Npfong 14

Bulut bu Barnabat a Ikoniya

1A̱mi Ikoniya ka brak, Bulut bu Barnabat a̱ si nwa ka̱bvwa a̱duwa ba̱nyet Yahuda ka a̱ ryat di cet hat ba̱nyet ba̱gingang, ba yet ba̱nyet Yahuda ni bu nwap nzaan na a̱ brek a̱ nwa tssup a. 2Ma ba̱nyet Yahuda na rak tssup a ni a̱ hwwut nwap nzaan na ba brak a̱zi ba̱nyet tssup ba. 3Ba̱pfong ba̱hwa Yesu ba a̱ yen swat ka̱ yemi a̱ bvwa ka̱ram a̱ zzek ba̱nyet ba, a̱ ba̱ tyyei ba̱ryat A̱gwam Yesu ba ban bu ka̱wun. Na̱ tyyei ka̱sak ka ba̱ryat ba ba tyyei ni ba yet ba̱nyyi za̱nang nu, a̱ ba̱ jyet cet ba yya nkyang ka̱wun bu nkyang ka̱hat. 4Ba̱nyet ka̱nkrang ba a̱ ya tra a̱tswa a̱hwa, ba̱yanyet a̱za̱gbang ba̱nyet Yahuda nu bu ba̱yanyet a̱za̱gbang ba̱pfong u.

5Nwap zaan na i mon ka̱nu bu ba̱nyet Yahuda nta̱mak bu ba̱cecet mba ba ba rop ka̱nu a̱ ni yya di ba̱pfong Yesu ba a̱ ba̱ mang di kpang. 6Ba̱pfong ba a̱ hok a̱ tyong a̱ nat Listira bu Darba bu na̱mankrang a a̱ shyi ka̱byen Likoniya ni. 7Ka̱ yemi ba sin tyyei Ka̱sham Ba̱ryat ka.

Ka̱ram ka ban shyi Listira bu Darba ni

8A̱ntyok a̱yaan a̱ yin shyi Listira a̱tak nu na na kwu ba̱sa̱rei, nyyai ka̱tuk ku byin ka a̱ maai cong ba. 9Na̱ swat a̱ pfong wa'azi Bulut u. Bulut na̱ bu ryi na̱n tyyi rya nu na a̱ maai ba ku creng, na̱ ku sak a̱ssi na 10a̱ hywa di cet, “Ta̱za sseng atak nwan na.” A̱tuba a̱ywu a̱ rop a̱ hruk a̱ nwa cong kat. 11Ba̱nyet ba a̱ bu ryi kyang a Bulut na̱ yya ni, a̱ hywa di cet a diryem Likoniya ti, “Na̱za na a̱ brak a̱ tyyi ba̱neywu a̱ kyrek a̱ ba da̱ njit.” 12Ba tun Barnabat diyrek a̱n yei Zafsa, a̱ yei Bulut Hamit rot nu a̱ yin yet a̱ngwak ba̱ryat u. 13Ka̱bvwa ka̱tung ka̱za Zafsa ka a̱ yin shyi ka̱nu ka̱nkrang ka. Gado ka̱za Zafsa nu a̱ nat a̱ si pyyem ba̱ba̱jimi bu fure a̱ ba mi ka̱nu ka̱nkrang ka, nu bu ba̱nyet ba a̱ ni hwak a̱ ba̱ yya ba̱hyum.

14Barnabat bu Bulut ba bu hok kyang a ba cat yya na ni, ba sam ba̱tro mba ba a̱ tyong ncyi a̱ nwa ka̱yat ba̱nyet ka, a̱ tssap a̱ yya, 15“Ba̱nyet bani, a̱nzan a̱ ya ba yin yya a̱mi? Njit zi ma̱n yet ba̱neywu da̱ nyin ni. Zi ba a̱mi i bu ya tyyei Ka̱sham Ba̱ryat ka, yi gi brak ryok tssup a̱kpam nkyang a̱ni wwon tssup Ka̱za ka byyi sucet i, nka a̱mi a̱ yya tazwa bu ka̱byen bu kei bu sa̱rei nkyang a n shyi ka̱yat mba ni. 16Nyyai a̱ yin wwon sa̱rei nwap a ba cong taka̱i ka̱cyet a ba cat i. 17Ma kozan ka̱ram a̱ na tyyei shyi nu na a tsatsak u na̱ ya yya mi ni. A̱ ya jyet za, yak nyin na i bu tyyi i ka̱ram nkpa. A̱ ya jyet kyangya, a̱ bo tyei pfong ansham ka̱yat mpfwa nyin ka.” 18Sa̱rei bu taka̱i ba̱ryat ani ba̱pfong Yesu ba a̱ rwan, ba̱nyet iya a̱ si wa bvwa a̱n shim a̱ ryok ba̱ yya ba̱hyum ba.

19Ba̱nyet Yahuda yaan i nyyai Antakiya i ka̱byen Bisidiya bu Ikoniya a̱ brak ba̱nyet ba a̱ ya tyyi mi ba mang Bulut di kpang, a̱ ku kwak a̱ nat i ma ka̱nkrang a̱ hwa da̱ kwu. 20Ba̱nyet tssup ba ba bu tung a̱ ku krang, na̱ ta̱za a̱ brek a̱ nwa ka̱yat ka̱nkrang ka. Ka̱ntson a̱ wo tat, nu bu Barnabat ba seyak a̱ nat Darba.

Ba brek a̱ nat Antakiya

21Bulut bu Barnabat a̱ si yya wa'azi Ka̱sham Ba̱ryat i ka̱nkrang Darba, a̱ shya ba̱nyet tssup ka̱ yemi ba̱gingang. Ba brek a̱ nat Listira bu Ikoniya a̱ si seyak a̱ nat Antakiya i ka̱byen Bisidiya. 22A̱ bo si ta̱gbak ba̱nyet tssup ba ka̱ yemi ba sseng di ka̱ryong i tssup mba na. A̱ hywa da̱ mba, “Ki zi ni nwa Dityok Ka̱za ti, dolet ka̱bvung a̱n shyi zi ni sswa.” 23Kozan coc ba si nwa, a̱ ba̱ tssa ba̱nekwo ka̱yat mba, a̱ ba̱ tyyi ka̱yat a̱duwa a̱ yya a̱zumi a̱ ba̱ tyyi an bvak A̱gwam Yesu na ba ka̱n ku ryi ndya mba na ni.

24Ba bu tyak nwai na̱nkrang ka̱byen Bisidiya na a̱ seyak a̱ tat ka̱byen Bamfiliya. 25Ba tyyei ba̱ryat Ka̱za ba i Barga a̱ seyak a̱ nat ka̱tak Ataliya. 26Ka̱ yemi ba nwa jirgi ba̱shekwot a̱ nat Antakiya, ka̱ yemi ba yin ba̱ yya a̱duwa a̱ ba̱ tyyi an bvak Ka̱za ka ba̱ breng an pfong a ba ka̱n tyak i.

27Ba bu nwa Antakiya a̱ tung ba̱nyet tssup sa̱rei a̱ ba̱ tyyei kyang a Ka̱za ka yya i ka̱cyet mba ka ni, bu ka̱sak ka Ka̱za kan yrang kpikpit nwap a ryen san ba̱ryat ba ni. 28Ba yen swat a̱ ra ka̱ram ka̱ yemi bu ba̱nyet tssup ba.

Currently Selected:

Npfong 14: kaj

Highlight

Copy