Npfong 27

Bulut a̱ pyyem ryen Rom

1Ba bu tyak a̱huhwa nu, zi ni nwa jirgi ba̱shekwot nat Italiya, ba tyyi Bulut bu na̱won a̱jaru na̱yaan an bvak kaptin a̱yaan, ba yin ku yei Yuliyat, a̱ yin yet a̱neyring ba̱kaptin Bataliya Augustat ba. 2Zi nwa jirgi ba̱shekwot nyyi Adaramitiya, ku yin bvwot tyei a̱za̱gbang na̱nkrang na̱yaan na yin shyi ka̱nu nta̱sha ba̱shekwot ka̱byen Asiya ni. I pyyem ka̱cyet, Aristakut, a̱ntyok Tasalonika i ka̱byen Makidoniya, a̱ yin shyi ba̱ njit. 3Ka̱ntson tat zi nwa Saida. Yuliyat a̱ yya Bulut nom a̱ ku wwon na̱ nat a̱ si byei ba̱rywai nu ba, ba ku ryi kyang a na̱ cat i. 4Zi drok ka̱ yemi, wun na ku za kwak bvwot i. Rot a̱mi zi brak jirgi na hyok ka̱ma̱nyyi Kubrut a̱za̱gbang u wun na kun srang ni. 5Njit ba bu byyek a̱gba̱dang kei nu a̱ yin shyi shishrek bu ka̱byen Kilikiya bu Bamfiliya ni, i si tat Mira i ka̱byen Likiya. 6Ka̱ yemi kaptin nu a̱ shya jirgi Iskandariya yaan ku naat ka̱byen Italiya, na̱n za tyyi.

7Zi tang nom bu nom zi cong jirgi na ba̱ shinshwon, se bu rwan zi sin tat shishrek bu ka̱nkrang Kinidut. Zi bu ryi wun na ku ni za bvwo ya ka̱son a̱za̱gbang a̱ywu, zi brak bu jirgi na hyok ka̱ma̱nyyi Karita shishrek bu gyep Salmoni a̱za̱gbang u wun na kun wi byyi cet i. 8Zi cong ba̱ a̱mbeyang ba̱shekwot ka di rwan zi sin tat ka̱bvwa ka̱yaan ban yei “Nta̱sha ssang jirgi ba̱shekwot.” Kan shyi shishrek bu ka̱nkrang ka ban yei Lasiya ni.

9To, zi byyan ka̱ram ba̱gingang ka̱ yemi, ka̱cyet jirgi ka a̱ ba di ka̱wun ka̱sak ka zi nin za ka̱son ni; ka̱ram a̱zumi ka ka ka̱n seyak. Bulut a̱ ba̱ tyyei 10a̱ hywa da̱ mba, “Ba̱nyet bani, n dyi ka̱cyet kani ka ni kwwat ka̱bvung bu zzwam nkyang ba̱gingang, ba bu jirgi na bu ncot a ba ma nta̱mak bu sucet ba̱nyet.” 11Ma nu kaptin nu a̱ wa san ba̱ryat a̱ntyok ruk jirgi ba, ba̱ a̱ntyok jirgi nu, a̱ rak san ba̱ryat Bulut ba. 12Kuma ba bo ryi ta̱sha iya ku myim ban swrang dikwei ti ba, rot a̱mi a̱kpok ba̱nyet a̱ wrak shawara ba seyak, shim ba si tat Finikat, ka̱bvwa sseng ka̱yaan a̱ma̱nyyi Karita, ka yin sak ka̱ssi ka za̱gbang a̱jenshring naat a̱za̱gbang ka̱za, ba si tyak dikwei ti ka̱ yemi.

A̱ka̱tuk nwun

13Wun i nwa hywap ba̱shinshwon nyyai ka̱tak, ba hwa di ba naat ba̱cicrak bu kyang a ba cat i; rot a̱mi ba kwwat da̱nywa na a̱ nwa naat ba̱shinshwon a̱mbeyang gyep ka a̱za̱gbang Karita nu. 14Ka̱baram ba̱cincong a̱ka̱tuk nwun a̱yaan a̱ hyok nyyai a̱za̱gbang dityin nu a̱ za hywak. 15Ku bu hywak jirgi na, njit ba bu ryi zi ni maai i nwa bu jirgi na a nwun na ba, zi kpo kaai wwon ku naat bu wun na. 16-17Zi si si shya ka̱bvwa ka wun na kun hywap shinshwon ni ka̱tak ka̱bama̱nyyi ka ban yei Kauda ni. Zi seyak a̱za̱gbang ka̱tak u, rwan bu rwan zi si sin kwwat cincong jirgi ji wruk i si rop a̱gba̱dang jirgi nu. Ba si zzop a̱gba̱dang jirgi nu di ndyik. Ba tyong wun na ku bu za kwwat si zzu an jijak ka̱byen Sirtit ka, ba kyrek di ka̱zwwan a̱tro jirgi ka i kpo kaai wwon ku nat bu wun na. 18A̱ka̱tuk wun nu a̱n tyyi bu ka̱ssi, ka̱ntson tat ba bvei ncot jirgi na a̱ tang a̱ta̱sa. 19Ka̱ntson tat brak ba tun nkyang jyi jirgi na mbvak mba a̱ tang i ba̱shekwot. 20Zi tang nom bu nom zi ryi ka̱nu nom ba, da̱ njit ba ryi na̱ta̱ngwat ba, wun na kun tyei ka̱ssi bu hywap di cet. Zin tun rya sa̱rei di zi ni kaat ba.

