Npfong 18

Bulut ka̱yat Korinti

1To ba bu tyak, Bulut a̱ drok nyyai Atina ka a̱ nat Korinti. 2A̱ si shya a̱ntyok ba̱nyet Yahuda a̱yaan ka̱ yemi, ba yin ku yei Akila, ba yin ku byin Fantat. A shyi ba̱ a̱mbyring nu ba ku yei Briskila. Ka̱ram iya ma ba ka̱n da̱de bu ba nyyai Italiya ka ba, a̱ drok ka̱ yemi rot A̱gwam Rom nu ba yin ku yei Kalaudiyat ni a̱ yin hywa di sa̱rei a̱yin nu a̱ yet ba̱nyet Yahuda ni na̱ wwon ka̱nkrang Rom ka. Bulut a̱ nat ba̱ cyang, 3a̱ si shya ba yya bu kyang yring ba̱ nu, na̱ nwa da̱ mba. Ba yin yet ba̱nyet srung a̱kpa, na̱ swat ba̱ mba ba yya pfong a. A̱ yin shai nkyangya nu na an pfong srung a̱kpa da̱ni da̱ mba ni. 4Kozan ka̱tuk A̱sa̱ba̱t na̱ cong ba sseng a̱cecet bat a̱duwa na, na̱ kwan bvan ba̱nyet Yahuda yaan bu Helenawa a̱ tyei i tssup a.

5Ka̱ram ka Sila bu Timoti ban ba nyyai Makidoniya ni, Bulut a̱ brak ka̱ssi nu ka sa̱rei a̱ tyyi a wa'azi Ka̱sham Ba̱ryat ka. A̱ tyyei ba̱nyet Yahuda na ka̱sak ka Yesu a̱mi a̱ yet Kristi nu ni. 6Ba bu rak ku hok a a̱ nwa ku ryat a̱ka̱tuk ba̱ryat, na̱ ma̱n dak a̱ ba gbaat dibvuk ba̱tro nu ti a̱ ba̱ krok i a̱ hywa, “Ki yi brik, ba̱nyiin a̱ yemi, nzuk n ni byyi ka̱ta ba. Naani n ni nat di nwap nzaan na.” 7A̱ drok a̱ si swrang ka̱ryi a̱ntyok Helenawa a̱yaan, a̱ yin tssup Ka̱za; ba ku yei Titiyut Justut; ka̱ryi nu ka a̱ bo shyi ba̱ a̱mbeyang bat a̱duwa na. 8Kirisbut a̱ san ba̱ryat ba a̱ brak a̱ nwa tssup, nu bu ba̱nyet ka̱ryi nu ba, nu a̱mi a̱ yin yet a̱gba̱dang u i bat a̱duwa na. Ba̱nyet Korinti ba̱gingang a̱ san ba̱ryat Bulut ba; a̱ nwa tssup, ba ba̱ yya baptisma.

9Ka̱tuk ka̱yaan a̱ta̱tuk Ka̱za a̱ ryat bu Bulut i ba̱zzak a̱ hywa da̱ nu, “Ryok hok ka̱wun ba, ya ka̱son bu wa'azi nu, ryok tyyi nyong ba, 10rot n shyi ba̱ nwan, a̱yin a̱n shyi a̱ ni na̱ sak bvak ba. N shyi bu ba̱nyet ba̱gingang i ka̱nkrang kani, ba yet ba̱ nyaam mi.” 11To, Bulut a̱ swrang ka̱ yemi Korinti a̱ tyak dirya bu hywan a̱kitat, a̱ ba̱ zzek ba̱ryat Ka̱za ba.

12Ka̱ram ka ban kup Galiyo na̱ yet gwamna ka̱byen Akaya nu ni, ba̱nyet Yahuda na i tung i mon ka̱nu i pyyem Bulut nat i i bat shirya na, 13a̱ si hywa, “A̱yin a̱ni a̱ kwak ba̱nyet njit ba a̱ tyei i tssup ka̱za kyang a na ni truwang njit ji zi rak ni.”

