Pfong Ka̱za 15

Ba̱pfong Ka̱za ba̱ a̱cicyi wahala a̱tiyring

1N bo n dyi kyang yaan Tazwa. Ku yet kyang ka̱wun bu kyang ka̱hat. Ba̱pfong Ka̱za ba̱ mba a̱tiyring bu wahala ba̱nji a̱tiyring, njini yet a̱ngbom uni rot nji tyyei a̱ngbom diryen Ka̱za nu.

2N bo n dyi kyang ku tai bu kei ba̱shekwot ti yet ma̱dubi ni na̱ kyyai bu rong. N si bo n dyi ba̱nyet ba a̱ ya zwang ji bu nyam ji bu ma̱nwwuk nji na ba̱ a̱tuba nu diyrek nu ti ti shyi i lamba na ni. Ba̱nyet ya zwang iya ba sseng mbeyang kei ba̱shekwot ti yet ma̱dubi ni a̱ breng zinzom ji Ka̱za ka yin ba̱ ryi ni. 3Ba shyi bvom a̱bvom Musa a̱kwwa Ka̱za, ba̱ a̱bvom A̱truk a, a̱ yya:

“Ka̱za, A̱gba̱dang A̱gwam,

nkyang a a yya ni

na shii ba̱gingang

si bu yet nying ka̱hat!

A̱gwam na̱byen ka̱sa ba̱sa̱rei,

na̱ta̱ryen nwan na yet a̱tsatsak bu ka̱ryong sa̱rei.

4A̱nyan a̱ ni rak hok ka̱wun nwan, A̱gwam?

A̱nyan a̱ ni ton shii nwan na har a̱ rak kpo tyyei?

Nwan ba̱diyin yet a̱zizrak.

Sa̱rei na̱byen ka̱sa na a̱ ni tung

a̱ na̱ kok ntong,

rot sa̱rei ba̱nyet ba a̱ ryi a̱zizrak yya nwan nu.”

5A̱wwon n si bo n dyi bat Ka̱za na Tazwa ku yrang, bu tenti nshaida na ka̱yat nkpa. 6Ba̱pfong Ka̱za a̱tiyring ba a̱ breng wahala a̱tiyring ji ni a̱ wruk nyyai ka̱yat bat ka. Ba tssup ba̱zizrak a̱sai ba̱tro ba ya a̱ssi a̱ byyi na̱zzwan zinariya i na̱hok mba na. 7Wwon kyang nsso yring ka̱yat naai ka i wrak ba̱pfong Ka̱za a̱tiyring ba a̱cicyi a̱tiyring zinariya na ba tyyi diryen Ka̱za a̱n hywaai, Ka̱za ka a̱ byyi sucet wityak ni. 8Bat Ka̱za na i tyyi nhywat bu ncing nyyai di shii Ka̱za bu dityok nka ti, da̱ a̱yin na̱ maai nnwa i bat Ka̱za na ba se wahala a̱tiyring iya ba̱pfong Ka̱za a̱tiyring ba ba mi ni zin tyak.

Currently Selected:

Pfong Ka̱za 15: kaj

Highlight

Copy

Compare