Npfong 28

Bulut a̱ nwa Malita

1To, njit ba bu wak wruk shot nat zi gyep a, ba si za tyyei di diyrek ka̱byen iya yet Malita. 2Ba̱nyet ka̱byen iya a̱ za gwai ba̱t, a̱ za kai rong rot za yin shyi bvwa, wun bu shrim ba̱t. 3Bulut na̱ bu tung nkon nzaan a̱ ni tyyi an dong, ryik yaan i hok wum ndong a i wruk bvwok Bulut mbvak i rak tun a̱nyyi na. 4Ba̱nyet ka̱byen ba ba bu ryi ryik a ku ryak an bvak Bulut a, ba hywa di ba̱yaan, “Kai! A̱yin a̱ni a̱ ssom a̱yin! Yi ryi ko na̱n shot ba̱shekwot bani shirya Ka̱za ji ri ku tssup, se ba̱ a̱ kwu.” 5Bulut a̱ gbaat ryik a a̱ rot ka̱yat ndong ka di na̱ hok hywu ko ba̱cincong ba. 6Ba shyi i hwa di ka̱bvwa ka a̱ ni mwei ko na̱ bu mak a̱ gbit a̱ kpa kom. Ma ba tot hat ka̱ram a̱ bu seyak ba ryi kyang ku ku tyyi ba, ba shei ba̱ryat mba ba a̱ hywa da̱ a̱ yet ka̱za ka̱yaan.

7Kei yaan yin shyi shishrek ka̱ yemi, i yet nyyi a̱gwam ka̱byen na, ba yin ku yei Babiliyat. Na̱ za san ansham a̱ za ryi ka̱bvwa kwai hat a̱n yya nom ntat. 8Ashe a̱tyyi Babiliyat u a̱ yya ba̱soza bu a̱ntyyak. Bulut a̱ nwa a̱ si ku sak mbvak a̱ yya a̱duwa a̱ ku creng. 9Ka̱ram ka ba bun hok ni, kpikpit ba̱nyet hywu na ka̱nkrang ka i cong ba ba̱ creng. 10Ba za tung nkyang za̱nang ba̱gingang, njit ba bu bu nwa jirgi na ni drok ba bo za tung nkyang a zi cat ka̱cyet njit kani.

Bulut a̱ nwa Rom

11Hywan tat bu seyak zi nwa jirgi Iskandariya yaan. Ku yin tyak dikwei ti ka̱ yemi i ka̱nkrang iya. Ba yin yei jirgi na “Na̱hywaai Na̱za”. 12Njit ba bu tat Sirakusa zi bvwa nom ntat ka̱ yemi. 13Njit ba bu seyak ka̱ yemi i si nwa Rigiyum, zi tsswa ka̱ yemi. Wun yaan i bu ta̱za nyyai a̱za̱gbang ka̱tak zi seyak, ka̱yat nom hwa zi si nwa Butiyoli. 14Ka̱ yemi zi shya ba̱nyet tssup ba̱yaan ba za naai zi tyak sati yring ba̱ mba. Ba̱rimi zi si nwa Rom. 15Ba̱nyet tssup ba ka̱ yemi ba bu hok bai njit a, a̱ wruk a̱ ba ka̱myim ba̱ njit hat a̱ bu tat ka̱nu Tunga A̱biya bu ka̱bvwa ka ban yei Na̱sa Na̱tat ni. Bulut na̱ bu ba̱ ryi a̱ dyep Ka̱za mi, rya nu na i brek bu myyi.

Wa'azi Bulut Rom

16Zi si nwa ka̱nkrang Rom, ba wwon Bulut na̱ swat zan ba̱diyin, se soja yring a yin ku tot i.

