Pfong Ka̱za 11

Ba̱pfong ba̱ mba ba̱hwa

1A̱wwon ba n dyi shan ka̱mak, a̱ hywa da nzuk, “Ta̱za i mai bat Ka̱za na nta̱mak bu ka̱rek ba̱hyum ka, i twang ba̱nyet ba a̱n naai Ka̱za ka ka̱yat i. 2Ma ryok mai a̱mbeyang u nta̱mak ba, rot nu a̱mi ba wwon ba̱kang nwap ba mi, ban shai ka̱nkrang Ka̱za nu a̱ bu tat nhywan 42. 3N ni tom ba̱pfong nzuk ba ba̱ mba ba̱hwa, ba ni kup ba̱kikyak ba̱tro, a̱ ba bu tyyei ba̱ryat nzuk ba, a̱n yya nnom cyi kop jring bu cyi swa bu nswak a̱kitat (1260).”

4Ba̱pfong ba̱hwa bani mba a̱ yet na̱kon zeitun na bu fitila swa ji shyi a̱ta̱ssi A̱gwam ka̱sa ka ni. 5A̱yin nu a̱ cat ba̱ bvwa ni, rong ni wruk nyyai na̱nu mba na bu hwwi ba̱ra̱ndwan mba ba; rot a̱mi a̱yin nu a̱ cat ba̱ bvwa ni a̱ ni kwu. 6Ba bo ba̱ nang cet ba hweyak tazwa ji, za i gi wi bvwa ka̱ram ka ban shyi i tyyei ba̱ryat Ka̱za ba ni. Ba bo byyi cet a̱ brak ba̱shekwot ba tyyi ba̱sok, a̱ bo ba di ka̱sa ka kozan taka̱i ka̱bvung ka̱sak ka ban cat i.

7Ka̱ram ka ban tyak tyyei ba̱ryat Ka̱za ba ni a̱ka̱tuk nyam nzaan a̱ ni wruk nyyai yabyen, a̱ bu kwan ba̱ mba, a̱ sswa cet mba a̱ ba̱ hywaai. 8Kuma nkom mba na ni myyi tazwa a̱nyring ryen a̱gba̱dang ka̱nkrang u, ka̱bvwa ka ba yin ka̱teyang A̱gwam mba nu ni. Diyrek gan ka̱nkrang iya nti yet Saduma ko Masar. 9Ba̱nyet nyyai kozan ka̱byen, nwap ba̱ a̱riryem a̱ ni cyang nkom mba na har nom ntat bu kpikpit a̱n bvwo ba ba̱ nyyak. 10Ba̱nyet ka̱sa ba sa̱rei a̱ ni gyrep dikwu mba ti. Ba ni gyrep a̱ tssop ba̱yaan di za̱nang, rot ba̱nyet tyyei ba̱ryat Ka̱za ba̱hwa bani a̱ ka̱n kwwat ka̱sa ka ka̱bvung ba̱gingang. 11Nnom ntat bu kpikpit a na bu yya Ka̱za a̱ ba̱ tom di sso, ba shyek a̱ ta̱za, sa̱rei ba̱nyet ba a̱ ba̱ ryi ni a̱ hok ka̱wun ba̱gingang. 12A̱wwon ba̱nyet tyyei ba̱ryat Ka̱za ba̱hwa iya a̱ hok diwan nyyai Tazwa ti hywa da̱ mba, “Yi wrak ba kyi!” Ba̱ra̱ndwan mba ba a̱ ba̱ cyang ba nwai a a̱ninyyan na a̱ si nat Tazwa ji. 13Bu i ka̱baram iya ka̱byen ka a̱ trim, ka̱sak ka̱yring ka̱yat swak a̱gba̱dang ka̱nkrang ka a̱ ta̱ruk, a̱ hywaai ba̱nyet cyi kop a̱tiyring (7,000). Kpikpit ba̱nyet a a̱ bvat i a̱ hok ka̱wun ba̱gingang a̱ dyep shii Ka̱za Tazwa na.

14Ka̱bvung a̱mba̱hwa ka a̱ seyak, ma a̱nzan a̱ ka̱n yya! A̱mba̱tat u a̱ bai ba̱nyying.

Digba a̱mba̱yitiyring ti

15A̱wwon A̱pfong Ka̱za a̱mba̱tiyring u a̱ si ma̱n tyyak digba nu ti, na̱wan na a̱ tyyi a̱ hywat Tazwa ji, a̱ yya, “Cet breng ka̱sa na naanini shyi an bvak A̱gwam njit bu Kristi nu nu, nu a̱ ni yya dityok ti wityak.” 16Wwon ba̱nekwo nswak nhwa bu ba̱naai a̱ swat ba̱ntwam mba ba ni a̱ta̱ssi Ka̱za ka a̱ kyrek a̱ ta̱kwut a̱ sook Ka̱za ntong 17a̱ hywa,

“A̱gba̱dang A̱gwam Ka̱za, a̱tuba nu a̱n shyi nyyai ndoson ni,

zi na̱ gwai i ka̱sak ka an sook a̱gba̱dang cet nwan nu ni,

nwan nwa dityok ti.

18Ndya nwap ka̱sa na ya,

rot diryen nwan ti wrak a̱ccu mba.

Ka̱ram yya ba̱nyet ka̱n kwi ba shirya ji a̱nka.

Ka̱ram a̱ yya a nin wrak ba̱kwwa nwan ba, ba̱nyet ba a̱ tyyei ba̱ryat nwan ba ni, zang mba ji,

bu sa̱rei ba̱nyet ba a̱ na̱ tyong ni,

da̱ a̱cwwang di ba̱cecet.

Ka̱ram a̱ yya ba nin byyan ba̱nyet ba a̱ byyan ka̱sa ka ni.”

19Ba yrang bat Ka̱za na shyi Tazwa ni, ba ryi a̱kwati nu ba yin sak rop-wwon Ka̱za nu ni. Za zi bvei na̱krong, nkyang nzaan na zzang, za zi bu tssak, ditaat ti zzwam, ka̱byen ka ka trim.

Currently Selected:

Pfong Ka̱za 11: kaj

Highlight

Copy

Compare