Pfong Ka̱za 21

Tazwa swai bu ka̱byen ka̱hwai

1N bo n dyi a̱hwai Tazwa bu a̱hwai ka̱byen. Tazwa ka̱son ji bu ka̱byen ka̱son ka a̱ ka̱n tyak, a̱yuywu ba̱shekwot a a̱ brik. 2N dyi Ka̱nkrang Ka̱za ka, a̱hwai Urushalima, ka kyyep nyyai Tazwa di Ka̱za, a̱ yet ka̱sham di ka̱neyang ka a̱ ya jyi a̱n tot nyreng ba̱ a̱ntyok nka ni. 3N hok diwan tiyaan nyyai a a̱ntwam dityok u ti hywa di cet, “Yi dii, ka̱ryi Ka̱za a̱ swat ka̱yat ba̱nyet naanini. A̱ ni swrang ba̱ mba, ba yet ba̱nyet nu. Ka̱za mbvak nka a̱ ni shyi ba̱ mba, a̱ si bo yet Ka̱za mba. 4A̱ ni ryang ba̱ssi ba a a̱ssi mba na ba̱sa̱rei. Dikwu bu nin shyi ba, di rya byyan ku bu nin shyi ba, ko ka̱nak, di ba bo ni hok dikwu ba. A̱kukwo nkyang u a̱ ka̱n seyak.”

5A̱tuba nu a̱ swrang a a̱ntwam swrang dityok u ni a̱ hywa, “Ba̱nyying n tyyi kozan nkyang tyyi a̱hwai.” A̱ si bo hywa da̱ nzuk, “Jem ba̱ryat bani rot ba yet a̱tsatsak a̱ bo yet ka̱ryong.” 6A̱ hywa, “A̱ngbom! Nzuk n yet Alfa bu Omega, ka̱son ba̱ a̱ngbom. A̱yin nu a̱ pfong na̱shyi ni na̱ ba, n ni ku nang ba̱shekwot sucet na̱ sswa bu za̱nang. 7A̱yin nu a̱ ya zwang ji ni nu a̱ ni san nkyang ani. N ni yet Ka̱za nu, na̱ yet ka̱won nzuk. 8Ma ba̱nyet ka̱wun bu ba̱nyet sang ka̱ryong, ba̱nyet yya nkyang a̱shishyi, bu ba̱nyet hywaai ba̱nyet bu ba̱kan-a̱naan, bu ba̱nyet bvok bu ba̱nyet tssup na̱za na̱yaan, bu ba̱nyet bvei diraa, ka̱ssi mba ka a̱ shyi ka̱yat dudung ndong ka bu kibiritu ni, dikwu a̱mba̱hwa ti yemi.”

A̱hwai Urushalima

9A̱wwon a̱pfong Ka̱za a̱yring ka̱yat ba̱pfong Ka̱za a̱tiyring ka a̱ breng a̱cicyi a̱tiyring a̱nying wahala a̱tiyring a̱ngbom a ni a̱ hywa da̱ nzuk, “Ba, n na̱ tyyei ka̱neyang ka a̱ yet a̱mbyring A̱truk u ni.” 10Na̱ n sook ka̱yat nTswa a̱ nat ba̱ nzuk tazwa a̱gba̱dang dihwan. A̱ si n tyyei Urushalima, Ka̱nkrang Ka̱za, ka kyyep nyyai Tazwa, ka̱bvwa Ka̱za. 11A̱ ya a̱ssi bu shii Ka̱za na. Ka̱nkrang ka a̱ ya a̱ssi di kpang da̱ra̱ja ni, da̱ni di jasfa bu a̱zizrak ma̱dubi. 12Ka̱nkrang ka a̱ byyi a̱gba̱dang ka̱tanga na̱ shii ka̱za bu na̱nu nwai a ba̱na swak bu na̱hwa, bu ba̱pfong Ka̱za swak bu ba̱hwa ba sseng i kozan ka̱nu nwai. I na̱nu nwai a ban jem a̱yiyrek sot swak bu swa nying na̱won Isreila ji. 13Kozan a̱za̱gbang a̱ byyi na̱nu nwai na̱tat: na̱tat a̱za̱gbang dityin, na̱tat a̱za̱gbang ka̱tak, na̱tat a̱za̱gbang ka̱za bu na̱tat a̱za̱gbang a̱jenshring. 14Ba nok ka̱tanga ka̱nkrang u tazwa nkpang swak bu swa, tazwa kozan nkpang ban jem diyrek a̱pfong a̱yring a̱nying A̱truk u.

