Npfong 19

Bulut a̱ nat Afisa

1Ka̱ram ka Apollot na̱n shyi Korinti ni Bulut a̱ kat sa̱rei na̱nkrang a a̱ shyi a̱za̱gak ka ni a̱ bu tat Afisa. A̱ bu shya ba̱nyet tssup ba̱yaan ka̱ yemi, 2a̱ ba̱ zzim, “Yi yin san Tswa Ka̱za ji ka̱ram ka yin wrak ka̱ryong ni e?”

Ba hywa, “Zi ka̱n hok kyang a ban yei Tswa Ka̱za ji ni ba ma.”

3Bulut a̱ hywa, “To, a̱nzan taka̱i baptisma ba ya yya mi?”

Ba hywa, “Baptisma Yohana a̱mi.”

4Bulut a̱ hywa, “Baptisma Yohana nu a̱ yin yet a̱nyyi yei ba̱nyet ba wwon a̱ka̱tukyya mba, na̱ tyyei ba̱nyet Yahuda na ba wrak ka̱ryong a a̱yin nu a̱ bai riryim nu ka ni; nu a̱ yet Yesu.”

5Ba bu hok a̱mi ba ba̱ yya baptisma i diyrek A̱gwam Yesu. 6Bulut a̱ ba̱ saai mbvak a̱ccu ba san Tswa Ka̱za ji a̱ nwa ryat ba̱ryat Ka̱za, a̱ bo ryat a̱riryem a̱yaan. 7Sa̱rei i shyi mba na ba yin ti yet swak bu ba̱hwa.

8Bulut a̱ yya hywan tat ka̱ yemi na̱ cong i bat a̱duwa na a̱ yya wa'azi ban bu ka̱wun a̱ ya a̱cecet ba̱ mba a̱ kwan ba̱ tyyei ba̱ryat Dityok Ka̱za. 9Ma ba̱yanyet mba a̱ hweyak a̱pfo mba na di ba san ba̱ryat ba ba, ma a̱ nwa ryat a̱ka̱tuk nkyang tazwa Ryen tssup A̱gwam Yesu a̱ta̱ssi ba̱nyet ka ba̱sa̱rei. Bulut a̱ ba̱ wwon a̱ kwwat ba̱nyet ba a̱ ka̱n san tssup a ni a̱ nat ba̱ mba a̱ ba̱ zzek kozan ka̱tuk ka̱bvwa ka Tiranat na̱n zzek ni. 10A̱ yya a̱rya a̱hwa na̱ ba̱ zzek ka̱ yemi hat sa̱rei ka̱byen Asiya ka, di ba̱nyet Yahuda di Helenawa, ba hok ba̱ryat A̱gwam Yesu ba.

Ba̱hwai Siba

11Ka̱za a̱ yya nkyang ka̱hat nzaan ba̱gingang an bvak Bulut. 12Hat nwwang ba̱tro nu bu ba̱tro ba na̱ tssup i ki ba nat i da̱ a̱ntyok nhywu ko a̱yin nu a̱ byyi a̱ka̱tuk tswa ni, a ryi hywu na ku creng, a̱ka̱tuk tswa nu a̱ bo wruk ka̱yat mba. 13Ba̱nyet Yahuda yaan na yin nwai trung a̱ka̱tuk tswa nu di ba̱nyet ba ni a̱ ma̱n cat yya na i diyrek A̱gwam Yesu. Ba hywa da̱ a̱ka̱tuk tswa nu, “N ya tyyei i diyrek Yesu ti Bulut na̱n yya wa'azi nu ni yi wruk!” 14To, a̱yanyet a̱n shyi a̱ yin yet a̱gba̱dang gado Ka̱za ba̱nyet Yahuda ba yin ku yei Siba na̱ byyi na̱won a̱tiyring. Mba meyang ba yin ta̱za a̱ yya a̱mi.

15A̱ka̱tuk tswa nu a̱ hywa da̱ mba, “N bvwo Yesu. N bo n bvwo nkhang Bulut a. Nyin hwa, ba̱nzan yi yet?”

16A̱tuba nu a̱ byyi a̱ka̱tuk tswa nu ni a̱ ta̱za a̱ ba̱ sak a̱tak zi diryen; a̱ sswa cet mba a̱ ba̱ bvei ba̱t, a̱ sam ba̱tro mba ba ba tyong a gbang nu ka bu ka̱gbyang. 17Sa̱rei ba̱nyet Yahuda na bu nwap nzaan na a̱ shyi i ka̱byen Afisa ka ni i hok, ka̱wun a̱ ba̱ pyyem ba̱t, ba nwa dyep diyrek A̱gwam Yesu ti ba̱gingang. 18Ba̱nyet tssup ba ba̱gingang a̱ wwut a̱za̱ kpai a̱ tyai nkyang a ba yya ni. 19Ba̱nyet ba̱yaan ba̱gingang ba yin yet ba̱bvok ni a̱ wwut da̱ a̱kpa bvok mba na a̱ na̱ hwwi assi ba̱nyet. Ba tung sa̱rei a̱kpa na ba hwwi ni a̱ bu shya na tat a̱gba̱dang a̱shishik nzwa nkrum. 20Taka̱i nkyang a ba yin yya ni yin tyyi ba̱ryat Ka̱za ba a̱ ya ka̱son di cet.