14Bulut na̱ bu na krang, Galiyo a̱ hywa di ba̱nyet Yahuda na, “N da n hywa da̱ a̱ka̱tuk kyang a̱yaan a̱mi na̱ yya, n si bu ya hok nyin ba̱nyet Yahuda. 15Ma kun yet a̱cecet tazwa ba̱ryat ba̱ a̱yiyrek bu truwang nyin ni, dolet yi brek si jyi mbvak nyin. N ni yet a̱ntyok shirya taka̱i nkyang iya ba.” 16A̱ tyyi ba ba̱ nyying ba wruk i bat shirya na. 17Sa̱rei mba ba̱nyet Yahuda na ba pyyem Sustanisu a̱gba̱dang u i bat a̱duwa na a̱ ku tsot a̱ta̱ssi bat shirya ka, ma Galiyo a̱ kula ba, ko ba̱cincong.

Ba brek a̱ ba Antakiya

18Bulut a̱ bvwa nnom ka̱ yemi Korinti bu ba̱nyet tssup ba a̱ si ba̱ wwon a̱ nwa jirgi ba̱shekwot bu Akila bu Briskila a̱ ba Siriya. Nyyai na̱ ka̱n nwa jirgi na ba, na̱ kot diccu nu ti Kankiriya rot nak a na̱ ka̱n sswa ni. 19Ba bu nat Afisa, Bulut a̱ wwon Akila bu Briskila a̱ nwa i bat a̱duwa na a̱ ya a̱cecet bu ba̱nyet Yahuda na. 20Ba̱yanyet a̱ ku naai na̱ yen bvwa nnom ba̱ mba, ma na̱ shim ba. 21Ma ka̱ram ka na̱ bvon bvwot ni a̱ hywa da̱ mba, “Ki Ka̱za a̱ shim, n bo ni brek n ba da̱ nyin.” A̱ nwa jirgi na nyyai Afisa a̱ sin kat.

22Na̱ si nwa Kaisariya a̱ seyak a̱ nat Urushalima a̱ si byyek ba̱nyet tssup ba, a̱ seyak a̱ nat Antakiya. 23Na̱ bu bvwa ka̱ram ka̱ yemi a̱ bo drok, a̱ cong a̱ krang ka̱byen Galatiya bu Firijiya a̱ ta̱gbak ba̱nyet tssup ba.

Apollot a̱ nat Afisa bu Korinti

24To, a̱ntyok ba̱nyet Yahuda a̱yaan ba yin ku yei Apollot ba yin ku byin ka̱nkrang Iskandariya, a̱ nyyai a̱ ba Afisa. A̱ yin bvwo ba̱ryat ba̱t a̱ si bo bvwo ba̱ryat Ka̱za ba ba̱gingang. 25Ba ka̱n ku zzek Ryen tssup A̱gwam Yesu na, na̱ ma̱n zzek ba̱ryat Yesu ba di ka̱ryong a̱ si ma̱n ba̱ cat ba̱t, ma bu baptisma Yohana a̱mi na̱ yin bvwo. 26A̱ nwa zzek ba̱ set i bat a̱duwa ba̱nyet Yahuda na. Akila bu Briskila ba bu ku hok, a̱ yen ku yei a̱ nat ba̱ nu ka̱ryi mba a̱ si ku zzek a̱ ku jyi nkyang nzaan i Ryen tssup Ka̱za na. 27Na̱ bu cat nat ka̱byen Akaya, kpikpit ba̱nyet tssup a Afisa a̱ ku brang a̱ ku jem wasika, ba̱nyet tssup ba ka̱yaani a̱ ga si ku san di mbvak nhwa. Na̱ si nwa a̱ brang ba̱nyet ba Ka̱za ka ba̱ ryi za̱nang nka ji ba yet ba̱nyet tssup Yesu ba ni. 28Rot a̱ yin za a̱cecet bu ba̱nyet Yahuda na di cet i ka̱zzu a̱ kwwat hankali mba na a̱ ba̱ tyyei ka̱yat ba̱ryat Ka̱za ka̱sak ka Yesu a̱mi a̱ yet Kristi ni.

Currently Selected:

Npfong 18: kaj

Highlight

Copy