Rom 1

Byet

1Nzuk Bulut, a̱kwwa Yesu Kristi, a̱pfong nu nu Ka̱za ka tssa a̱ yei na̱ tyyei Ka̱sham Ba̱ryat nka ka ni.

2Ba̱ryat bani a̱mi Ka̱za ka yin dyat a̱wwon nyyai gba̱gbang i na̱nu ba̱pfong nka na ba jem ka̱yat a̱kpa Ka̱za ka. 3Ba̱ryat ba shyi tazwa Ka̱won nu ka Yesu Kristi, A̱gwam njit u. I rwam a a̱ yin yet ka̱mbvon Dawuda, 4ma da̱ni di dizizrak ntswa nu tini a̱ yet Ka̱won Ka̱za. A̱ yin tyyei di cet nTswa Ka̱za na̱ yet Ka̱won Ka̱za ka̱ram ka ba yin ku hywat na̱ ta̱za nyyai a̱yabyen ka ni. 5A̱zi hywak nu a̱mi Ka̱za ka ni n dyi diwat yet a̱pfong nu ti, n ga n kwwat ba̱nyet ka̱sa ba ba̱gingang n ba mi ba san ba̱ryat nu ba a̱ bo ba̱ tssup. 6Nta̱mak ba̱ nyin ba̱nyet ba a̱ shyi Rom ka ni, nyin ba̱nyet ba Ka̱za ka yei yi yet ba̱nying Yesu Kristi ni.

7Rot a̱mi n ya jem mi, nyin ba̱nyet ba shyi Rom Ka̱za ka gwai ni, a̱ bo ya yei yi bu yet ba̱nyet ka̱tssup ba ni.

Ka̱za A̱tyyi njit bu Yesu Kristi A̱gwam njit a̱ ya wwon nda a̱ ya ryi ka̱nu-a̱tan nka ka.

Dyep

8Ka̱tsitsrang kyang ka nka yet n gwai Ka̱za mi i Yesu Kristi a̱zi hywak nyin; rot sa̱rei ka̱sa ka, nkhang a ba tsaai ni nna yet nying tyyi ndya nyin i tssup Yesu. 9Ka̱za ka n ka̱ yya dikwwa bu sa̱rei rya nzuk a i tyyei Ka̱sham Ba̱ryat tazwa Ka̱won nka ni nka a̱ yet shaida ka̱sak ka kozan ka̱ram n na ya yring 10ka̱yat a̱duwa nzuk ka ni. N ka̱ naai, ki ka shim a̱ n brang n shya diwat bu tat da̱ nyin ba̱nyying. 11N nin tyyi rya ba da̱ nyin n ga bu ya ta̱gbak yi gi tyyi cet ka̱yat tssup ka. 12Kyang a n dyat i nkpa yet: da̱ nzuk da̱ nyin zi ni ya brang n tyyi ndya njit a.

13N cat yi bvwo, ba̱wumbeyang nzuk, na̱ram ba̱gingang n ka̱n cat ba da̱ nyin, ma kozan ka̱ram kyang yaan i nyyai bu n tyyi dyem. N cat shya ba̱nyet tssup ka̱yat nyin da̱ni di n ka̱n shya an nwap nzaan ni. 14Sa̱rei di ba̱nyet tat a̱ssi di ba̱gbyik ba̱nyet, di ba̱nyet bvwo di ba̱nyet cyi n ka̱ ba̱ sook tyyi mpfwa nzuk. 15Rot a̱mi n nin tyyi rya n ya ba di Ka̱sham Ba̱ryat kani nyin ba̱nyet ba shyi Rom ka ni.

Cet Ka̱sham Ba̱ryat a

16Rot nzuk n pfong nsum n tyyei Ka̱sham Ba̱ryat ka ba. Mba a̱ yet cet Ka̱za na wwat ba̱nyet ba a̱ ka̱ ryi ndya mba na ni sucet, ka̱tsitsrang ka ba̱nyet Yahuda i si wwon kpikpit nwap a. 17Rot Ka̱sham Ba̱ryat ka a̱mi a̱ tyyang ka̱sak ka Ka̱za kan brak di ba̱nyet a̱ ya tyyi mi ni. Ku shyi i tyyi rya a̱mi, nyyai a̱ta̱tyin si tat a̱jyun. Da̱ni di ba̱ryat Ka̱za ban hywa ni, “A̱yin nu a̱ byyi ntyyi rya ni, nu a̱ ni myim Ka̱za.”

