Pfong Ka̱za 14

A̱bvom ba̱nyet 144,000

1N si bo n cyang n dyi A̱truk u na̱ sseng tazwa dihwan ti ban yei Sihiyona nu ni, a̱ shyi bu ba̱nyet cyi kop ncyi bu nswak naai ba̱ a̱naai (144,000). Ba̱nyet iya mba a̱mi ba jem diyrek nu ti bu tinying A̱tyyi ti a na̱ta̱ssi mba na. 2N bo n hok diwan tiyaan nyyai Tazwa di ba̱shekwot ntying ni i bu swat di tssak nza ni, diwan ti i bu swat anye zinzom ba tsot. 3Brak ba yin shyi i bvom ka̱sham a̱hwai a̱bvom a̱ta̱ssi a̱ntwam swat a̱gwam ka bu nkyang nsso iya ba̱na naai bu ba̱nekwo ba. A̱yanyet a̱ maai myyam a̱bvom iya ba, se bu ba̱nyet dubu ncyi bu nswak naai bu ba̱naai iya. Mba a̱ yet ba̱nyet ba ba tun a̱ san i ka̱sa ka ni. 4Mba a̱ yet ba̱nyet ba a̱ yin ya breng zizrak ni rot ba tyyi a̱ccu mba i kan-a̱naan ba rot ba yet ba̱zizrak ba̱nyet. Mba a̱mi a̱ tssup A̱truk u koke na̱ naat. Ba yin ba̱ san nyyai di kpikpit ba̱nyet ka̱sa na, a̱ bo yet kyang-mbvak ka̱tsitsrang a ba wrak Ka̱za bu A̱truk u ni. 5Di dira ti ka̱n wruk i na̱nu mba ba, di ba byyi hywak ba.

Shaida ba̱pfong Ka̱za ba̱tat

6N dyi a̱pfong Ka̱za a̱yaan na̱ hruk ntazwa a̱ naat tyyei Ka̱sham Ba̱ryat ka̱nying wityak ka di ba̱nyet ka̱sa ba, wato, kozan nwap, bu kozan ka̱byen, sa̱rei ba̱nyet ka̱sa ba. 7Na̱ yrek diwan nu ti ba̱ ntazwa a̱ hywa, “Yi hok ka̱wun Ka̱za i bu dyep shii nka na, rot ka̱ram yya ka̱sa ka shirya a̱ ba. Yi kok a̱yin nu a̱ yya Tazwa ji bu ka̱byen bu a̱yuywu ba̱shekwot bu nrang ba̱shekwot a sa̱rei ni ntong.”

8A̱pfong Ka̱za a̱mba̱hwa a̱yaan a̱n tssup a̱ hywa, “A̱ kpa! A̱gba̱dang Babila a̱ kpa! Nu a̱ kwak sa̱rei ka̱sa ka ba kan-a̱naan ba̱ nu.”

9A̱pfong Ka̱za a̱mba̱tat a̱yaan a̱ bon tssup, a̱ yrek diwan ti ba̱ ntazwa a̱ hywa, “Sa̱rei a̱yin nu a̱ shim a̱ kok nyam jini bu ma̱nwwuk nji na ntong ni, a̱ bo shim ba ku tyyi lamba na a a̱ta̱ssi nu ka ko an bvak nu ka, 10nu diccu nu a̱ sswa diryen Ka̱za a̱ bo nwa wahala nji ni ka wrak di cet ka̱yat diryen nka ni. Sa̱rei ba̱nyet ba a̱ yya a̱mi ni a̱ ni sswa ka̱bvung ka̱yat ndong bu a̱jijyat ndong a̱ta̱ssi ba̱pfong Ka̱za ba bu A̱truk u. 11Ncing ka̱bvwa sswa ka̱bvung mba na byyi tyak ba har a̱ba̱da. Di ka̱ta̱nom di ka̱tuk, pfwi nshyi ba, di ba̱nyet ba a̱ kok nyam iya bu ma̱nwwuk nji na ntong ni bu kozan a̱yin nu a̱ byyi lamba diyrek nji na ni.”

12Yei ani yet nying gbung rya di ba̱nyet ba a̱ yet ba̱nying Ka̱za ni, ba̱nyet ba a̱ tssup truwang Ka̱za ji ni a̱ bo tyyi ndya mba na di Yesu.

13N bo n hok diwan tiyaan nyyai Tazwa ti hywa, “Jem nkyang ani: Ba̱nyet ba a̱ ri ni kwi an pfong Ka̱za nani ni a̱ byyi gwai ba̱gingang.”

Tswa Ka̱za ji i hywa, “Ee, ka̱ryong a̱mi, ba ni pfwi pfong mba na, rot zang mpfong mba ji ba̱ tssup.”

Ka̱ram cak ka a̱ yya

14N bo n cyang n dyi a̱jijyat a̱ninyyan, tazwa nu ka n bo n dyi a̱yanyet na̱ tai ka̱won a̱neywu, a̱ shyi bu rawoni zinariya diccu nu ka, a̱ breng a̱rinjyi mbvak nu ka na̱ ya ba̱gingang. 15A̱pfong Ka̱za a̱yaan a̱ hyok nyyai i bat Ka̱za na a̱ ryat ba̱ a̱ntyok swat tazwa a̱ninyyan nu a̱ hywa da̱ a̱gba̱dang diwan, “Tyyi a̱rinjyi nwan nu n cak yak a rot ka̱ram ka a̱ yya, ka̱sa ka a̱ byyeng a̱ maai cak a.” 16A̱tuba nu a̱ swat tazwa a̱ninyyan ka ni a̱ ta a̱rinjyi nu nu i ka̱sa ka a̱n cak sa̱rei ka̱sa ka.

17N bo n dyi a̱pfong Ka̱za a̱yaan na̱ wruk i bat Ka̱za na Tazwa, a̱ ma̱n breng a̱rinjyi na̱ ya ba̱gingang.

18A̱pfong Ka̱za a̱yaan, a̱tuba nu a̱ cam rong a ni, a̱ hyok nyyai ka̱rek ba̱hyum ka, a̱ hywa di cet da̱ a̱pfong Ka̱za nu a̱ breng a̱rinjyi nu na̱ ya ba̱gingang ni, “Tyyi a̱rinjyi nwan nu n cak disum a̱nap ka̱sa ti, ho ti byyeng.” 19A̱pfong Ka̱za a̱ywu a̱ ta a̱rinjyi nu nu a̱n cak sa̱rei disum a̱nap ka̱sa ti a̱ si krok ka̱bvwa hywu a̱nap diryen Ka̱za ti. 20Ba hywu a̱nap u a̱ma ka̱nkrang ka, ba̱sok a̱ tyong, swap mba na i tat a̱mel ncyi swa, kei ti i tat ka̱mak ka̱yring.

Currently Selected:

Pfong Ka̱za 14: kaj

Highlight

Copy

Compare