21Ba̱nyet ba a̱ bu bvwa ka̱ram ba̱gingang ba ya kyangya ba, Bulut a̱ ta̱za a̱ sseng a̱ hywa da̱ mba, “Ba̱nyet, nyin ba da ku hok kyang a n ku ryat i se njit ba ku seyak Karita ba, da̱ njit ba ku san sa̱rei nkyang njit a ku byyan ni bu nna ni ku bvwut i. 22Ma n ya naai yi ryok hok ka̱wun ba. Ko a̱tuba a̱yring ka̱yat nyin a̱ ni kwu ba. Bu jirgi na a̱mi ni byyan. 23Rot a̱ta̱tuk ryu a̱pfong Ka̱za nu n yet a̱nkaa ni, Ka̱za ka n tssup i, a̱ ku ba 24a̱ bu hywa da̱ nzuk, ‘Bulut! Ryok hok ka̱wun ba! Dolet a sseng a̱ta̱ssi A̱gwam Rom. Ka̱za ka̱nyyi pfong dizot a̱ na̱ ryi sso ba̱nyet ji shyi i jirgi na ba̱ nwan ni.’ 25Rot a̱mi, ba̱nyet bani, yi ryok hok ka̱wun ba. N wrak ka̱ryong di Ka̱za an kyang a a̱pfong Ka̱za nu na̱ ku n tyyei ni. 26Ma ba ni za yrik a̱ si krok a̱mbeyang ma̱nyyi a̱gut a̱yaan.”

27Zi yya nom swak ba̱ naai, wun na ku za jim kei Adariya ti, a̱kang ka̱ram a̱ta̱tuk ba̱nyet ruk jirgi ba a̱ hwa di zi byya shishrek bu ka̱byen. 28Ba mak kei ba̱shekwot ti ti tat ka̱mak nswak nhwa. Zi shek ba̱cincong ba bo mak a̱ shya ka̱mak swak ba̱ a̱pfon. 29Ba tyong wun na ku bu yyit jirgi na si zzu a nkpang, ba krok da̱nywa a̱naai a̱maryim jirgi ka, a̱ ma̱ yyit ka̱ntson ka bu di mbvak. 30Ba̱nyet ruk jirgi ba a̱ kwan zwang tyong, a̱ kyrek di cincong jirgi ji tazwa ba̱shekwot ka, a̱wwon a̱ yya anye ba naat kyrek da̱nywa na a̱ta̱ssi jirgi ka. 31Ma Bulut a̱ hywa di kaptin nu bu nsoja na, “Ki ba̱nyet ruk jirgi ba a̱ sseng i jirgi na ba, nyin ryen n shyi yi nin kaat ba.” 32Nsoja na bu hok a̱mi i hwak ndyik a breng cincong jirgi ji ni a̱ kaai a̱ wwon zi nat ba̱shekwot ba.

33Ka̱ntson ka bu bvat ba̱cincong a̱ tat, Bulut a̱ ba̱ naai sa̱rei mba ba yen za kyangya. A̱ hywa, “Sati hwa naani yi swat ba̱rimi, da̱ nyin ba tyyi kyang ka̱nu ba. 34Rot a̱mi, n ya naai yi ya kyangya gi kaat, rot a̱tuba a̱yring nyin dicat diccu tiyring nu ni tyet ba.” 35Na̱ bu hywa a̱mi a̱ sook kyangya na, a̱ dyep Ka̱za mi a̱ta̱ssi mba sa̱rei, a̱ nwa ya na. 36Sa̱rei mba koyan a̱ tung kap a̱ ya kyangya. 37Sa̱rei njit u yin shyi i jirgi na ni zi yin yet cyi swa bu nswak a̱tiyring ba̱ a̱kitat (276). 38Ba bu swei, a̱ trung yak a ban yei alka̱ma ni i jirgi na a̱ kwot ba̱shekwot a̱ ga ywwai swat gba̱ryet jirgi na.

Jirgi na hwwei

39Ka̱ntson ka bu tat, ba̱nyet ruk jirgi ba a̱ ryi ka̱za̱kpai ka a̱ bvwong ba; ma ba ryi ka̱rek sseng jirgi ka̱yaan ka gyep a ku yet i, ba rop ki ku myim ba ni nat bu jirgi na a̱ si kpo ta̱yik ka̱ yemi. 40Rot a̱mi ba hwak ndyik da̱nywa na a̱ ba̱ wwon i ba̱shekwot ba. A̱ si bo hwak ndyik a ban zzop nkyang bvan jirgi na ni; a̱ yrek ka̱zwwan a̱tro ka a̱ta̱ssi jirgi ka, wun na i gi za hywak nat i a̱zi gyep a. 41Ma jirgi na i si zzu agut jijak ka̱yat ba̱shekwot ka, jijak ji i pyyem ka̱ta̱ssi jirgi ka sseng i, a̱za̱gbang a̱maryim jirgi nu a̱ hwwei a̱za̱ gwo rot bu tsot ba̱shekwot a.

42Nsoja na i rop ni hywaai sa̱rei na̱won a̱jaru na, di ka̱ a̱yin mba a̱ wak a̱ shot ba. 43Ma kaptin nu a̱ cat san Bulut a̱ kaai a̱ wwon, rot a̱mi na̱n ba̱ bvwo ba̱ hywaai a, a̱ si wa kam sa̱rei, koyan a̱ bvwo diwak ni na̱ ya ka̱son a̱ take a̱ wak a̱ si byyek, 44kpikpit ba̱nyet a ka̱ a̱yin a̱ shya ka̱tako ko gwo jirgi na a̱ pyyem a̱n tssup. A̱mi sa̱rei njit zin shya shot i kei ti si nat ka̱byen ka ba̱ kinkreng.

Currently Selected:

Npfong 27: kaj

Highlight

Copy