1 Tasaloni 3
3
Timoti a̱ nat Tasalonika
1Nnaani zi ryi zi ni maai tot a ba, zi ryi ku myim zi swrang kyi Atina ba̱ njit 2i tom Timoti, a̱wumba njit u a̱ yya pfong Ka̱za na i tyyei Ka̱sham Ba̱ryat Kristi ka ba̱ njit ni, na̱ bu ya tyyi cet rya a̱ ya brang i tyyi ndya nyin na. 3Da̱ a̱yin a̱ ryok tyyi byrep i hywak ka̱bvung a yi sswa ni ba. Yi bvwo njit ka̱bvung ka a̱ yet kyang a Ka̱za ka za shirya mi ni. 4Nyyai bu ka̱ram ka zin shyi ba̱ nyin ni, zi ya tyyei zi ni sswa ka̱bvung, ku ma̱n cong bu yet ka̱ryong; yi bvwo a̱mi. 5Nkpa n byyi n nin tom Timoti da̱ nyin na̱ ga n ba bu nkhang sseng nyin na i tssup a, rot rya nzuk a maai myyi ba. N yin hok ka̱wun ki yi ni hywop Ka̱ta̱nyrang ka a̱ ya me ni ba o, pfong njit a nat ba̱ a̱kpam.
Bulut a̱ gwai Ka̱za mi rot ka̱sham nkhang Tasaloni
6Timoti na̱ za brek bu ka̱sham nkhang ka̱sak ka yin tyyi ndya nyin i tssup a bu gwai ba̱yaan ni. A̱ bo za tyyei ka̱sak ka kozan ka̱ram yin za yring ni, i bu cat za ryi ka̱sak ka njit zi ma̱n cat ya ryi na ni. 7Rot a̱mi, ba̱wumbeyang, ko zin shyi i dizot bu ka̱bvung ni, nkhang tyyi ndya nyin na za ta̱gbak ba̱t. 8Rot nnanini zi shyi bu sso, rot yi sseng di cet ka̱yat A̱gwam Yesu. 9A̱nzan ba̱gwai zi ni gwai a̱ta̱ssi A̱gwam njit ka n tyyei sai rya njit a a̱zi hywak nyin? 10Ka̱ta̱nom bu ka̱tuk zi yya a̱duwa di rya yring i gi shya mon ba̱ nyin a̱ssi ba̱ a̱ssi, i gi shya diwat jyi nkyang a yi ryin i tyyi ndya nyin na ni.
11Nnaanini zi naai Ka̱za A̱tyyi njit u nu bu Yesu A̱gwam njit ba za jyi ryen, nna zi nin ba da̱ nyin ni. 12A̱gwam Yesu a̱ ya brang yin tyyi ka̱ssi bu gwai ba̱yaan bu sa̱rei ba̱nyet da̱ni di zin ya gwai ni. 13Zi naai na̱ ya brang yi sseng di cet, rot ka̱ram ka na̱n brek bu sa̱rei ba̱nyet ba a̱ yet ba̱nuu ba ni na̱ bu shya yi yet ba̱nyet sang hywak, ba̱zizrak ba̱nyet a̱ta̱ssi Ka̱za A̱tyyi njit.
Currently Selected:
1 Tasaloni 3: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