Ba yrek rikicyi Afisa

21Ka̱ram ka Bulut na̱ bu ntyak nkyang ani ni, a̱ rop di ka̱ krang ka̱byen Makidoniya ka bu ka̱byen Akaya a̱ ni nat Urushalima. A̱ si bo hywa, “Ki n si tat ka̱ yemi, dolet n ni nat si ryi ka̱nkrang Rom.” 22Na̱ bu tun ba̱nyet ba̱hwa ba a̱ yin cong ba̱ nu a̱ ku brang ni, Timoti bu Arastat, a̱ tom Makidoniya, a̱ bo bvwa ka̱ram ka̱byen Asiya ka.

23To, ka̱ram iya ba yrek rikicyi ba̱gingang Afisa ka rot ka̱sak ka Tssup Yesu na kun nwa ni. 24A̱ntyok pfu nkyang a̱zurfa a̱ yin shyi ban yei Dimitriyut. A̱ pfu na̱mankyang a a̱ tai bat Artamisa, ka̱za ka a̱ tai a̱ra̱mbyring ni. Nu bu ba̱nyet nu ba, pfong ani ba̱ cong di krum ba̱gingang. 25Rot a̱mi na̱ ba̱ yei ka̱rek ka̱yring bu ba̱nyet ba a̱ yya taka̱i mpfong mba na ni a̱ hywa da̱ mba, “Ba̱neywu, yi bvwo pfong ani a̱mi zin shai zwa njit ji. 26To, nyin ba pfong bu cyang kyang a a̱ntyen a̱ni Bulut na̱ yya ni. A̱ hywa di kyang a a̱yin na̱ yya ni yet ka̱za ba, na̱nu a̱ ka̱n brak ndya ba̱nyet ba̱gingang, kyi ka̱nkrang Afisa ka a̱ bvat ba̱cincong a̱ tyak ka̱byen Asiya ka. 27Se zi bvwo zi shyi ka̱bvung, ba ni byyan diyrek nza njit ti. Shim ma ka̱bvwa ka zi na tung n naai a̱gba̱dang ka̱za Artamisa nu ni a̱ ni cong a̱ bu yet kyang nom yaan ba, ba cong a̱ bu bring ka̱za ka sa̱rei ka̱byen Asiya ka tssup i, nta̱mak sa̱rei ka̱sa ka.”

28Ka̱tswa ba̱nyet ka ka bu hok ba̱ryat bani a̱ hok diryen a̱ krok nkun, a̱ hywa, “A̱yin a̱n shyi rang bu Artamisa Afisa ba!” 29Rikicyi ji tyak ka̱nkrang ka. Diba̱ra̱ntong a a̱ pyyem Gayat bu Aristakut, ba̱nyet Makidoniya ba a̱ yin cong bu Bulut ni, ba ba̱ pyyem a̱ gha ba̱ mba a̱ nat i ka̱bvwa ka̱tung ka̱nkrang ka. 30Bulut a̱ cat nwa sseng a̱ta̱ssi mba ka, ba̱nyet tssup ba a̱n ku bvwo. 31Ba̱cecet ba̱nyet ba i ka̱byen ka a̱ yet ba̱rywai nu ba ni a̱ tom a̱ ku naai di na̱ ryok teyang ka̱bvwa ka̱tung ka ba. 32Koyan ka̱bvwa ka̱tung ka a̱ tyyi ba̱ sunsung; koyan na̱ ryat bu kyang a ku ba ni, rot ba̱yanyet a̱ yin bvwo kyang a tyyi ban tung ka̱rek ka̱yring ka ni ba. 33Ba̱nyet Yahuda na a̱ tyyi Alezanda a̱ta̱ssi. Ka̱ram ka ba̱nyet ba ba bun dyi a̱mi ni, a̱ hywa da̱ nu a̱ byyi a̱bvun nu. Alezanda a̱ yrek bvak, ba̱nyet ba a̱ ga tyyi nyong da̱ ga ryat a̱ ya san. 34Ba bu ryi a̱ bvwong da̱ a̱ yet a̱ntyok ba̱nyet Yahuda, ba si bo yrek na̱wan mba na tazwa hat sa hwa, a̱ hywa, “A̱yin a̱n shyi rang bu Artamisa Afisa ba

35Malam ka̱nkrang u a̱ tyyi ba tyyi nyong. A̱ hywa da̱ mba “Nyin ba̱nyet Afisa, koyan a̱ bvwo ka̱nkrang Afisa a̱mi a̱ sak bat kok ntong Artamisa na bu kpang bvok ji yin kyrek bu kpa nyyai tazwa ka ni. 36A̱yin a̱ ni maai a̱ ton nkyang ani ba. Rot a̱mi, se yi ryok a̱suswak u. 37Ba̱nyet bani yi ba mi ni, di ba yyi kyang i bat naai Artamisa di ba hywa a̱ka̱tuk ba̱ryat tazwa ka̱za Artamisa ka ba. 38Zi byyi gwamna bu bat shirya na ba sak a̱n yya shirya an nom zaan ni. Ki Dimitriyut bu ba̱nyet mpfong nu ba a̱ byyi ba̱ryat ba̱ mba, se ba nat a̱ si yya kara mba na ka̱ yemi. 39Ma ki kyang yaan a̱mi n shyi yi cat, dolet a̱mi zi kpo jyi ka̱tung ka̱nkrang ka. 40Rot kyang a yya ka̱pfun ni, zi shyi ka̱yat ka̱bvung, rot ba za shya ba̱ a̱suswak. Njit ba byyi kyang a zi ni hywa ni tazwa a̱suswak ka ni ni ba. Njit ba ni maai wrak a̱tsatsak ba̱ryat tazwa a̱suswak kani ba.” 41Na̱ bu ryat a̱ tyak, a̱ tun ba̱nyet ba ba nat i na̱sa mba.

Currently Selected:

Npfong 19: kaj

Highlight

Copy