15Nu a̱pfong Ka̱za nu a̱ ryat ba̱ nzuk ni a̱ byyi shan ka̱mak nying zinariya a̱ nin mak ka̱nkrang ka bu ka̱tanga nu bu na̱nu nwai nka na. 16Ka̱nkrang ka, swap nka na dibyit nka ti yin yet na̱gwut na̱naai. A̱pfong Ka̱za nu a mak di shan ka̱mak ji a̱ shya swap a ku yet a̱mel cyi kop bu cyi tsson, dibyit ti bu ka̱za ka brak ba̱rimi. 17A̱pfong Ka̱za nu a̱ bo mak ka̱tanga nu a̱ bo shya ka̱za ka̱mak ka ka yet nswak ntat ba̱ a̱kitat i ka̱mak ka na̱ yin breng ni. 18Ba yin nok ka̱tanga nu di jasfa a̱ yya ka̱nkrang ka di zinariya na̱ ya a̱ssi anye ma̱dubi. 19Ba yin nok dityin ka̱tanga ka̱nkrang ti di kpang da̱ra̱ja. Kpang ka̱son ji yin yet jasfa, a̱mba̱hwa nu a̱ yet sofiya, a̱mba̱tat u a̱ yet agat, a̱mba̱naai u a̱ yet emeral, 20a̱mba̱pfon nu a̱ yet onikit, a̱mba̱kitat u a̱ yet karniliyan, a̱mba̱tiyring u a̱ yet tsurhwang, a̱mba̱ninaai u a̱ yet beril, a̱mba̱kumbuyring u a̱ yet tofat, a̱mba̱swak u a̱ yet kirisofarat, a̱mba̱swak ba̱yring u a̱ yet jasin, a̱mba̱swak ba̱hwa nu a̱ yet amisisti. 21Sa̱rei na̱nu nwai a ba̱na swak bu na̱hwa a̱ yin yet bu lu'ulu'ai, kozan kofa ba kpo yya di lu'ulu'u a̱yring. Na̱ta̱ryen ka̱yat ka̱nkrang a sa̱rei a̱ yet zinariya, na ya a̱ssi di ma̱dubi ni.

22N dyi bat Ka̱za i ka̱nkrang ka ba, rot A̱gba̱dang A̱gwam Ka̱za ba̱ A̱truk u mba a̱ tyyi bat Ka̱za na. 23Di ka̱nkrang ka di ka bo cat nom ko hywan ba, rot shii Ka̱za na maai ka̱ sai. A̱truk u ma diccu nu a̱ yet fitila nka. 24Nwap sa̱rei ni cong i ka̱bvwa sai nka ka. Ba̱gwam ka̱sa ba sa̱rei a̱ ni ba bu shii mba na da̱ nka. 25Ba ni byyi nom yyik na̱nu nwai ka̱nkrang a ba, rot ka̱tuk ka nin shyi ka̱ yemi ba. 26Sa̱rei shii nwap a bu dityok mba ti ba ni tung a̱ ba mi i ka̱nkrang ka. 27Ma a̱shishik nkyang a̱ byyi ryen nwa ka̱yat ka̱nkrang ka ba, ko di ba̱nyet yya nkyang a̱shishyi ko ba̱nyet bvei diraa, se bu ba̱nyet ba ba jem a̱yiyrek mba na ka̱yat kpa sucet ka a̱ shyi da̱ A̱truk u ni, mba a̱ ni nwa ka̱nkrang ka.

Currently Selected:

Pfong Ka̱za 21: kaj

Highlight

Copy

Compare