Pfong Ka̱za 10

A̱pfong Ka̱za bu ka̱bacincong kpa

1N bo n dyi a̱gba̱dang a̱pfong Ka̱za a̱yaan na̱ kyyep nyyai Tazwa. Na̱ ya gat da̱ a̱ninyyan a̱ rop gajimale diccu nu ka. A̱ssi nu na a̱ tai bu nom, shei a̱tak nu ji i ryi anye diryem ndong. 2Na̱ breng ka̱bacincong kpa mbvak nu ka, ka yrang, a̱ sak tak mbvuk yak nu i kei, nying bvuk myin na a̱ sak tazwa a̱kwot ka̱byen, 3a̱ yrek diwan nu ti ba̱ ntazwa, ti swat anye kun zaki. Ka̱ram ka na̱n kam yei a ni, tssak nza na ba̱nkpa a̱tiyring i ku shim mi da̱ a̱gba̱dang nkun. 4Ka̱ram ka ban krang ni n tyyi ni jem, ma diwan tiyaan i hyok nyyai Tazwa i hywa da̱ nzuk, “Nkyang ani yet nying ka̱nrang. Ryok jem kyang a tssak nza a̱tiyring a na ni ryat i ba.”

5Wwon a̱pfong Ka̱za nu n dyi na̱ sseng a̱ sak tak yring nu i kei ti ni bu yring tazwa ka̱byen ka ni a̱ yrek bvak yak nu na Tazwa 6a̱n sswa nak di Ka̱za ka a̱ byyi sso wityak ni, a̱tuba nu a̱ krok Tazwa bu ka̱byen ba̱ a̱yuywu ni bu sa̱rei nkyang a shyi ka̱yat mba ni. A̱pfong u a̱ hywa. “Ba bo ni byyan ka̱ram ba. 7Ma ki a̱pfong Ka̱za a̱mba̱tiyring u a̱ tyyak digba nu ti, Ka̱za a̱ ni yya nkyang a ka yya a̱ sak ku ri shyi i nyat i, nying na ka yin dyat a̱wwon bu ba̱kwwa nka ba ni.”

8Wwon diwan ti nyyai Tazwa ni bu hywa da̱ nzuk, “Nat si san kpa na ba yrang a̱ wwon an bvak a̱pfong Ka̱za nu a̱ sseng i kei ti bu ka̱byen ka ni.”

9N nat di a̱pfong Ka̱za nu n si hywa di na̱ n dyi ka̱bacincong kpa ka. Na̱ hywa da̱ nzuk, “Nga, kpo ya nwrang. Ka̱nu nwan ka ku ni swat ba̱nyinyyat di ditong ni, ma ku ni swat sisat ka̱hwa nwan ka.”

10N sook ka̱bacincong kpa ka mbvak nu ka n za. Ka swat ba̱nyinyyat ka̱nu nzuk ka, ma n ni kpo nwrang ni ku swat ba̱sisat ka̱hwa nzuk ka. 11Wwon ba si hywa da̱ nzuk, “Se a bu tyyei nkyang a bai tazwa nwap ka̱sa ka ni bu na̱byen bu a̱riryem bu ba̱gwam ka̱sa ba.”

Currently Selected:

Pfong Ka̱za 10: kaj

Highlight

Copy

Compare