Hywak a ba̱nyet ka̱sa ba byyi ni

18Ba tyyei diryen Ka̱za nyyai Tazwa sa̱rei a̱zi ba̱nyet ba a̱ rak tssup Ka̱za a̱ si shyi bu i na̱kpot i. Mba a̱ bap ka̱ryong Ka̱za ka di na̱kpot mba na. 19Ka̱za a̱ hok diryen mba, rot kyang a yet nying bvwo tazwa Ka̱za ni ku shyi ba̱ a̱za̱ kpai assi mba. Rot Ka̱za a̱mi mbvak nka a̱ ba̱ tyyei ba̱zizrak. 20Nyyai ka̱ram ka Ka̱za ka n yya ka̱sa ka ni, ka̱yat nkyang ka ka yya ni, ba tyyei nhali nka na ka maai yet Ka̱za a̱ bo tyyei cet wityak nka na ba̱zizrak. Rot a̱mi ba bo byyi ka̱bvwa sak tak ba. 21Rot ba bvwo Ka̱za, ma di ba ka̱ ryi shii di Ka̱za ni ba, di ba ka̱ dyep ba. A̱huhwa mba nu a̱ tyyi ba̱tai, mpfwa mba na i cat bvwo. 22Ba shyi i ya cin da̱ mba a̱ yet ba̱nyet a̱za̱ncyi a̱ si wa si tyyi ba̱bvwon. 23Ba si wa brak dyep Ka̱za ka a̱ wi kwi ni a̱ tyyi a nkyang a ba̱nyet ba yya ni, nna ni tai ba̱neywu ba a̱ kwi ni, bu na̱non bu nyam bu nkyang kwang ka̱hwa ka̱byen.

24Rot a̱mi Ka̱za a̱ ba̱ kaai a̱ yrik ba yya a̱shishik nkyang u ban sak ndya mba ni, ba nwa yya nkyang nsum bu ba̱yaan. 25Ba brak a̱ wwon ka̱ryong Ka̱za ka a̱ tssup dira; a̱ wwon yya Ka̱za dikwwa bu ka̱ kok ntong a̱ wa kok nkyang a Ka̱za ka yya ni ntong, a̱ wa wwon a̱tuba nu a̱ krok nkyang iya ni, a̱tuba nu a̱ maai a̱ san a̱didyep wityak i! Amin.

26Rot nkyang a ba̱nyet ba yya ni Ka̱za a̱ ba̱ kaai a̱ wwon ba tssup a̱shishik nkyang mba nu. Har ba̱nyring a̱ wwon swat nyreng a̱ nwa ya tssup mba-mba. 27A̱mi meyang ba̱ntyok ba a̱ kaai ba̱nyring ba a̱ wwon a̱ ya tssup a̱ cat ba̱yaan ba̱t, a̱ yya a̱shishik nkyang bu ba̱yaan. Rot a̱mi ba san zang ji maai a̱ka̱tuk nkyang u ba yya ni.

28Da̱ni di ban dak bvwo Ka̱za ni, Ka̱za a̱ ma̱n ba̱ wwon ba swat ka̱yat a̱ka̱tuk hali mba; rot a̱mi ba yya nkyang a myyim ba yya ni ba. 29Sa̱rei mba ba byyi na̱kpot, di ba byyi a̱tsatsak a̱huhwa ba, ba ra̱u cat nkyang ka̱sa, a̱ byyi kozan taka̱i na̱nyan bu swam, a̱ hywaai ba̱nyet a̱ kwan zwang, a̱ bvei diraa ba̱ a̱bvun, a̱ si bo swat bu ndya byyan bu ba̱yaan. Ba si bo shwwang ba̱nyet, 30a̱ ryat ba̱yaan ninyying ba̱ryat, a̱ rak ryi Ka̱za, a̱ byat ba̱yaan, ba cyang ba̱yanyet a̱ yei kyang ba, a̱ ya yei ba̱nyet cit-yet. Kozan ka̱ram ba hwa na̱ta̱ryen na̱kpot, di ba tyong ba̱tyyi mba ba. 31Ba̱gbyik ba̱nyet, ba byyi na̱nu na̱hwa; ba̱nyet sang dizot, di ba cat ba̱nyet ba. 32Ba bvwo a̱zizrak shirya Ka̱za a̱ hywa a̱yin nu a̱ yya nkyang ani nu a̱ maai dikwu, ma ba ri yya a̱mi, har ma ba tang ba̱nyet yya ba mbyen.

Currently Selected:

Rom 1: kaj

Highlight

Copy