Pfong Ka̱za 8

Hatimi a̱mba̱tiyring u

1Ka̱ram ka A̱truk u na̱n kruk hatimi a̱mba̱tiyring u ni, Tazwa ji yen tyyi ba̱ nyong har si tat minti nswak ntat. 2N si n dyi ba̱pfong Ka̱za a̱tiyring ba a̱ yin sseng a̱ta̱ssi nka ka ni, sa̱rei mba koyan ba ku ryi digba tiyring.

3A̱pfong Ka̱za a̱yaan nu a̱ shyi bu cicyi zinariya na ni a̱ nyyai a̱ bu sseng i ka̱bvwa ba̱hyum ka. Ba ku ryi turare ba̱gingang, na̱ ga wrak bu a̱duwa sa̱rei ba̱nyet tssup u tazwa ka̱bvwa ba̱hyum zinariya ka a̱ta̱ssi a̱ntwam dityok ka. 4Ncing a̱hwwi ba̱hyum a i ta̱za i nat ba̱ a̱duwa ba̱nyet tssup a̱ta̱ssi Ka̱za nyyai an bvak a̱pfong Ka̱za na a̱ sseng a̱ta̱ssi nka ka ni. 5Wwon a̱pfong a̱ywu a̱ sook cicyi na a̱ bvwa a̱crang ndong a̱n hywat nyyai tazwa ka̱bvwa ba̱hyum ka a̱ ta i ka̱sa ka. N hok na̱bvwa na na tssak, bu zzang, bu na̱krong nza, bu trim ka̱byen.

A̱gba a̱tiyring

6Wwon ba̱pfong Ka̱za a̱tiyring ba a̱ breng a̱gba a̱tiyring a ni a̱ kwwat a̱ sseng a̱ ni na̱ tyyak.

7A̱pfong Ka̱za ka̱son nu a̱ tyyak digba nu ti, ditaat bu rong nkyyai bu ba̱sok n nwa zzwam ka̱yat ka̱sa ka, ka̱sak ka̱yring ka̱yat a̱tat a̱nying ka̱sa ka a̱ hwwi, ka̱sak ka̱yring ka̱yat a̱tat i na̱kon a̱ hwwi, a̱shrim ba̱pyyi nu a̱ hwwi sa̱rei.

8Wwon a̱pfong Ka̱za a̱mba̱hwa nu a̱ ma̱n tyyak digba nu ti. Kyang yaan i wruk di dihwan ti ya rong ni si kpa i kei ti. Ka̱sak ka̱yring ka̱yat a̱tat a̱nying ba̱shekwot ka a̱ brak a̱ tyyi ba̱sok. 9Ka̱sak ka̱yring ka̱yat a̱tat a̱nying nkyang nsso na swat ka̱yat a̱yuywu ka ni i kwi, ka̱sak ka̱yring ka̱yat a̱tat a̱nying njirgi ba̱shekwot a i byyan ba̱sa̱rei.

10Wwon a̱pfong Ka̱za a̱mba̱tat a̱ ma̱n tyyak digba nu ti. A̱gba̱dang ka̱ta̱ngwat a̱ wruk nyyai ntazwa, a̱ ya rong di diwuk i, a̱ bu kpa ka̱sak ka̱yring ka̱yat a̱tat a̱nying ncen nu bu nrang ba̱shekwot a. 11Ba yei ka̱ta̱ngwat iya A̱cwai, rot ka yin tyyi ka̱sak ka̱yring tazwa a̱tat ba̱shekwot ka a̱ tyyi cwai, ba̱nyet ba̱gingang a̱ sswa a̱ ma̱n kwi.

12Wwon a̱pfong Ka̱za a̱mba̱naai u a̱ ma̱n tyyak digba nu ti. Ka̱sak ka̱yring tazwa a̱tat nom u ba ka̱ zzu; ka̱sak ka̱yring tazwa a̱tat nhywan nu bu ka̱sak ka̱yring a̱nying na̱ta̱ngwat u ba ba̱ zzu, rot a̱yring tazwa a̱tat a̱ ga ryin sai nu na. Ka̱ram ka̱yring tazwa a̱tat nom u bu a̱yring tazwa a̱tat ka̱tuk u ban dyin ka̱bvwa sai ka ni.

13N cyang n dyi a̱godo nu a̱ hwwut ntazwa ni, na̱ hywa, “Woyooi! Ka̱bvung a̱ ba. Ku wu ni ri-ryi nani bu sa̱rei ba̱nyet ka̱sa ba ka̱ram ka ban tyyak a̱gba ni, a̱naani kpikpit ba̱pfong Ka̱za ba̱tat a ba ni tyyak ba̱nyying i!”

Currently Selected:

Pfong Ka̱za 8: kaj

Highlight

Copy

Compare