Npfong 13

Ba tssa Barnabat bu Shawulu a̱ tom

1Ka̱yat ba̱nyet tssup ba a̱ yin shyi Antakiya ka ni, ba̱yanyet a̱ yin shyi a̱ yet ba̱nyet tyyei ba̱ryat Ka̱za, ba̱yanyet a̱ yet ba̱nyet zzek: Barnabat, bu Simiyan (a̱tuba nu ba yin yei A̱dindying u ni), bu Lukiyat a̱ntyok Kurane, bu Manayan (a̱tuba nu ba yin breng ka̱rek ka̱yring ba̱ A̱gwam Hirudut ni), nta̱mak bu Shawulu. 2Ka̱ram iya ba shyi i naai A̱gwam Ka̱za a̱ yya a̱zumi, Tswa Ka̱za i hywa da̱ mba, “Yi n tun Barnabat bu Shawulu ba yya pfong a n ni n ba̱ yei ni.”

3Ba yya a̱zumi a̱ yya a̱duwa, a̱ ba̱ saai mbvak a̱ si ba̱ tun ba nat.

Ba nwa Kubrut

4Mba meyang, ka̱ram ka Tswa Ka̱za zi ba̱ tom ni ba brak a̱ rot a̱ nat Salukiya, a̱ si nwa jirgi a̱ nat Kubrut, ka̱nkrang a̱katyyi ba̱shekwot. 5Ba si nwa Salamit a̱ tyyei ba̱ryat Ka̱za ba ka̱ yemi i na̱bvwa a̱duwa ba̱nyet Yahuda na; Yohana Markut na̱ shyi ba̱ mba a̱ ba̱ brang.

6Ka̱yat ka̱cyet mba ka ba si tat ka̱nkrang ka̱yaan ba n yei Bafat. Ka̱ yemi ba shya a̱yanyet, a̱ntyok ba̱nyet Yahuda a̱ bvok, ba n yei Bar-Yesu, a̱ bvei diraa i diyrek Ka̱za. 7A̱ shyi bu gwamna ka̱byen nu a̱ yet a̱rywai nu. Ba yin yei gwamna nu Sarjiyat Bulut, na̱ byyi a̱za̱ncyi ba̱t. Nu gwamna nu a̱ cat ba̱nyet Bulut a̱ ku tyyei ba̱ryat Ka̱za ba. 8To, nu, a̱ntyok bvok a̱ywu ba bo yin ku yei Alimat a̱zi Helenawa na, na̱ kwan zwang ji na̱ nin ba̱ kyyai, gwamna nu a̱ ga wi san ba̱ryat bani. 9Shawulu, nu ban yei Bulut i, na̱ shyi bu Tswa Ka̱za ba̱gingang, a̱ sook a̱ssi na a̱ sak a̱bvok a̱ywu mi, 10a̱ hywa da̱ nu, “Ka̱won A̱gwam a̱ka̱tuk tswa! A yet a̱ra̱ndwan kyang a yet a̱tsatsak ni. A yet a̱raai ba̱nyet. A byyi kyang a a tyyi a̱ta̱ssi ni ba se dira̱ntong. Kozan ka̱ram a cat brak ba̱ryat ka̱ryong A̱gwam Ka̱za ba n yya dira. 11Bvak A̱gwam Ka̱za bai a̱za̱ nwan, a ni kpa a̱tutwan, a ni yen da ka̱baram a cyang ba.”

Bu i ka̱baram ryin bu bvwu a̱ nyyai a̱ bu ku kup a̱ssi, na̱ tyong a̱ kat a̱ cat a̱yin nu a̱ ni ku kwak shan ni. 12Ka̱ram ka gwamna na̱ dyi kyang a yya ni, na̱ yya ka̱hat ba̱gingang a̱ wrak ka̱ryong i zzek mba na tazwa a̱gwam Yesu.

