Rom 9
9
Ka̱za bu ba̱nyet ba ka tssa ni
1Kyang a n dyat i yet ka̱ryong. N yet a̱nying Kristi, da n bvei dira ba. Tswa Ka̱za ji breng rya nzuk a ni n tyyei di dira n bvei ba 2ka̱ram ka n hywa byyan rya nzuk a ra̱u ku bu byyi tyak ka̱yat rya nzuk ka ba rot ba̱wumbeyang ba n yet wap yring ba̱ mba ni. 3N wa ni shim Ka̱za a̱ n shyi a̱ n gang bu Yesu a̱zi hywak mba. 4Ba yet ba̱nyet ba Ka̱za ka tssa a̱ tun ni. A̱ ba̱ brak a̱n yya na̱won nka a̱ ba̱ tyyei digba̱dang nka ti. Mba a̱mi na̱ yin dop a̱wwon ba̱ mba a̱ ba̱ ryi Truwang ji. Mba a̱ shya tssup ka̱ryong a. Mba a̱mi Ka̱za ka yin yya rop-wwon nu ba̱ mba, 5ba bo yet na̱won ba̱tyyi a̱kwop a. Kuma ki ba sook Yesu na̱ yet a̱neywu na̱ bo nyyai an sot mba. Zi dyep Ka̱za A̱gwam njit ka a̱ yet a̱gwam nkyang sa̱rei ni, zi ka̱ dyep wityak.
6N nin hywa di Ka̱za a̱ ka̱u di yya kyang a ka rop a̱wwon ni ba; rot ba sa̱rei ba̱nyet Isreila a̱mi Ka̱za ka tssa a̱ tun ba. 7Ba sa̱rei na̱won Ibrahim a a̱mi a̱ yet na̱won Ka̱za ba. Ka̱za a̱ yin hywa di Ibrahim, “A ni shya byik nwan ji n dop n wwon ni rot Ishaku.” 8Wato na̱won na a̱ yet byin rwam ni mba a̱ yet na̱won Ka̱za na ba, seko na̱won na a̱ nyyai an kyang a Ka̱za ka rop a̱wwon ni. 9Rot Ka̱za a̱ yin dyat a̱wwon a̱ hywa, “Njen ka ni a̱turya, n ni brek n ba, Saraya a̱ byin ka̱won ka̱seyang.”
10A̱ngbom u a̱ yemi ba; na̱won Rifkatu na a̱ yin yet ba̱hwai a̱tyyi a̱yring nu a̱ yet Ishaku, a̱tyyi a̱kwop njit u. 11-12Ma ku gi myim ba̱cicrak bu kyang a Ka̱za ka cat i, Ka̱za a̱ hywa di Rifkatu, “A̱yekwo nu a̱ ni yya a̱shishyi nu dikwwa.” Ka̱za a̱ yin hywa a̱mi nyyai ba ka̱n ba̱ tyei ba, ka̱ram iya ba ka̱n yya a̱tsatsak kyang ko a̱bibyyi nkyang ba. Rot a̱mi Ka̱za a̱ yin tssa ka̱sak ka kan cat i, ba da an kyang a ba yin yya ni ba. 13Da̱ni di ba̱ryat Ka̱za ba ban hywa ni, “N gang Yakubu n cat, n dak Isuwa.”
14To, zi ni hywa di Ka̱za a̱ byyi na̱kpot o? Kaai, 15rot a̱ yin hywa di Musa, “A̱yin nu n shim hok dizot nu ni, a̱mi n ni hok; a̱yin nu n shim brang ni, nu n ni brang.” 16Rot a̱mi ba ku shyi an kyang a a̱yin na̱ yya ni ko na̱ cat i ba, se a̱yin nu Ka̱za ka hok dizot nu ni. 17Ba̱ryat Ka̱za ba a̱ hywa di Fir'auna, “N ni na̱ kup dityok ti, n ga na̱ shya n tyyei cet nzuk a, sa̱rei ka̱sa ka a̱ ga hok diyrek nzuk ti.” 18To a̱mi kun sseng di hywa na ni, a̱yin nu Ka̱za ka shim hok dizot nu ni ka ni hok, a̱yin nu ka ma̱n shim bu wipfong ni, ka ku ryi wipfong.
