Pfong Ka̱za 9

1A̱pfong Ka̱za a̱mba̱pfon nu a̱ tyyak digba nu ti, n dyi ka̱ta̱ngwat ka a̱ ka̱n brum nyyai Tazwa a̱ bu kpa ka̱byen ni. Ba ka̱ ryi ka̱won a̱kwado a̱yabyen ka. 2Ka̱ta̱ngwat ka a̱ sook ka̱won a̱kwado iya a̱ yrang a̱yabyen nu, ncing i wruk nyyai ka̱ yemi di nyyi a̱gba̱dang ndong ni, ncing a nyyai i a̱yabyen nu ni i cii nom sai a bu ka̱sa ka ba tyyi ba̱gbyik. 3Ba̱tung a̱ nwa wwut nyyai ka̱yat ncing ka a̱ nwai ka̱sa ka. Ba ba̱ ryi cet tssop ba̱nyet ba̱cicrak bu nyang ka̱sa ji, 4a̱ ba̱ bvwo ba ya ba̱pyyi ko na̱kon na̱yaan, se bu ba̱neywu ba a̱ sang hatimi Ka̱za na a̱ta̱ssi mba ka ni. 5Ba shim ba̱tung ba a̱ hywaai ba̱nyet iya ba, ma a̱ ba̱ jyet ka̱bvung har hywan pfon. Ka̱bvung ka ba sswa ni a̱ ni swat di tssop nyang ni. 6Ka̱yat nnom iya ba̱nyet a̱ ni cat dikwu a̱ ta̱ shya ba. Ba ni ta̱ faan, ma ti tyong i ba̱ wwon.

7Ba̱tung ba a̱ tai bu tsaap ji wruk zwang ni. Kyang i shyi a a̱ccu mba na tai bu rawoni zinariya, a̱ssi mba na a̱ tai ba nying ba̱neywu. 8A̱cat diccu mba na a̱ tai ba̱nying ba̱nyring, a̱nyyi mba na a̱ tai a̱nyyi zaki. 9Ba kup na̱hok mba na di ba̱ryet ba tai ba̱ a̱tro ntswam ni. Nhweyak mba na i zzang di ba̱keke ntsaap ba ba kwak a̱ naat i ka̱bvwa nzwang ni. 10Ba byyi ndum bu ntop di nyang ni. Ndum mba na a̱mi ban byyi cet yya da̱ a̱yin har hywan pfon. 11Ba byyi a̱gwam mba. Nu a̱mi a̱ yet a̱pfong Ka̱za nu a̱ byyi cet a̱yabyen na ni. Diyrek nu ti an wap ba̱nyet Yahuda na yet “Abaddon,” a Helenanci ba yei “Apoliyon.” (Nkpa a̱ yet “A̱ntyok byyan.”)

12Ka̱bvung ka̱son ka a̱ seyak, na̱hwa na a̱ bvat ni a̱ shyi bai a.

13A̱pfong Ka̱za a̱mba̱kitat u a̱ tyyak digba nu ti, n hok diwan nyyai a a̱gba̱dang ka̱bvwa ba̱hyum u a̱ byyi na̱gwut na̱naai ba yya di zinariya ni, na̱ sseng a̱ta̱ssi Ka̱za. 14Diwan ti i hywa di a̱pfong Ka̱za a̱mba̱yinkitat u a̱ byyi digba ti ni, “Byyik ba̱pfong Ka̱za ba̱naai iya a̱ shyi i rop a a a̱gba̱dang ncen Furatu nu ni.” 15Ba byyik ba̱pfong ba̱naai iya a̱ wwon, dama ba ba̱ sak a̱n tot ka̱ram kani bu nom ani bu hywan ani bu dirya tini, ba ga hywat ka̱sak ka̱yring ka̱yat a̱tat ba̱nyet ka̱sa ba. 16N hok di ka̱tswa ba̱nyet ban ntsaap ka a̱ wruk a̱ sseng ni a̱ yin yet miliyon ncyi swa (200,000,000). 17Nzuk n dyi tsaap ji bu ba̱nyet za̱ban ba. Ba byyi ba̱ryet a̱n hwwun na̱hok mba na, ba shong di rong ni a̱ bo ryi ba̱ a̱dindying a̱ bo yet bvonsom. A̱ccu ntsaap a a̱ tai a̱nying zaki, rong bu ncing ba̱ a̱sai ndong ba wwut i na̱nu nji na. 18Ba sook na̱bvung na̱tat a a̱n hywaai a̱yring ka̱yat a̱tat ba̱nyet ka̱sa ba, di rong bu ncing bu a̱sai ndong u a̱ yin wwut nyyai ka̱nu ntsaap ka ni. 19Cet ntsaap a yin shyi i na̱nu mba i bu shyi a ndum mba na. Ndum mba na tai bu shon ji ba̱ a̱ccu nji ni, nna a̱mi ba tyei a̱n tssop ba̱nyet ka̱sa ba.

20Kpikpit ba̱nyet a a̱ kwi i na̱bvung na̱tat a ni ni ba a̱ rak brak a̱ wwon nkyang a ba yya di bvak mba ni, a̱ ya ka̱son bu kok a̱ka̱tuk tswa ntong bu na̱za na̱yaan na ba yya di zinariya bu a̱zurfa ni, bu ditrap, kpang bu nkon, nna ni na cyang ko pfong ko ka̱cyet ni ba. 21Di ba bo wwon hywaai ba̱nyet ba bu bvok bu kan-a̱naan bu tsang mba ji ba.

Currently Selected:

Pfong Ka̱za 9: kaj

Highlight

Copy

Compare