1 Timoti 6
6
1N cat ba̱kwwa ba a̱ pfong ba̱nyet na̱sa mba ba ansham, ho ba̱nyet a̱ bu pfwei diyrek Ka̱za bu kyang a zi zzek ni. 2Ba̱kwwa ba ba̱ntyok na̱sa mba ba ba yet ba̱nyet tssup ni, ba ryok ba̱ yya ryihywat di ho ba yet ba̱wumbeyang ba; seko ba ba̱ yya pfong di ka̱ryong, rot ba̱nyet ba a̱ ya mbvak mba na ni a̱ yet ba̱nyet tssup ba ba gwai ni.
A̱ka̱tuk zzek bu byyi zwa
Dolet a ba̱ yya wa'azi, i bu ba̱ zzek nkyang ani. 3A̱yin nu a̱ zzek kyang yaan ba̱zan ku bvwon bu ba̱ryat A̱gwam Yesu Kristi ba, bu kyang a zi zzek tazwa tssup njit ka ni, 4a̱yin a̱ywu a̱ yet bu diccu nu, di na̱ bvwo kyang ba. Kozan ka̱ram a̱ sseng ba̱ a̱ka̱tuk a̱cecet bu zok tazwa ba̱ryat. Nkyang ani cong di kyang ba, se swam ba̱yaan bu ka̱ghai bu ditok bu bang ba̱yaan. 5Ntaka̱i ba̱nyet ani sseng ba̱ a̱cecet ani, a̱huhwa mba nu a̱ ka̱n cyik a̱ tyyi zan. Ba bo bvwo ka̱ryong ka ba se bu zok ban sseng. Ba hwa di tssup Ka̱za ka ni tyyi ba shya zwa.
6Ee, ku yet ka̱ryong, a̱yin nu a̱ tssup Ka̱za di ka̱ryong ni a̱ byyi dizot ba, ki a̱ breng kyang a Ka̱za ka ku jyet i bu sai rya. 7Ko dama a̱nzan zi yin ba mi i ka̱sa ka? Kyang ba! Ki zi bu naat wwon ka̱sa ka, zi ni nat mbvak kwot. 8Rot a̱mi ki zi byyi kyangya bu ba̱tro, nkyang ani za maai. 9Ba̱nyet ba a̱ cat byyi zwa ni a̱ ya kwak bu dikpak i ka̱mak bu a̱grung, a̱ si bo nwa ka̱yat a̱bvwon a̱huhwa nu a̱ ni kwak ba̱nyet ba̱gingang a̱ si tyyi i dikwu ni. 10Cat krum nkpa yet ryen kozan taka̱i a̱ka̱tuk swat. Cat krum a̱mi n byyi ba̱yanyet ba ka̱n wwon wwat Yesu ndya mba na, a̱ ya kwwat a̱ka̱tuk byyan rya.
A̱ngbom ba̱ryat u
11Ma nwan a̱tuba nu yet a̱nying Ka̱za nu ni, ta̱rwam bu nkyang ani. Ntyyi ka̱ssi i cong a̱tsatsak ka̱cyet i yya kyang a Ka̱za ka cat i, wrak Ka̱za rya nwan na, cat Ka̱za i bu gwai ba̱nyet, yya hakuri kozan ka̱ram, i yya kozan kyang ba̱shinshwon. 12Tung cet nwan na sa̱rei n kwan zwang ji ni, wrak Ka̱za rya nwan na, i gi shya sucet wityak. Nkpa Ka̱za ka yi na̱ yei a san, ka̱ram ka a yin sseng a̱ta̱ssi ba̱nyet ba̱gingang i tyyei ka̱sak ka an wrak Yesu rya nwan na ni. 13A̱ta̱ssi Ka̱za ka a̱ wwat kozan kyang sso ni bu Yesu Kristi a̱tuba nu a̱ yin sseng a̱ta̱ssi Buntut Bilatut a̱ ryat ba̱set i, n na̱ tssap. 14Tssup truwang jini i za̱ breng ba̱ a̱zizrak rya se ka̱tuk ba A̱gwam njit Yesu Kristi. 15Ka̱za, A̱yin nu ka̱nu-a̱tan njit sa̱rei na̱ shyi da̱ nu ni, A̱gwam njit, nu a̱ bo yet A̱gwam ba̱gwam, A̱tyyi njit, a̱ ni brek da̱ nu cicrak ka̱ram ka na̱ sak i. 16Nu ba̱diyin a̱ ni wi kwu, ka̱bvwa ka na̱n shyi ni a̱ sai a̱ seyak ntat a̱yin. A̱yin a̱n shyi a̱ ka̱n maai ku ryi ba, da̱ a̱yin na̱n shyi a̱ ni ku ryi ba. Nu a̱mi a̱ byyi cet wityak; zi ni ku yya sujada har a̱ba̱da. Amin.
17Kam ba̱nyet ba a̱ byyi zwa ni ba ryok ya yet ba, ba ryok tyyi ndya mba na an zwa mba ji nying ji ni tyak bu i ka̱sa kani ni ba, ba tyyi ndya mba na i tssup Ka̱za, nka a̱ za jyet kozan kyang zi gin pfong ansham. 18Ba̱ tyyei, ba cong a̱tsatsak ka̱cyet, a̱ ga byyi shya i yya a̱tsatsak nkyang, a̱ ya gwai, a̱ ya ka nkyang a ba nbyyi ni bu ba̱yanyet. 19Ki ba yya a̱mi, ba ni sak nkyang a ni ba̱ brang a̱zanson ni; a̱mi ba nin ba a̱ shya sucet ka̱ryong.
20Timoti, ba̱ryat bani a̱ shyi an bvak nwan, ba̱ cam ansham. Ta̱rwam bu ninyying ba̱ryat ba̱nyet ba a̱ wi tssup Ka̱za ni ba̱ a̱kpam a̱cecet u ba̱yanyet ba hwa da̱ a̱ yet bvwo ni. 21Ba̱yanyet a̱ ka̱n hyong taka̱i bvwo na ni a̱ sin brak brik, a̱ wwon ryen ka̱ryong wwat Ka̱za ndya mba na.
Ka̱za a̱ ya brang ba̱sa̱rei nyin. Amin.
Currently Selected:
1 Timoti 6: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
