Pfong Ka̱za 12

A̱mbyring u ba̱ a̱ka̱tuk nyam u

1A̱wwon a̱gba̱dang a̱lama nkyang ka̱hat a̱yaan a̱ bo wruk a a̱ninyyan na. A̱mbyring a̱yaan a̱ hyok, nom nkpa na̱ yin kup a̱n yya ba̱tro ba, hywan i shyi a̱ta̱hwa a̱tak nu ka, rawoni diccu nu na i byyi na̱ta̱ngwat ba̱na swak bu na̱hwa. 2Ka̱ram iya na̱ cat byin, dikwu ka̱hwa mbyin ti tyyi na̱ kun ba̱ ntazwa.

3Kyang ka̱hat yaan i bu ma̱n wruk meyang a a̱ninyyan na, a̱gba̱dang a̱shong a̱ka̱tuk nyam u ban yei dragon nu ni, ba̱ a̱ccu ba̱na a̱tiyring bu a̱tom ba̱na swak, kuma kozan diccu i byyi rawoni nti. 4Na̱ tyyi rum nu na a̱n kwwat ka̱sak ka̱yring ka̱yat a̱tat a̱nying na̱ta̱ngwat u nyyai a̱ninyyan na ni, a̱ bu krok ka̱byen. A̱ brek a̱ sseng a̱ta̱ssi a̱ra̱mbyring ka a̱ shyi i tyei a ni, a̱ tot na̱ byin ka̱won ka na̱ sook a̱n nwrang. 5A̱mbyring a̱ywu a̱ byin ka̱won ka̱seyang, ka ni yet a̱gwam ka̱sa nu sa̱rei a̱ breng ba̱nyet ba di shan ntswam. Ka̱ram ka ban byin ka̱won ka ni ba ka̱ ngap a̱ nat i ntazwa a̱ntwam dityok Ka̱za nu. 6A̱ra̱mbyring u a̱ tyong a̱ nwa ka̱yit, ka̱bvwa ka Ka̱za ka ka̱n jyi a̱wwon ba nin ku cam har a̱ bu tat nom cyi kop jring bu cyi swa bu nswak a̱kitat ni (1260).

7Zwang i ta̱kyem Tazwa. Mikailu bu ba̱pfong Ka̱za ba a̱ shyi ba̱ nu ni a̱ nwa zwang bu a̱ka̱tuk nyam a̱ywu, a̱ka̱tuk nyam u bu ba̱pfong nu ba a̱ ma̱n kwan ba̱ mba meyang. 8Mikailu bu ba̱pfong Ka̱za ba a̱ ba̱ ya; rot a̱mi ba ba̱ bvwo swrang an Tazwa ka. 9Ba yrik a̱gba̱dang nyam a̱ywu a̱ ta. Nu a̱ yet a̱kukwo ndyik u ban yei Ka̱ta̱nyrang ka ni, wato a̱gwam a̱ka̱tuk tswa. Nu a̱ raai ka̱sa ka ba̱sa̱rei. Ba yin ku nyying a̱ kyrek i, sa̱rei bu ba̱pfong nu ba.

10Wwon n hok a̱gba̱dang diwan nyyai Tazwa na̱ hywa, “Sucet ba, bu cet bu dityok Ka̱za njit ti, Kristi a̱ ma̱n tyyei cet nu na. Rot a̱ra̱ndwan ba̱wumbeyang njit u a̱ sseng a̱ta̱ssi Ka̱za ka a̱ ba̱ kyyat ka̱ta̱nom bu ka̱ta̱tuk ni ba ku nyying Tazwa ka. 11Ba ya a̱ra̱ndwan mba nu, ba̱sok A̱truk ba bu ba̱ryat ba mba ba tyyei ni a̱ ba̱ brang. Ba kwan a̱ccu mba mi ba, har a̱ sin ya tyyi i dikwu. 12Rot a̱mi Tazwa ka bu ba̱nyet ba a̱n shyi ni a̱ byyi ba̱gwai. Ma ka̱bvung a̱n shyi ka̱sa ka ba̱ a̱yuywu ba̱shekwot a, rot a̱gwam a̱ka̱tuk tswa nu a̱ kyrek a mba; kuma a̱ fwi bu diryen ba̱gingang rot a̱ bvwo ka̱baram nu ka a̱ bvat ba̱cincong.”

13Ka̱ram ka a̱ka̱tuk nyam u na̱n dyi ba ku nyying nyyai Tazwa ka a̱ ba mi ka̱byen ni, na̱ nwa nyying a̱mbyring a̱ywu a̱ byin ka̱won ka̱seyang ka ni a̱ ni pyyem. 14Ba nang a̱mbyring a̱ywu nhweyak a̱godo na̱ ga hruk a̱ nat ka̱yit ka. Ka̱ yemi na̱ bo nin swrang ba ku cam a̱ bu yya a̱rya tat bu kpikpit ka̱bvwa ka nyam ji zi nin ku shya ni ba. 15A̱ka̱tuk nyam a̱ywu a̱ bu ryi a̱mi, a̱ tun ba̱shekwot nyyai ka̱nu nu ka anye ncen ba ga sook a̱mbyring a̱ywu. 16Ma ka̱byen ka a̱ brang a̱mbyring a̱ywu a̱ yrang ka̱nu, a̱ sswa ba̱shekwot ba sa̱rei nyam ji zi yin krok i. 17A̱ka̱tuk nyam u a̱ hok diryen ba̱gingang ba̱ a̱mbyring a̱ywu, a̱ drok a̱ nat kwan bu kpikpit na̱mbvon nu na, sa̱rei ba̱nyet ba a̱ tssup ba̱ryat Ka̱za ba a̱ bu yya shaida tazwa Yesu ni. A̱ka̱tuk nyam a̱ywu a̱ brek a̱ sseng a̱mbeyang kei ka.

Currently Selected:

Pfong Ka̱za 12: kaj

Highlight

Copy

Compare