17Zi bu yya nom ntat, Bulut a̱ tyyi ka̱tung a̱ tom a̱ yei ba̱cecet ba̱nyet Yahuda ba a̱ yin shyi i ka̱nkrang ka ni, ba bu tung. Bulut a̱ hywa da̱ mba, “Ba̱wumbeyang, n byyi hywak a n yya ni ba, ko di ba̱nyet njit ba ko di tada nyyai di ba̱tyyi njit ba ni. Ma nzuk nuni ba pyyem a̱ rop nyyai Urushalima a̱ wrak Rom. 18Rom na n yya shirya a̱ shya n byyi hywak a maai ba n hywat ni ba. Ba cat n kaai a̱ wwon. 19Ma ba̱nyet Yahuda na ba bu rak, ku n yet dolet n naai ba ba ba̱ nzuk a̱ta̱ssi A̱gwam Rom ka. Ba di n yya kara ba̱nyet nzuk a da̱ A̱gwam Rom nu ba. 20Nkpa n byyi n nin hywa di n cat ya ryi n dyat ba̱ nyin. Rot mbyyi rya na Isreila ba byyi ni, ba nin dop di nsa̱rka̱ nani.”

21Ba hywa da̱ nu, “Zi ka̱n dyi wasika nyyai Yahudiya ba, da̱ njit ba ka̱n dyi ba̱wumbeyang nyyai ka̱ryi ba ba kara ko bu ka̱tuk nkhang tazwa nwan ba. 22Ma zi cat i hok kyang a nwan an sseng ni, rot zi bvwo ba̱nyet ko ke ba rak di cet tssup a an shyi ni.”

23Ba sak nom a ba nin mon bu Bulut ni. Nom a i bu krang ba, ba̱nyet a̱ tung ba̱gingang ka̱bvwa ka Bulut na̱ yin swat i. Nyyai a̱ta̱ntson hat ka̱tuk a̱ bu kwwat na̱ ryat ba̱ mba a̱ ba̱ zzek ba̱ryat Dityok Ka̱za. A̱ kwan a̱ kwwat ndya mba na an kyang a Yesu na̱ yet i ta ka̱rek ba̱ twang i nyyai i truwang Musa ji bu ba̱ryat ba̱nyet tyyei ba̱ryat Ka̱za ba. 24Ba̱yanyet mba a̱ shim ba̱ryat nu ba, ma ba̱yanyet a̱ rak. 25Ba kam a̱cecet bu ba̱yaan, Bulut na̱ ka̱n ba̱ tyyei kyang yring a̱ hywa, “Tswa Ka̱za ji yin dyat ka̱ryong n hywa i ba̱ryat ba Ishaya na̱ yin tyyei ba̱tyyi njit ba ni. 26Tswa Ka̱za ji yin hywa,

‘Nat si tyyei ba̱nyet ba i hywa:

Yi ni pfong-pfong da̱ nyin ba ni hok maai ba.

Yi ni cyang bu cyang di nyin ba ni ryi ba.

27Rot ndya ba̱nyet ani tyyi a̱ta̱kwu.

Ba hweyak a̱pfo mba na,

a̱ bo muk a̱ssi mba na;

ho a̱ssi mba na a̱ bu cyang,

ho a̱pfo mba na a̱ bu hok,

ho ndya mba na a̱ bu ryi bvwong,

ho ba bu brak a̱ ba da̱ nzuk

n ba̱ creng.’

28“To, yi ryi ba̱ryat sucet a̱ ka̱n nat di kpikpit nwap a. Ba ni ba̱ hok ansham.” [ 29Bulut na̱ bu hywa a̱mi, ba̱nyet Yahuda na i brak rot, a̱ ya a̱cecet a̱ naat ba̱ mba-mba.]

30Bulut a̱ shyi ka̱ryi haya a̱n swat a̱ yya a̱rya a̱hwa a̱ ssang ba̱nyet ba a̱ wwut a̱ cong da̱ nu ka̱ yemi ni. 31Na̱ yya wa'azi Dityok Ka̱za, a̱ bo ba̱ zzek ba̱ryat Yesu Kristi ba, ba di hok ka̱wun a̱yin ba a̱ ryat ba̱ set, a̱yin.

Currently Selected:

Npfong 28: kaj

Highlight

Copy