Diryen Ka̱za ti bu dizot nka ti
19Shim a̱yanyet nyin a̱ zzim a̱ hywa, “To, ka̱ a̱mi Ka̱za a̱ ni yya ni a̱n dop a̱yin hywak? A̱nyan a̱ maai a̱ seyak kyang a Ka̱za ka cat i?” 20Ma nwan a̱nyan a̱wumba ni hywa a̱mi di Ka̱za? Ron na ba nok di diryem ni maai ba i zzim a̱ntyok dinok u i hywa “Ho a̱nzan a ni nok ni e?” 21Nu a̱ntyok dinok u a̱mi a̱ ni tssa ka̱sak ka na̱n cat ron na n dyi ni. Ka̱ shim a̱ sook dikwang diryem tiyring a̱n nok a̱ron a̱hwa na bvwon, yring a ban yya mpfong kozan ka̱ram, yring a se mpfong ka̱tung.
22A̱mi Ka̱za kan yya, a̱ yen cat ba ryi diryen nka ti a̱ bo bvwo cet nka na. Rot a̱mi ka yya hakuri a̱ yen breng ba̱nyet ba a̱ ka̱ tyei diryen ti ni ba̱nyet ba maai ba ba̱ byyan ni. 23A̱ cat a̱ tyyei digba̱dang nka ti, tinying wityak, tinti ni ka yin wrak ba̱nyet ba ka hok dizot mba ti ni. Ba̱nyet ba ka yin shirya ba ni san digba̱dang nka ti ni. 24Njit a̱mi yet ba̱nyet ba ka yei ni, ba bu ka̱yat ba̱nyet Yahuda ka ba, sa̱rei bu kpikpit nwap a. 25Nkpa ka yin hywa ka̱yat kpa Hosea ka,
“Ba̱nyet ba a̱ yi yen yet ba̱nyet nzuk ni ba
n ni ba̱ yei ‘Ba̱nyet nzuk’.
Ba̱nyet ba n yi yen cat ni ba,
n ni ba̱ yei ‘Na̱won mra’.”
26Hosea meyang a̱ yin ba̱ tyyei a̱ hywa
“Ka̱bvwa ka ba yin ba̱ tyyei a̱ hywa, ‘Yi yet ba̱nyet nzuk ni ba,’
Ka̱ yemi ba bo nin ba̱ yei na̱won Ka̱za, A̱gwam Sucet.”
27Ba̱nyet Isreila ba a̱mi Ishaya na̱ yin dyat a̱ hywa, “Ko ba̱nyet Isreila bani a̱ si bu shii ka̱tswa di jijak a̱mbeyang kei ni, bu ba̱yayring mba a̱mi a̱ ni shot, 28rot A̱gwam Ka̱za a̱ ni tyak shirya nu ji i ka̱sa ka a̱ za̱ tyet bu i ka̱baram.” 29Nkpa Ishaya na̱ bo yin hywa, “Ka̱za ka byyi cet i a̱ da n dyok za wwon byik ba, da njit ba ni ryi di Saduma bu Gamurata ni.”
Isreila bu Ka̱sham Ba̱ryat
30To, a̱nzan zi bu ni hywa? Kpikpit nwap a wi yin kula a̱ myim Ka̱za ni, mba Ka̱za ka wa hok ansham mba, rot ban tyyi rya. 31Ma Isreila nu a̱ kwan zwang tssup truwang a̱ ga myim Ka̱za, di ba ka̱ myim ba. 32To, a̱nzan a̱n byyi? Rot kyang a ba yin yya ni yin shyi i tyyi rya ba, ba cat kwan da̱ a̱ccu mba. Ba si ya grap an “kpang digrap ji”. 33Da̱ni di ba̱ryat Ka̱za ba ban hywa ni,
“Cyang, ka̱yat Sihiyona n ni sak kpang,
nying ji ni tyyi ba̱nyet digrap ni.
Kpang ji ni ba̱ tyyi dikpak ni.
Ma a̱yin nu a̱ tyyi rya nu na a̱za̱ nu ni a̱ ni hok nsum ba.”
Currently Selected:
Rom 9: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