Bulut bu Barnabat a̱ nat Antakiya i ka̱byen Bisidiya

13Bulut bu ba̱nyet ka̱cyet nu ba a̱ drok Bafat a̱ nat i jirgi ba̱shekwot. A̱ si nwa i ka̱nkrang Barga i ka̱byen Bamfiliya. Yohana Markut a̱ ba̱ wwon a̱ brek a̱ nat Urushalima. 14Ba̱nyet Bulut a̱ bo seyak a̱ nat a̱zanson a̱ si nwa ka̱nkrang Antakiya i ka̱byen Bisidiya. Ka̱tuk A̱sa̱ba̱t a̱ wo krang a̱ ba ba nat i bat a̱duwa ba̱nyet Yahuda na a̱ si nwa a̱ swrang. 15Ba bu keyak twang kpa Musa na bu kpa ba̱nyet tyyei ba̱ryat Ka̱za na, ba̱cecet bat a̱duwa ba a̱ tom di ba̱nyet Bulut a̱ zzim a̱ hywa, “Ba̱wumbeyang, ki yi byyi ba̱ryat ba yi nin brang ba̱nyet ba ni, to, yi ryat.” 16Bulut a̱ sseng a̱ ba̱ yrek bvak ba tyyi nyong. Na̱ hywa:

“Ba̱wumbeyang nzuk ba̱nyet Yahuda nta̱mak bu kpikpit ba̱nyet a pfong ka̱wun Ka̱za a̱ shyi kyi ni, yi yrang a̱pfo n hok ansham. 17Ka̱za ba̱nyet Isreila a̱ yin tssa ba̱tyyi njit ba nyyai ka̱ram iya ba yet ba̱yecen ka̱byen Masar; a̱ ba̱ tyyi ba shii, a̱ bo ba̱ tun a̱ wruk i ka̱yat cet nu. 18A̱rya nswak naai na̱ yya hakuri ba̱ mba an tswa ka̱yit. 19A̱ si tyyi ba hywat nwap a̱tiyring i ka̱byen Kan'ana na̱ ga ba̱ ryi ka̱byen ka a̱ ni yet digado mba ni. 20Ba yya a̱rya ncyi nyaai bu nswak mpfon.

“Na̱ si bu yya a̱ ba̱ ryi ba̱nyet ba a̱ ni ba̱ yya shirya ni hat a̱ si tat ka̱ram a̱ntyok tyyei ba̱ryat Ka̱za ka ba yin yei Samuila ni. 21Ka̱ram ka ban cat a̱gwam ni Ka̱za a̱ ba̱ ryi Shawulu ka̱won Kish nyyai an sot Banyamin. Na̱ yet a̱gwam mba a̱n yya a̱rya nswak naai. 22Ka̱za a̱ bu ku tun a̱n sak Dawuda na̱ sook dityok ti. A̱ wrak shaida Dawuda a̱ hywa, ‘Dawuda ka̱won Yassa a̱ yet a̱tuba nu n ni sak rya nzuk; ba̱ a̱tuba nu a̱ cat yya kyang ani n myim ni.’ 23Yesu a̱mi a̱ yet byin Dawuda na Ka̱za ka yin tyyi da̱ ni san na̱won Isreila na, da̱ni na̱ yin dyat a̱wwon ni. 24Nyyai Yesu na̱ ka̱n nwa pfong nu na ba, Yohana a̱ yya ba̱nyet Isreila ba wa'azi bai nu na, ba wwon a̱ka̱tukyya mba nu na̱ ba̱ yya baptisma. 25Ka̱ram ka pfong Yohana kun tyyai ni na̱ tyyei ba̱nyet ba, a̱ hywa, ‘Yi hwa da̱ nzuk a̱mi n yet a̱tuba nu yi tot i e? Nzuk a̱mi ba. A̱yanyet a̱n shyi a̱ ri bai riryim nzuk, a̱tuba nu ko ryik kpatak nu n maai n ta̱kwut n byyik ba.’

