Npfong 20

Bulut a̱ nat Makidoniya bu Akaya

1A̱suswak u na̱ bu tyak, Bulut a̱ yei ba̱nyet tssup ba a̱ ryat ba̱ mba a̱ ba̱ ta̱gbak a̱ ba̱ byyek sak. A̱ drok a̱ nat ka̱byen Makidoniya ka 2a̱ krang ka̱byen ka a̱ ta̱gbak ba̱nyet ba di ba̱ryat ba̱gingang a̱ si seyak a̱ tat ka̱byen Akaya. 3Na̱ yya hywan tat ka̱ yemi. To, ka̱ram ka na̱n cat nat Siriya ni a̱ hok di ba̱nyet Yahuda na shyi i ku bang; rot a̱mi na̱ yya a̱huhwa a̱ brak a̱ si hyok Makidoniya. 4Subatarat a̱hwai Burut nyyai Biriya a̱ nat ba̱ nu, bu Aristakut bu Sakundut, ba yin nyyai Tasalonika, bu Gayat a̱ntyok Darba, bu Timoti, hat bu Tikikut bu Tarufimat, ba yin nyyai Asiya. 5Ba̱nyet bani a̱ yin sook ka̱son a̱ si za tot Taruwasa. 6Njit zi ma̱n drok nyyai Filibi i jirgi ba̱shekwot ka̱ram ka ban tyak dihywa ya burodi sang yisti ji ni, i si yya nom pfon i ba̱ shya Taruwasa. Zi yen swat ka̱ yemi yya nom a̱tiyring.

A̱ngbom nat Bulut Taruwasa

7To, a̱jenshring ka̱tuk A̱sa̱ba̱t zi tung ka̱rek ya jibi. Bulut a̱ nwa ryat bu ba̱nyet ba, a̱ swat a̱ ryat a̱ bo ryat har a̱katyyi a̱ta̱tuk, rot a̱ yin bvwot ka̱ntson tat ka. 8Zi yin tung i bat yaan i ka̱ryi ntazwa ka, ndong nan shyi ba̱gingang. 9Ka̱seyang ka̱yaan a̱n shyi ba yin ka̱ yei Aftikot, ka swat i taga. Bulut na̱ swat a̱ ryat, nda i sook Aftikot hat na̱ brak i taga na a̱ si kpa ka̱byen ka. A̱ yin kyrek a̱ bu kpa nyyai i bat a̱mba̱tat a. Ba nat a̱ si ku sook bu kom. 10Bulut a̱ kyrek nyyai tazwa bat ka a̱ si neyak a̱ ku krum a̱ hywa, “Yi ryok hok ka̱wun ba, a̱ ri sso.” 11A̱ brek a̱ nat tazwa bat ka ba yin shyi ni a̱ si sam burodi ba ya. Na̱ bu tyak ba̱ryat ba, ka̱ntson ka ka ka̱n tat nom ta̱kyek, na̱ drok. 12Ba cong bu ka̱seyang ka a̱ gwai, ba nat ba̱ nka ka̱ryi, ka sso.

Ba nat Militut

13Njit zi seyak nwa jirgi ba̱shekwot a di zi naat si shya Bulut ka̱yaani Asut i seyak ba̱ nu, rot da ma zi yin dyat sak na̱ ni cong da̱ tak, zi si ku shya ka̱ yemi. 14Njit ba si ku shya Asut ka i seyak ba̱ nu se Mitilini i jirgi na. 15I seyak nyyai Mitilini i ba a̱gut a̱yaan nu ban yei Kiyot ni. Ka̱ntson tat brak zi nat a̱gut u ban yei Samat u ni. Ka̱ntson tat zi si tat Militut. 16Dama Bulut a̱ yin sak a̱ ni nwa Afisa ba, a̱ ga si wi byyan ka̱ram i ka̱byen Asiya. A̱ yin gha a̱ ryi ka̱ ni maai si tat Urushalima, ba si nwa nom Pentikot a.

