2 Timoti 2
2
Soja ka̱ryong nying Yesu Kristi
1Nwan ka̱won nzuk, se a sseng di cet ka̱yat za̱nang ka zi byyi i ka̱mon njit bu Yesu Kristi ni. 2N cat a sook ba̱ryat ba a yin hok n dyat a a̱pfo ba̱nyet ba̱gingang ni, i ba̱ tyyi mbvak ba̱nyet ba a ryi ba byyi ka̱ryong ni, ba̱nyet ba a̱ ma̱ ni maai a̱ zzek ba̱yanyet ni.
3Di soja Yesu Kristi ni, sswa ka̱bvung ka a̱ yet ka̱nwaan ni. 4Soja na shyi a̱ta̱ssi nzwang ni ku na kwan myim a̱kwak ka̱son nkpa nu; rot a̱mi se ku brak ka̱ryim sak a nkyang a ba̱nyet ba a̱ wi yet nsoja ba yya ni. 5A̱ntyok tyong ncyi a̱n maai ya zang a ncyi ji ba se a̱ tssup truwang ncyi ji. 6A̱ntyok keyak u a̱n tyyi ka̱ssi a̱ kap ni, nu a̱mi a̱ myim a̱ tason a̱ shya ka̱ssi nu ka i yak ka̱tsitsrang a. 7Hwa ansham kyang a n dyat ni, rot Ka̱za a̱ ni na̱ brang a kpo bvwo ba̱sa̱rei.
8Yring Yesu Kristi, a̱tuba nu a̱ nyyai an sot Dawuda ni, ba yin ku yrek nyyai a̱yabyen. Nkpa yet diccu Ka̱sham Ba̱ryat nzuk ti. 9Wa'azi Ka̱sham Ba̱ryat a̱ni a̱mi a̱ yet hywak ka̱bvung n zzop di na̱nywa da̱ a̱ka̱tuk a̱yin ni, ma ba maai a̱ rop ba̱ryat Ka̱za ba ba. 10Ma n jing diccu nzuk i sswa ka̱bvung kani rot ba̱nyet ba Ka̱za ka tssa ni, mba meyang ba ga ma̱n shya sucet a Yesu Kristi na̱ wwat ni, a̱ shya nwa dityok wityak nu ti. 11Da̱ni di hywa nani kun yet ka̱ryong ni:
“Ki zi kwi ba̱ nu,
zi ma̱ ni shya sucet ba̱ nu.
12Ki zi jing ka̱wai i sseng di cet,
zi ma̱ ni ya dityok ti ba̱ nu.
Ki zi ku ton,
nu meyang a̱ ma̱ bu za ton.
13Ko zi yet ba̱nyet ka̱ryong ba,
nu a̱ ni sseng a̱ntyok ka̱ryong
rot nu a̱ maai a̱ ton diccu nu ba.
A̱pfong ka̱ryong
14A na yring ba̱nyet nwan ba ba̱ryat bani, i ba̱ tssap a̱ta̱ssi Ka̱za ba ryok sseng an zok tazwa nkyang ka na byyi diccu ni ba. Rot ku ni ba̱ brang di kyang ba, seko ku wu byyan bu ba̱nyet ba a̱ pfong ni. 15Ntyyi ka̱ssi i yya kyang a myim Ka̱za ni da̱ a̱pfong u a̱ pfong nsum mpfong a na̱ yya ni ba, a̱tuba nu a̱ zzek ba̱ryat ka̱ryong ansham ni. 16Ninyying ba̱ryat bu ba̱nying ba a̱ yet a̱shishik ni, wruk ryen mba, rot ba wa kwak bu ba̱nyet a̱ saai zan bu Ka̱za. 17Kyang a ba zzek ni ku ryi da̱ a̱gap u a̱ ya rwam a̱yin ni. Ba̱nyet ba̱hwa ka̱yat ba̱malam iya mba a̱ yet Himanayat bu Filitut. 18Ba wwon ryen ka̱ryong a, a̱ kyyai ndya ba̱nyet tssup ba̱yaan na, a̱ zzek di ka̱ram ta̱za njit ka a̱ wa ka̱n seyak. 19Ma a̱tsatsak dityin nu Ka̱za ka tup ni a̱yin a̱n ta̱ zun ba, tazwa ka ban jem a̱nyyi ba̱ryat ani: “A̱gwam Ka̱za a̱ bvwo ba̱nyet ba a̱ yet ba̱nuu ba ni.” A̱ bo hywa, “A̱tuba nu a̱ hywa da̱ a̱ yet a̱nying A̱gwam Ka̱za ni, dolet na̱ wwon a̱ka̱tukyya.”
20A̱gba̱dang ka̱ryi, a̱cicyi a̱n shyi ba̱ a̱zi ntaka̱i, a̱yaan a̱ yet a̱nying a̱zurfa, a̱yaan a̱ yet a̱nying zinariya, a̱yaan kukon a̱mi bu dinok diryem. A̱yaan a̱ yet a̱nying a̱kpam mpfong, a̱yaan se ba shya a̱gba̱dang ka̱tung. 21To, a̱yin nu a̱ ya tssu a̱ tun a a̱ka̱tuk na̱hywak a̱ni ni, nu a̱mi Ka̱za ka ni sook a̱n yya a̱cecet nkyang, rot a̱ wrak a̱ntyok ka̱ryi nu nu diccu nu a̱ ku byyi kpungtun a kozan a̱tsatsak pfong u a̱ yet i. 22Tun rya nwan a a̱ka̱tuk a̱huhwa yet ka̱seyang, seko a tyyi rya nwan i yya ditsatsak, i wrak Ka̱za rya nwan i bu byyi cat ba̱nyet bu swat shasham, i mon diccu nwan bu ba̱nyet ba ka̱yat a̱zizrak ndya a̱ yei Ka̱za ka ba̱ brang ni. 23Ryok ssop ka̱nu a a̱bvwon ba̱ a̱gbyik a̱cecet ba; a bvwo ba na si tyak an zok. 24Ku myim a̱kwwa Ka̱za a̱ hwwon ba, seko na̱ pfong dizot ba̱nyet ba̱sa̱rei, a̱ bo yet a̱tsatsak a̱ntyok zzek di hakuri 25a̱ bvan ba̱ra̱ndwan nu ba ba̱shinshwon a̱ tyei i ryen ka̱ryong. Shim Ka̱za a̱ ba̱ brang ba wwon a̱ka̱tukyya mba nu a̱ san ka̱ryong ka 26a̱ brek a̱ nwa a̱tsatsak a̱huhwa a̱ shot a̱grung a̱gwam a̱ka̱tuk ntswa, nu a̱mi a̱ ka̱n ba̱ pyyem a̱ ba̱ gwwak a̱ tyyi ba ku yya kyang a na̱ cat i.
Currently Selected:
2 Timoti 2: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