26“Ba̱wumbeyang nzuk, na̱mbvon Ibrahim nta̱mak bu kpikpit ba̱nyet a pfong ka̱wun Ka̱za a̱ shyi kyi ni, njit a̱mi ba za tom di ba̱ryat ba ka̱sak ka Ka̱za kan za san ni. 27Ba̱nyet ba a̱ swat Urushalima ni bu ba̱cecet mba ba a̱ yin bvwo da̱ nu a̱ yet a̱ntyok za san nu ba. Di ba yin gane ba̱ryat ba̱nyet tyyei ba̱ryat Ka̱za ba ba na twang kozan ka̱tuk A̱sa̱ba̱t i a̱ bvwong ba. Ba hywat Yesu; nkpa tyyi ba̱ryat ba̱nyet tyyei ba̱ryat Ka̱za ba a̱n yet ka̱ryong. 28Ko ba yin dyin hywak a ba nin ku hywat i, ba tyyi Bilatut a̱ ku yya shirya dikwu. 29Ba bu tyak ku yya kozan kyang di ba̱ryat Ka̱za ba ba hywa tazwa nu ni, ba ku tun nyyai tazwa ka̱teyang ka a̱ si tyyi i ryak. 30Ma Ka̱za a̱ ku shyek na̱ ta̱za bu sucet. 31Na̱ bvwa nnom ba̱gingang na̱ ya tyyei di ba̱nyet ba a̱ yin cong ba̱ nu nyyai Galili a̱ ba Urushalima ni. Mba a̱mi a̱ yet shaida nu ji di ba̱nyet Isreila ba. 32-33Zi ya ba bu ka̱sham ba̱ryat kani. Kyang a Ka̱za ka yin dyat a̱wwon bu ba̱tyyi a̱kwop njit ba di ka ni yya ni, nkpa di na̱ za yya mi, njit na̱won mba na i yrek a na̱ yrek Yesu nyyai a̱yabyen ka ni. A̱mi ban jem ka̱yat Zabura sura hwa a̱ hywa,

‘Nwan yet Ka̱won nzuk,

Ka̱pfun n nin yet a̱tyyi nwan.’

34Kyang a Ka̱za ka yin hywa ni tazwa ku yrek nyyai a̱yabyen ka ni, di na̱ ni bwi ba:

‘Nyin, n ni ya ryi a̱zizrak ka̱nu-a̱tan nu di na̱ ni byyi kyang dam ni ba;

da̱ni di n yin dyat n wwon bu Dawuda ni.’

35A̱ bo hywa ka̱bvwa ka̱yaan,

‘A ni wwon a̱zizrak a̱kwwa nwan nu na̱ nwa ba̱nyet bwi ba ba.’

36Rot Dawuda, ka̱ram nu ka a̱ yin tssup Ka̱za, a̱ yya kyang a ka cat i, a̱ si bu kwu, ba ku nyat bu ba̱tyyi a̱kwop nu ba, rot a̱mi rwam nu na yin bwi. 37Ma a̱tuba nu Ka̱za ka yrek i, a̱ ku ryi sso ni a̱ yin bwi ba. 38-39Sa̱rei nyin ba̱wumbeyang nzuk Isreila, n cat yi bvwo wa'azi tssu a̱ka̱tukyya ji ba za yya mi ni zi za̱ shya rot Yesu. N cat yi bvwo a̱yin nu a̱ san ba̱ryat bani ni, ba ni ku san a̱ kaai a̱ wwon a̱ka̱tukyya nu, Truwang Musa yin maai san a̱yin kaai wwon ba. 40Nyin, se yi ta̱rwam ho kyang a ba̱nyet tyyei ba̱ryat Ka̱za ba ba yin dyat i bu ba a̱za̱ nyin. Ba yin hywa,

41‘Yi cyang, nyin ba̱nyet byyai ba̱nyet, yi ni yya ka̱hat si kwi!