Bulut a̱ byyek sak bu ba̱nekwo Afisa

17Bulut a̱ tom a̱yin nyyai Militut na̱ si yei ba̱nekwo ba̱nyet tssup ba nyyai Afisa ba ba bu mon ba̱ nu. 18Ba bu ba, na̱ hywa da̱ mba, “Nyin da̱ a̱ccu nyin yi bvwo taka̱i swat a n yin swat ba̱ nyin ni, nyyai ka̱tuk ka n ni sak tak i ka̱byen Asiya ni. 19N ya sook da̱ a̱yin ni ba n ga n yya Ka̱za dikwwa, nta̱mak bu ba̱ssi ba bu ka̱bvung ka n sswa bu bang a ba̱nyet Yahuda ba n bang ni. 20Yi bu bvwo ka̱sak ka n ya nyat kyang a ni ya byyi kpungtun ni ba, ma n ya tyyang kozan kyang ba̱ kpai n bo ya tssup n ba na̱sa nyin; 21n tyyei ba̱nyet Yahuda bu kpikpit nwap a di cet ba wwon a̱ka̱tukyya mba nu a̱ brak a̱ tssup Ka̱za a̱ wrak A̱gwam Yesu ndya mba na. 22To naani, n naat Urushalima n ga n yya kyang a Tswa Ka̱za ji zi hywa da̱ n yya ni. Ma da n bvwo kyang a naat si n shya ka̱ yemi ni ba. 23Kyang a n bvwo ni, kozan ka̱nkrang n ka̱ nwa Tswa Ka̱za n tyyei di cet di ka̱bvung ba̱ a̱jaru a̱mi a̱ n tot ka̱yaan ni. 24Ma n wa n ka̱n jing sso nzuk ji, rot n cat n tyak pfong a A̱gwam Yesu na̱ n dyi n yya ni, nkpa yet n tyyei Ka̱sham Ba̱ryat tazwa za̱nang Ka̱za ji.

25“N ka̱ nwai da̱ nyin n ya yya wa'azi Dityok Ka̱za nu, ma naani n bvwo a̱yin nyin a̱ bo ni n shya a̱ ryi ba. 26Rot a̱mi ka̱pfun n ya tyyei di cet, ka̱ a̱yanyet nyin a̱ brik, nzuk n ni n byyi ka̱ta ba. 27Rot nzuk dei n ka̱ ya tyyei sa̱rei kyang a Ka̱za ka sak a̱ ni yya ni. 28Yi ya cam i bu cam ba̱nyet ba Tswa Ka̱za zi tyyi mbvak nyin ni. Yi zzek ba̱nyet tssup ba Ka̱za ka tun Ka̱won nka ka bu kwu, a̱ weyang ba̱sok tazwa mba. 29N bvwo bu drok nzuk a a̱ka̱tuk na̱bvwu a̱yit a̱ ni nwa ka̱yat nyin a̱ byyan ba̱nyet ba. 30Ka̱ram ka̱yaan a̱ bai ba̱yanyet ka̱yat nyin a̱ ni nwa bvei dira a̱ ga grap ba̱nyet tssup a̱ ba̱ kwwat a̱ tyyi ryen mba na. 31Se yi cam i bu yring ka̱sak ka n nin zzek kozan a̱neyring nyin bu ba̱ssi ba̱gingang ka̱ta̱nom bu ka̱ta̱tuk hat dirya titat.

32“Naani n ya wwon an bvak Ka̱za bu ba̱ryat ba a̱ za tyyei za̱nang nka ji ni a̱ ni ya nok yi rai a̱ bo ya ryi ka̱nu-a̱tan ka na̱ sak a̱ wwon sa̱rei ba̱nyet nu ba mi ni. 33N ka̱ n kpa swam a̱zurfa a̱yin ba ko zinariya a̱yin ko ba̱tro a̱yin ba. 34Nyin yi bvwo di mbvak nzuk ani n nin yya pfong, ba̱nyet ka̱cyet nzuk ba ba̱ nzuk zi gi shya nkyang a zi cat ni. 35N yya nkang ani n ga ya tyyei ka̱sak ka zi nin tyyi ka̱ssi, rot ntaka̱i na̱ta̱ryen ani a̱mi zi nin brang ba̱nyet zzak ncet ba, i bu na n yring diwan ba̱ryat Yesu ti na̱ yin hywa, ‘A̱ntyok wrak a̱ byyi rya sai a̱ ra̱u a̱tuba nu a̱ san ni.’ ”

36Bulut na̱ bu tyak ba̱ryat ba, a̱ ta̱gbok ba̱ mba sa̱rei ba yya a̱duwa. 37Sa̱rei mba ba krok nkun a̱ ku krum a̱ hywa da̱ nu, “Se nom yaan!” 38Ndya mba i byyan ba̱t bu kyang a Bulut na̱ hywa ni, da̱ a̱yin mba a̱ bo ni ku ryi ba. Ba ku tyyi ryen na̱ si nwa jirgi na.

Currently Selected:

Npfong 20: kaj

Highlight

Copy