ ya breng.
19To, shim a hywa, “Ee, ba yin tsseng mbvak a n ga n shya ka̱bvwa.” 20Ka̱ryong a̱mi, ba yin na̱ tsseng rot ba yin tyyi rya ba. Nwan a shyi ka̱bvwa ka rot an tyyi rya. Ma ryok ya cin ba, ku myim a pfong ka̱wun. 21Ki Ka̱za a̱ yin tyet ba̱nyet Yahuda na yin yet mbvak ka̱kon na ni a̱ wwon ba, a hwa da̱ nwan a̱mi ba ni wwon o? 22Kyi a̱mi zi nin dyi diryen Ka̱za ti bu dizot nka ti. Ka̱za a̱ yin pfong diryen ba̱nyet ba a̱ yin yya a̱ka̱tukyya ni, a̱ si bo pfong dizot nyin ba̱nyet ba a̱ swat dizot nka ni. Nwan ma ka cam ba a̱ ma̱ ni na̱ tyet a̱ jing. 23Ba̱nyet Yahuda na meyang ki ba brek a̱ wrak ka̱ryong, ba ni brek da̱ mba a̱ bu mon i ka̱kon a̱lemu ka ba yin ba̱ tyet ni, rot Ka̱za a̱ maai a̱ yya a̱mi. 24Ma nyin kpikpit nwap a, yi ryi di bvak ka̱kon ka̱yit a ba tyet i di ku yet ka̱kpeyang ni ba, a̱ kpo sook a̱ si pfwok a a̱lemu nu ba tup ni. Ba̱nyet Yahuda mba a̱mi a̱ yet a̱lemu nu ba tup ni. Di ku ni bvwa dikwu Ka̱za a̱ bvwot di mbvak a ba tsseng ni a̱ pfwok i na̱bvwa na na ba.
Ka̱za a̱ pfong dizot koyan
25N ni ya tyyei, ba̱wumbeyang, kyang yaan n shyi yet ka̱ryong, nna ni ba̱nyet ba̱gingang ba bvwo ni ba. Shim ku tyyi yi ryok hwa di yi byyi a̱za̱ncyi. Hweyak a̱pfo ba̱nyet Yahuda na nin hwan ba. Ba ni yen za bu ka̱son a nkpa bu tat ka̱ram ka ka̱nu kpikpit nwap ka Ka̱za ka sak a̱ ni san ni ban shya sucet i. 26A̱mi sa̱rei Isreila ba nin shya shot a, da̱ni di ba̱ryat Ka̱za ba ban hywa ni,
“A̱ntyok san ba̱nyet u a̱ ni nyyai Sihiyona,
a̱ bu ryang sa̱rei na̱kpot a a̱ shyi i na̱mbvon Yakubu na ni.
27Kyang a n ni rop n wwon ba̱ mba ni ku yemi,
ka̱ram ka n nin sook a̱ka̱tukyya mba nu ni.”
28Ma ba bu rak Ka̱sham Ba̱ryat ka, rot a̱mi ba̱nyet Yahuda na i tyyi ba̱ra̱ndwan Ka̱za a̱zi hywak nyin, kpikpit nwap a. Ma ka̱sak ka Ka̱za ka ka̱n ba̱ tssa ni ba yet ba̱rywai Ka̱za rot ba̱tyyi a̱kwop mba ba. 29Rot Ka̱za a̱ na shei rya nka tazwa a̱yin ka ka tssa ni ba ka na ku wwon ka̱nu-a̱tan. 30Ma nyin kpikpit nwap a yi yi yen yya Ka̱za wipfong; ma ba̱nyying ka hok dizot nyin, rot ba̱nyet Yahuda na yin hweyak a̱pfo mba na. 31A̱mi meyang ka̱sak ka Ka̱za kan hok dizot nyin ni, a̱mi meyang ba̱nyet Yahuda na i ma̱n nwa wipfong, Ka̱za a̱ ga ma̱n hok dizot mba. 32Koyan Ka̱za a̱ ku tyyi i dikwwa wipfong, a̱ ga shya diwat hok dizot koyan.
Zi dyep Ka̱za
33Shya Ka̱za na ba̱ a̱za̱ncyi nka na bu bvwo nka na byyi ka̱bvwa tyen ba. A̱nyan a̱ ni maai a̱ tyyei kyang a Ka̱za ka hwa a̱ ni yya ni? Ka̱ a̱nyan a̱ ni maai a̱ bvwo na̱ta̱ryen Ka̱za na? 34Da̱ni di ba̱ryat Ka̱za ban hywa ni,
“A̱nyan a̱ bvwo a̱huhwa A̱gwam Ka̱za?
A̱nyan a̱ maai a̱ ku tyyei kyang a myim ni?
35A̱nyan a̱mi a̱ ka̱n wrak Ka̱za kyang
har a̱ pfong ka ku tan?”
36Sa̱rei nkyang a shyi i ka̱sa ka ni nka a̱ na̱ yya; nka a̱ bo na̱ breng na yet nkaa. Zi ni dyep Ka̱za rot shii nka na hat a̱ba̱da. Amin!
Currently Selected:
Rom 11: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
