Npfong 12
12
Ba ya ka̱son bu yya di ba̱nyet tssup
1Ka̱ram iya a̱gwam Hirudut a̱ nwa yya di ba̱yanyet ka̱yat ba̱nyet tssup. 2A̱ tyyi ba tyyak Yakubu a̱wumba Yohana di ka̱krong na̱ kwu. 3Na̱ bu ryi ba̱nyet Yahuda na ba hok ansham bu kyang a na̱ yya ni, na̱ ya ka̱son a̱ tyyi ba pyyem Bitut (ka̱ram kani a̱mi ba yin za burodi sang yisti a). 4Ka̱ram ka ban pyyem Bitut ni, ba ku tyyi a jaru, a̱ ku tyyi mbvak nsoja; ba̱nyet ku cam ba a̱ yet sot nyaai, kozan sot i byyi nsoja naai. Hirudut a̱ shirya ki ba keyak Swrap wwon nu a ni tyyi Bitut an shirya a̱ta̱ssi ba̱nyet. 5Rot a̱mi ba wwon Bitut a jaru, ma kpikpit ba̱nyet tssup a i tyyi ka̱ssi bu naai Ka̱za, Bitut a̱ ga shot.
Ba tun Bitut a̱ wruk i a jaru
6A̱ta̱tuk ka̱tuk ka ka̱ntson ka ni tat Hirudut a̱ wruk ba̱ nu a̱ta̱ssi ba̱nyet ka ni, Bitut na̱ shyi nda a̱katyyi ba̱nyet ba̱hwa ba a̱ ku cam i, ba ku rop di nsa̱rka̱ nhwa, ba̱yanyet ba sseng a̱ cam ka̱nu a̱jaru ka. 7Na̱ swat-swat a̱ ryi a̱pfong Ka̱za na̱ nyyai bu ka̱baram a̱ bu sseng, ka̱yat bat a̱jaru ka a̱ brak sai. A̱pfong Ka̱za nu a̱ zun Bitut a̱za̱n gwrang a̱ ku shyek, a̱ hywa da̱ nu, “Ta̱za ahwa!” Bu hywa na a̱mi na̱sa̱rka̱ na a̱ shrek an bvak nu na a̱ kpa. 8A̱pfong Ka̱za nu a̱ hywa da̱ nu, “Ya rop i rop a̱kpatak nwan na.” Bitut na̱ bu tyak, a̱pfong Ka̱za nu a̱ hywa, “Da grang a̱godo nwan nu i ba zi cong.” 9Bitut a̱ ku tssup ba si wruk a jaru nu. Ma Bitut a̱ gane ba, ki kyang a a̱pfong Ka̱za nu na̱ yya ba̱ nu ni ki ku yet ka̱ryong o. A̱ hwa ki kyang a̱mi Ka̱za ka ku tyyei ba̱zzak. 10Ba si seyak ka̱rek ka̱tsitsrang ka ba̱nyet cam a̱jaru nu ban sseng ni, a̱ bo seyak a̱mba̱hwa nu a̱ si tat ka̱nu ka a̱ byyi kofa ntswam a ba yin wwut a̱ nwai ka̱nkrang ka ni. Kofa na i yrang di bvak nkpa, ba seyak a̱ wruk. Ba pyyem ryen na, a̱ naat, bu ka̱baram a̱pfong Ka̱za nu a̱ bu mak-mak a̱ brik Bitut.
11Bitut a̱ bvwo kyang a na̱n shyi ni a̱ hywa, “N si bvwo a̱kpak a̱ssi a̱nu ni; A̱gwam Yesu a̱ tom a̱pfong Ka̱za nu nu bu n san a̱ wwon cet Hirudut bu kyang a ba̱nyet Yahuda ba cat yya ni.”
12Na̱ bu bvwo kyang a na̱n shyi ni, na̱ brak a̱ rot a̱ nat gbang Maryamu a̱naa ba̱nyet Yohana Markut. Ba̱nyet ba̱gingang ba ka̱n tung ka̱ yemi a̱ shyi i yya a̱duwa. 13Bitut a̱ si zzu kofa na, a̱kwwa ka̱neyang a̱yaan ban yei Roda a̱ ta̱kwang a̱ ba a̱ hok a̱yin nu a̱ yei ni. 14Na̱ bu hok diwan Bitut ti a̱ bvwong, ba̱gwai ba a̱ ra̱u na̱ brek ncyi a̱ si ba̱ tyyei di Bitut a̱ yemi a̱ sseng a̱ta̱sa, di na̱ yrang ka̱bvwa ka ba. 15Ba hywa da̱ nu, “A tityong jyik o?” Ma kan tyyi ka̱ssi a̱ hywa, “Ka̱ryong a̱mi!” Ba hywa, “To, a̱pfong Ka̱za nu nu a̱mi.”
16Ma Bitut a̱ ya bu ka̱son bu tsot kofa na, ba si yya a̱ ku yrang i. Ba bu ku ryi a̱ yya ka̱hat ba̱t. 17Na̱ ba̱ tyyei di bvak ba tyyi nyong. A̱ si ba̱ tyyei ka̱sak ka A̱gwam Yesu na̱n ku tun a̱ wruk i a jaru nu ni. A̱ hywa da̱ mba, “Yi tyyei Yakubu bu kpikpit ba̱wumbeyang a.” A̱ wruk a̱ ba̱ wwon a̱ nat ka̱rek ka̱yaan.
18Ka̱ntson a̱ wo tat, nsoja na cam a̱jaru nu ni i tyyi ba̱tai ba̱gingang, ba bvwo kyang a tyyi Bitut ni ba. 19Hirudut a̱ tyyi ba ku cat, ma ba ku shya ba. Rot a̱mi na̱ tyyi ba tyyi ba̱nyet cam a̱jaru ba an shirya a̱ ba̱ hywaai.
Ka̱ram iya ka bu seyak, Hirudut a̱ drok nyyai Yahudiya a̱ ye nat bvwa nnom ka̱nkrang Kaisariya.
Dikwu Hirudut
20Hirudut a̱ yya diryen ba̱t bu ba̱nyet Sur bu Saida. Ba tung ka̱nu mba a̱ tyyi ka̱yring a̱ ba da̱ nu. Ba bu shya Bilastut diccu a̱gwam ba̱pfong Hirudut ti da̱ shim kyang a ba yya ni. Ba si nat a̱ si naai Hirudut ba swat lafiya rot ka̱byen nu ka a̱mi ba yin shai kyangya mba na.
21Nom a ba tssa ni Hirudut a̱ kup ba̱tro dityok nu ba a̱ wrak a̱ swrang ka̱bvwa dityok ka, a̱ shyi i ba̱ryat ba̱ mba. 22Ba̱nyet ba a̱ tung ka̱rek ka ni a̱ krok nkun a̱ hywa, “Hok diwan ti. Diwan ka̱za a̱mi, diwan a̱neywu ba.” 23Bu ka̱baram, a̱pfong Ka̱za a̱ ku zzu, ba̱ma̱njyit a̱ ku ya a̱ hywat.
24Ba̱ryat Ka̱za ba a̱ ya ka̱son, ba̱nyet ba̱gingang a̱ hok ba̱ryat Ka̱za a̱ wrak ka̱ryong.
25Ka̱ram iya Barnabat bu Shawulu ba ka̱ si tyak kyang a ban ba̱ tom Urushalima ka ni a̱ brek bu Yohana Markut.
Currently Selected:
Npfong 12: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