Rot kyang a n ni yya i cei nyin na ni

yi ni shim ba,

ko a̱yin a̱ cat ya kok i ka̱sak ka kun dyi ni.’ ”

42Bulut bu Barnabat ba bu wwut i bat a̱duwa na, ba̱nyet ba a̱ naai ba bo wo brek ka̱tuk A̱sa̱ba̱t bai ka a̱ bo bu ba̱ tyyei ba̱ryat ba ba ryat i. 43Ba̱nyet ba ba bu kam i ka̱tung ka, ba̱nyet Yahuda na bu nwap nzaan na ya brak n yya ba̱nyet Yahuda na ni ba tssup Bulut bu Barnabat. Ba̱pfong ba̱hwa Yesu ba a̱ ryat ba̱ mba a̱ ba̱ ta̱gbak ban tyyi ka̱ssi a̱ cong a̱tsatsak za̱nang ji Ka̱za ka ba̱ ryi ni.

44Ka̱tuk A̱sa̱ba̱t ka a̱ wo krang, ba̱nyet ka̱nkrang ba a̱ bvat ba̱cincong bu gbit sa̱rei a̱ ba hok ba̱ryat A̱gwam Yesu ba. 45Ba̱nyet Yahuda na ba bu ryi ka̱sak ka ba̱nyet ba ban tung ni ban kpa swam, ba nwa pfwei kyang a Bulut na̱ ryat ni, a̱ ku byat. 46Ma Bulut bu Barnabat a̱ si Ba̱nyet ba ba bu kam i ka̱tung ka, ba̱nyet Yahuda na bu nwap nzaan na ya brak n yya ba̱nyet Yahuda na ni ba tssup Bulut bu Barnabat. Ba̱pfong ba̱hwa Yesu ba a̱ ryat ba̱ mba a̱ ba̱ ta̱gbak ban tyyi ka̱ssi a̱ cong a̱wa n tyyi ka̱ssi a̱ tun ka̱wun ka a̱ jing a̱ ba̱ tyyei ba̱ryat Ka̱za ba, a̱ hywa, “Ku yet dolet a̱mi zi yen yet ka̱son ya tyyei ba̱ryat Ka̱za ba. Ma ki yi ba̱ rak, da̱ nyin ba ryi yi maai san sucet ka̱u di tyyai ni ba, zi ni brek jying nwap nzaan na. 47Rot truwang ji A̱gwam Ka̱za na̱ za ryi ni zi yemi,

‘N na̱ sak a yet ka̱bvwa sai nwap zaan na wi yet ba̱nyet Yahuda ni,

a yet ryen na sa̱rei ka̱sa ka ka nin shya sucet ka̱u di tyyai ni.’ ”

48Kpikpit nwap a ba bu hok a̱mi a̱ gwai a̱ dyep ba̱ryat A̱gwam Ka̱za ba, ba̱nyet ba ba ka̱n tssa ba ni shya sucet ka̱u di tyak a ni, a̱n tyyi ndya mba.

49Ba̱ryat Ka̱za ba a̱ nat koke a̱za̱ gbang ka̱byen a̱ywu. 50Ma ba̱nyet Yahuda na i hwwut ba̱cecet ba̱nyet ka̱nkrang ba bu ba̱nyring ba a̱ maai ba̱nyet i ka̱nkrang ka ni a̱ bo yet ba̱nyet tssup Ka̱za ni. Ba nwa yya di Bulut bu Barnabat a̱ ba̱ nyying a̱ wruk i ka̱byen mba ka. 51Ba̱pfong ba a̱ gbaat dibvuk a̱kpatak mba ti a̱ tyyi ti ba̱ yet shaida, a̱ seyak a̱ nat ka̱nkrang Ikoniya. 52Ma ba̱nyet tssup ba a̱ shyi Antakiya ni a̱ shya Tswa Ka̱za a̱ hok ndya sai ba̱gingang.

Currently Selected:

Npfong 13: kaj

Highlight

Copy