Pfong Ka̱za 13

Nyam swa

1N bo n dyi nyam zaan zi wruk nyyai i kei ti. I byyi a̱tom swak ba̱ a̱ccu a̱tiyring. Kozan ditom nu ti rawoni n shyi; i kozan diccu nu ti brak diyrek n shyi, tintini yin pfwei Ka̱za ni. 2Nyam ji n dyi ni zi tai bu ccuk, ma a̱tak a a̱ yet a̱nying tampit, ka̱nu ka a̱ tai ka̱nying zaki. A̱ka̱tuk nyam u a̱ wrak nyam ji dityok nu ti bu cet nu na sa̱rei. 3Ka̱yat a̱ccu nyam ka, tiyring ryi di ba ka̱n ta̱ tyyi a̱gba̱dang hwot dikwu ni, ma hwot a ka̱n creng. Ba̱nyet ka̱sa ba ba̱sa̱rei a̱ ku ryi a̱ yya ka̱hat a̱ nwa kpo tssup. 4Ba̱nyet ba̱gingang a̱ kok a̱ka̱tuk nyam u ntong rot a̱ wrak nyam iya dityok nu ti, a̱ bo kok nyam ji ntong a̱ yya, “A̱nyan a̱n shyi di nyam jini ni? A̱nyan a̱ maai a̱ sseng a̱ kwan ba̱ nji?”

5Ba nang nyam iya diwat zi ya cin i bu pfwei Ka̱za i bu yya cet nji har nhywan nswak naai ba̱ hwa. 6I nwa byat Ka̱za bu diyrek nka ti bu ka̱bvwa shyi nka ka bu sa̱rei ba̱nyet ba a̱ shyi tazwa ka ni. 7Ba yen za̱ wwon zi kwan bu ba̱nyet Ka̱za ba i bu ba̱ ya, i byyi cet tazwa kozan ka̱byen bu kozan nwap bu kozan byin. 8Sa̱rei ba̱nyet ka̱sa ba a̱ ni tssup nyam ji, ba̱nyet ba dama a̱yiyrek mba na ba yin na̱ jem ba ka̱yat kpa sucet ka nyyai ka̱ram ka ba yin yya ka̱sa ka ni ba. Kpa na byyi a̱yiyrek ba̱nyet sso na ni nkpa yet nying A̱truk a ba yin hywat i.

9“A̱ntyok a̱pfo a̱ hok ansham. 10A̱yin nu a̱ yet a̱tuba nu ba ni pyyem a̱ tyyi i dikwwa ni, dolet na̱ nat dikwwa iya. A̱yin nu a̱ ma̱n kpa dikwu ka̱krong iya ni, dolet se ba ku hywat di ka̱krong iya. Yei ani yet nying gbung rya bu ntyyi rya di ba̱nyet ba a̱ yet ba̱nying Ka̱za ni.”

11N bo n dyi nyam zaan zi wwut nyyai ka̱byen. I byyi a̱tom a̱hwa da̱ a̱truk i. Ba̱ryat nji ba a̱ swat da̱ a̱ka̱tuk nyam ni. 12A̱ nwa tyyei cet nu na ba̱cicrak bu nying nyam ka̱son na a̱ta̱ssi nji. A̱ gwwak ba̱nyet swat i ka̱sa ba sa̱rei ba kok nyam ka̱son ji ntong, nying ji byyi hwot dikwu na ka̱n creng ni. 13Nyam a̱mba̱hwa jini i yya nkyang ka̱wun, i tyyi rong ku wwut nyyai Tazwa cong zzwam ka̱byen a a̱ssi ba̱nyet ba̱sa̱rei. 14I raai ba̱nyet ba di nkyang ka̱wun na ba ku wwon na̱ yya a a̱ssi nyam ka̱tsitsrang ji ni. A̱ tyyi ba̱nyet ka̱sa ba a̱ nok ma̱nwwuk nyam ji ba za̱ tyyi hwot dikwu na ma zi kaat i. 15Ba bo wwon nyam a̱mba̱hwa ji i hywwak ma̱nwwuk nyam ka̱tsitsrang sso, ku gi ryat i gi bu hywaai ba̱nyet ba a̱ rak kpo kok ntong a ni. 16Nyam ji i tyyi koyan dolet ba ku tyyi lamba an bvak yak nu na bu a̱ta̱ssi ka, di ba̱cecet da̱ a̱cwwang, di ba̱nyet nzwa di ba̱nyet dizot, di ba̱kwwa di ba̱nyet swat a̱ccu mba. 17A̱yin a̱ maai a̱ nwa kasuwa a̱ yya za ba, dolet se a̱ shyi bu lamba nyam a ko diyrek nyam ti.

18Ba̱ryat bani a̱ yet ba̱nying ba̱nyet a̱za̱ncyi. A̱yin nu a̱ byyi a̱tsatsak a̱huhwa ni a̱ ni hok a̱ bvwong. Lamba nyam a sseng i ka̱nu diyrek a̱neywu, lamba na i yet cyi a̱kitat bu nswak a̱kitat ba̱ a̱kitat (666).

Currently Selected:

Pfong Ka̱za 13: kaj

Highlight

Copy

Compare