2 Timoti 1

1Wasika a̱ni a̱ nyyai da̱ nzuk Bulut, a̱pfong Yesu Kristi, da̱ni di Ka̱za ka n cat a̱ n sook n yet a̱ntyok tyyei ba̱ryat sucet ba ka rop a̱wwon ni, nying na zi shya i ka̱mon njit bu Yesu Kristi ni.

2Wasika nu a̱ naat di Timoti, ka̱won nzuk ka n nin breng rya ni.

Ka̱za A̱tyyi bu A̱gwam njit Yesu Kristi a̱ na̱ ryi za̱nang ji a̱ hok dizot nwan a̱ na̱ wwon nda.

Gugwai bu ta̱gbak

3N na dyep Ka̱za nzuk ka n tssup bu rya yring ni, da̱ni n bu n shya ba̱tyyi nzuk ban yya ni. Kozan ka̱ram n na na̱ yring ka̱yat a̱duwa nzuk ka n dyep Ka̱za, ka̱ta̱tuk bu ka̱ta̱nom. 4N yring ba̱ssi nwan ba n cat n na̱ ryi, rya nzuk a i gi hok shok ba̱gingang. 5N na yring tyyi rya ka̱ryong nwan na taka̱i a a sook nyyai di Luwisa a̱naa a̱kwop nwan nu ni nta̱mak ba̱ a̱naa nwan nu Afiniki. N bvwo hat ba̱nyying ku ri shyi mpfwa nwan ka meyang. 6Rot a̱mi n na̱ yring i a ryok tyyi bvubvak bu za̱nang ji Ka̱za ka na̱ nang ni ba, nyyai ka̱ram ka n yi na̱ krok mbvak ni. 7Rot Tswa ji Ka̱za ka za ryi ni yet nying za tyei ka̱wun ba, seko zi za ryi cet bu gwai ba̱yaan bu breng a̱ccu njit ansham.

8Rot a̱mi, ryok hok nsum tyyei ba̱ryat A̱gwam Yesu ba ba, da̱ nwan ba ni hok nsum shyi a jaru nzuk a sabo bu Yesu ba, ma ka̱yat ncet ka Ka̱za a̱ ni na̱ ryi ni a mon diccu ba̱ nzuk i ka̱bvung ka n sswa rot tyyei Ka̱sham Ba̱ryat ka ni. 9Nka a̱ za san a̱ za yei zi bu yet ba̱nyet nka. Ba rot kyang a zi ka̱ yya mi ni ba, seko za̱nang nka a̱mi bu kyang a ka cat a̱za̱ njit i. Za̱nang nka a̱mi ka sak a̱ ni za ryi i ba Yesu nyyai ndoson. 10Ba̱nyying ka i ba Yesu Kristi A̱ntyok za san na a̱mi ba sin za yrang kozan kyang. Nu a̱mi a̱ san cet dikwu a̱ wrak sucet ka̱u di tyak ka̱yat Ka̱sham Ba̱ryat ka.

11Ka̱za a̱ n tssa n yet a̱pfong Yesu ba̱ a̱ntyok wa'azi i tyyei Ka̱sham Ba̱ryat nka ka. 12Nkpa n ba di sa̱rei ka̱bvung ka n sswa ni. Ma n ni pfong ba̱set, rot n bvwo a̱tuba nu n ku ryi rya nzuk a ni. N bo n bvwo a̱ maai a̱ cam sa̱rei kyang a na̱ tyyi mbvak nzuk ni hat si tat ka̱tuk iya. 13Breng ba̱ryat ka̱ryong ba n na̱ zzek ni ba yet kyang a a nin tssup ni, i wwon rya nwan na ku sseng ka̱yat tssup bu cat a zi byyi i tssup Yesu Kristi ni. 14A̱tsatsak nkyang u ba na̱ ryi cam a ni, Tswa Ka̱za ji swat ka̱yat ndya njit ka ni ni na̱ brang a na̱ san sak ansham.

15A bvwo sa̱rei ba̱nyet ba a̱ shyi i ka̱byen Asiya ka ni a̱ brak ka̱ryim a̱n sak i, nta̱mak bu Fijalat bu Harmajanat. 16Ka̱za a̱ wwon a̱gbang Unasifarat nda, rot nnu a̱ cong cincrim da̱ nzuk a̱n shrim rya, di na̱ hok nsum a n nin shyi a jaru ni ba. 17Nyyai bu i nwa nu Rom, na̱ nwa n cat koke se na̱ bun ni n shya. 18N naai Ka̱za ka bu hok dizot nu i Nom iya. Nwan ma a bvwo ba̱zizrak kyang a na̱ yi n yya mi a Afisa ka ni.

Currently Selected:

2 Timoti 1: kaj

Highlight

Copy

Compare