Pfong Ka̱za 20

A̱rya cyi kop

1Wwon n dyi a̱pfong Ka̱za a̱yaan na̱ kyyep nyyai Tazwa a̱ breng ka̱won a̱kwado ka̱nying a̱yabyen ka an bvak nu a̱ bo shyi bu a̱gba̱ryet na̱nywa. 2A̱ bu pyyem a̱ka̱tuk nyam a̱ywu nu a̱ yet a̱kukwo ndyik u, wato Ka̱ta̱nyrang, a̱gwam a̱ka̱tuk tswa, a̱ ku rop na̱ ni yya a̱rya cyi kop. 3A̱pfong Ka̱za nu a̱ ku ta ka̱yat a̱yabyen ka, a̱ ku hweyak a̱n zzu hatimi, ho a̱ bo bu raai na̱byen ka̱sa na brak, se a̱rya cyi kop iya a̱ bu yyik, a̱wwon ba si ku kaai a̱ wwon a̱ bvwa ka̱baram ba̱cincong.

4N bo n dyi ba̱ntwam bu ba̱nyet ba a̱n swrang tazwa mba ni, ba ba̱ ryi cet ba yya shirya. N bo n dyi tswa ba̱nyet ji ba yin hywaai rot ba yin tyyei ba̱ryat Ka̱za ba bu ka̱ryong ka Yesu na̱ bu ba̱ ryi ni. Mba ba ka̱n ta̱gbok a̱ sook nyam ji bu ma̱nwwuk nji ntong ba, di ba shim ba ba̱ tyyi lamba nyam a a̱ta̱ssi ko mbvak mba ka ba. Ba ta sso a̱ shyi i dityok di ba̱gwam ni bu Yesu har a̱rya cyi kop a. 5Ba̱nyet bani mba a ni yet ka̱son ta̱za ka. (Kpikpit ba̱nyet a a̱ kwi ni a̱ shyek ba, se a̱rya cyi kop iya a̱ seyak). 6Ba̱nyet ba a̱ shyi i ba̱nyet ta̱za ka̱son ba ni a̱ byyi hok ansham bu gwai a̱ bo yet ba̱zizrak ba̱nyet Ka̱za. Dikwu a̱mba̱hwa ti bu byyi cet tazwa mba ba. Ba ni yet ba̱gado Ka̱za Ka̱za bu Yesu, a̱ bo yya dityok ti ba̱ nu har a̱rya cyi kop.

Ba pyyem Ka̱ta̱nyrang a̱ tyyi an dong

7Ki a̱rya cyi kop iya a̱ bu tyak, ba ni tun Ka̱ta̱nyrang ka a̱ wwon a jaru nu. 8Ka nwa raai nwap ka̱sa na sa̱rei, ba̱nyet Gog bu Magog. Ka̱ta̱nyrang a̱ ni ba̱ tung sa̱rei a̱ ba mi an zwang, ba ni shii ka̱tswa di jijak a a̱nyring ncen ni. 9Ba ni tyak ka̱sa ka a̱ tyong a̱ krang ka̱bvwa ka ba̱nyet Ka̱za ba ban tung ni bu ka̱nkrang ka Ka̱za ka cat i. Ma rong i kyrek nyyai ntazwa bu ba̱ hwwi ba̱sa̱rei mba. 10Ba pyyem a̱gwam a̱ka̱tuk tswa nu a̱ ba̱ raai ni a̱ ta an dudung ndong bu kibiritu, ka̱ yemi a̱mi ba ka̱n ta nyam ji ba̱ a̱tuba a̱ywu a̱ bvei diraa i diyrek Ka̱za ni. Ka̱ yemi ba nin sswa ka̱bvung mba ka̱ta̱nom bu ka̱ta̱tuk bam bu tyak.

A̱ngbom shirya nu

11N bo n dyi a̱gba̱dang a̱jijyat a̱ntwam swrang a̱gwam ba̱ a̱tuba nu a̱n swrang ni. Tazwa bu ka̱byen i tyong a̱ta̱ssi nu ka brik. 12N dyi ba̱nyet ba a̱ kwi ni, a̱cecet ba̱ a̱cwwang, ba sseng a̱ta̱ssi a̱ntwam dityok ka. Ba yrang a̱kpa na; a̱ bo yrang kpa yaan, nkpa yin yet kpa ba̱nyet byyi sucet a. Sa̱rei ba̱nyet ba a̱ ta̱za nyyai i dikwu ti ni, koyan ba ku yya shirya ba̱cicrak bu kyang a na̱ yya ni, a̱za̱n kyang a ba jem ka̱yat kpa ka ni. 13Wwon a̱yuywu a̱ ma̱n tun nkom mba na a̱ wrak. Dikwu ba a̱yabyen ba ma̱n wrak sa̱rei nkom a ba yin breng ni. Koyan ba ku yya shirya ji ba̱cicrak bu kyang a na̱ yya ni. 14Wwon ba ta Dikwu ti bu a̱yabyen ka̱yat dudung ndong ka. (Dudung ndong a a̱mi yet dikwu a̱mba̱hwa ti.) 15Sa̱rei ba̱nyet ba ba shya ba jem a̱yiyrek mba ka̱yat kpa sucet ka ni ba ba ba̱ yrik sa̱rei a̱ krok ka̱yat dudung ndong ka.

Currently Selected:

Pfong Ka̱za 20: kaj

Highlight

Copy

Compare