Pfong Ka̱za 19

1A̱ yemi a̱ bu keyak n hok kyang anye diwan ka̱tswa ba̱nyet Tazwa, ba hywa, “Zi dyep Ka̱za! Sucet bu shii bu cet sa̱rei yet nying Ka̱za, 2rot shirya nu ji yet ka̱ryong i bu yet a̱zizrak. A̱ ka̱n tyak ba̱ a̱kan-a̱naan a̱ywu a̱ byyan ka̱sa ka ni, a̱ ku yya shirya rot a̱ hywaai ba̱kwwa Ka̱za ba.” 3Ba bo yrek na̱wan mba na a̱ hywa, “Zi dyep Ka̱za! Ncing ndong a hwwi a̱gba̱dang ka̱nkrang u ni nat tazwa har a̱ba̱da.” 4Ba̱nekwo nswak hwa bu ba̱naai ba bu nkyang nsso iya ba̱na naai i ta̱gbok i sook Ka̱za ntong, nka a̱ yin swat a a̱ntwam swat dityok u, a̱ hywa, “Amin! Zi dyep Ka̱za.”

Ba song nyreng A̱truk a

5Diwan tiyaan i bu hyok nyyai a̱ntwam swat a̱gwam u, i hywa, “Zi dyep Ka̱za njit, nyin ba̱kwwa nu ba bu ba̱nyet ba a̱ ku tyong ni, ba̱cecet bu na̱macwwang.” 6N bo n hok kyang yaan di diwan ka̱tswa ba̱nyet i ti zzang di ba̱shekwot ntying ni, i bu swat di tssak nza ni. Na̱wan na a̱ hywa, “Zi dyep Ka̱za, rot Ka̱za A̱gba̱dang A̱gwam njit nka a̱ yet a̱gwam. 7Zi song i gwai, zi ni dyep shii nu na! Rot ka̱ram nyreng A̱truk ka a̱ yya, ka̱neyang ka a̱ ka̱n ya jyi a̱ tyak. 8Ba ka̱n wrak ka̱neyang ka a̱jijyat ka̱sham a̱tro ka kup.” (Ka̱sham a̱tro kani nka a̱ yet na̱sham nkyang a ba̱nyet tssup Ka̱za ba ba yya ni)

9A̱pfong Ka̱za nu a̱ hywa da̱ nzuk, “Jem a̱nu ni: Ba̱nyet ba ba ba̱ yei song nyreng A̱truk a ni a̱ hok ansham.” A̱pfong u a̱ bo hywa da̱ nzuk, “Ba̱ryat bani a̱ yet ka̱ryong ba̱ryat Ka̱za.”

10N ta̱gbok n ni ku sook ntong, na̱ n kam a̱ hywa, “Ryok! N ma̱n shyi i dikwwa ti ba̱ nwan bu kpikpit ba̱wumbeyang bu sa̱rei ba̱nyet ba a̱ tssup ka̱ryong ka Yesu na̱ za tyyei ni. Zi dyep Ka̱za!”

Rot ba̱ryat ba Yesu na̱ tyyei ni mba a̱ brang ba̱nyet tyyei ba̱ryat Ka̱za.

A̱yin nu a̱ wrak a̱sai ntsaap u ni

11A̱wwon n ndyi Tazwa ji zi yrang, n dyi a̱sai ntsaap, a̱ntyok za̱ wrak u ba ku yei A̱ntyok tyyi rya bu Ka̱ryong. Zwang ji na̱ kwan ni bu shirya nu ji sa̱rei yet nyyi ka̱ryong. 12Tswa a̱ssi nu ji ryi anye diryem ndong. A̱ byyi nrawoni ba̱gingang diccu nu ti. Ba ku jem diyrek, ma a̱yin a̱ bvwo kyang a ti yet i ba, se ba̱ nu ba̱diyin. 13A̱tro nu na̱ kup i sa̱rei a̱ yet bu ba̱sok. Diyrek nu ti yet Diwan Ka̱za. 14Nsoja Tazwa na i ku tssup ba shyi tazwa a̱jijyat ntsaap, ba̱tro mba ba sa̱rei a̱ sai. 15Ka̱krong ya a̱ wruk ka̱nu nu ka, da̱ nka na̱ nin za na̱byen na. A̱ ni yya dityok mba di shan ntswam. A̱ ni yet a̱gwam mba di cet. A̱ ni hywu a̱nap ka̱bvwa ka ban hywu ba̱shekwot a̱nap a̱ka̱tuk diryen A̱gba̱dang A̱gwam Ka̱za ni. 16Tazwa a̱tro nu ka bu byit tak nu ji ban jem, “A̱gwam ba̱gwam ba̱ A̱tyyi ba̱tyyi.”

17N bo n dyi a̱pfong Ka̱za a̱yaan na̱ sseng a̱katyyi nom. A̱ yrek diwan nu ti ntazwa a̱ hywa di sa̱rei na̱non na a̱ hwwut i, “Yi tung ba i song a̱swa nu Ka̱za ka ni ya yya mi ni. 18Yi ba i ya dinam ba̱gwam, bu dinam ba̱gwam nzwang bu nsoja, bu dinam ntsaap bu ba̱nyet ba a̱ za̱ ban ni, bu dinam ba̱kwwa bu ba̱nyet swat a̱ccu mba, a̱cwwang bu ba̱cecet.”

19Wwon n dyi nyam ji bu ba̱gwam ka̱sa ba ba hyok bu nsoja mba na a̱ ni kwan ba̱ a̱tuba nu a̱ wrak a̱sai ntsaap u ni bu ba̱nyet nzwang nu ba. 20Ba pyyem nyam ji a̱ si tyyi a jaru nta̱mak bu a̱tuba nu a̱ bvei diraa i diyrek Ka̱za ni, a̱ yya nkyang ka̱hat a̱ta̱ssi nyam ka ni. (Nkyang iya nna na̱n daai ba̱nyet ba a̱ byyi lamba nyam a ni, bu ba̱nyet ba a̱ kok ma̱nwwuk nyam a ntong ni.) Ba ba̱ sook ba̱ mba ba̱hwa iya a̱ ta dudung ndong a ya nta̱mak bu kibiritu ni. 21Ba hywaai nsoja mba na di ka̱krong ka a̱ wwut ka̱nu a̱tuba ka a̱ wrak a̱sai ntsaap u ni, sa̱rei na̱non na a̱ ya dinam mba ti ka̱sak ka ban cat i.

Currently Selected:

Pfong Ka̱za 19: kaj

Highlight

Copy

Compare