1 Tasaloni 4

Swat a myim Ka̱za ni

1Ba̱wumbeyang, a̱ngbom nkyang u n byyi n ni ya tyyei ni nu a̱ yet: yi yin myyam da̱ njit ka̱sak ka yi nin cong a̱zizrak ka̱cyet i, Ka̱za a̱ ga hok ansham nyin. A̱mi yin swat nyyai ka̱ram iya. To, ba̱nyying zi ya naai hwat mbvak i diyrek Yesu A̱gwam njit, yin tyyi ka̱ssi i yya ra̱u a̱mi. 2Rot yi bvwo kyang a zi yin ya zzek ka̱yat cet Yesu A̱gwam njit i. 3Ka̱za a̱ cat yi yet ba̱zizrak ba̱nyet, yi ryok tyyi a̱ccu nyin i kan-a̱naan ba. 4Kozan a̱ra̱ntyok a̱ bvwo ka̱sak ka na̱ nin bvwa a̱mbyring a tsatsak bu zizrak ryen ni, 5da̱ a̱yin a̱ ryok bu cat hok ansham diccu nu di ba̱gbyik ba̱nyet ba a̱ cyi Ka̱za ni ba. 6Ka̱yat nkyang ka ni, da̱ a̱yin a̱ ryok yya a̱yanyet a̱ka̱tuk kyang ba, ko na̱ ku sook na̱ yet ryen yya a̱ka̱tuk. Zi yin ya tyyei di cet ka̱sak ka A̱gwam Yesu na̱ nin wrak taka̱i ba̱nyet iya ka̱bvung ni. 7Rot yi bvwo Ka̱za a̱ za yei zi cong a̱shishik ka̱cyet ba, ma yi swat a̱zizrak swat. 8A̱yin nu a̱ rak zzek ani ni a̱yin na̱ rak ba, seko Ka̱za ka ka ku ryi Tswa nka ji ni.

9Ka̱sak ka yi nin gwai ba̱nyet tssup ba̱yaan ni, a̱ yemi ku myim se ba bo ya tyyei ba, rot Ka̱za mbvak nka a̱ ya zzek ka̱sak ka yi nin gwai ba̱yaan ni. 10A̱mi yin gwai ba̱yaan sa̱rei ka̱byen Makidoniya; ma zi ya naai, ba̱wumbeyang, yi ya gwai ra̱u a̱mi. 11Yin tyyi ka̱ssi i cat swat ansham bu ba̱yaan, koyan a̱n tyyi ka̱ssi an pfong a ku shyi ni, i yya mpfong kyangya nyin na di mbvak nyin, da̱ni di zi ka̱n ya tyyei ni. 12Ki yi yya a̱mi, ba̱nyet ba a̱ yet ba̱nyet tssup ba ni ba a̱ ni ya ryi shii, da̱ nyin ba ni pyaat dissi an kyang a̱yin i swat ka̱sa nyin na ba.

Brek A̱gwam Yesu

13Ba̱wumbeyang njit, da̱ni di ba̱nyet tssup ba a̱ ka̱n kwi ni, zi cat yi bvwo ku yet kyang byyan rya da̱ nyin da̱ni di kpikpit ba̱nyet a a̱ wi shyi bu nsak rya ni ba. 14Njit zi bvwo Yesu a̱ yin kwu a̱ bvo ta̱za, a̱mi meyang ba̱nyet ba a̱ yet ba̱nyet ku tssup ba a̱ kwi ni, Ka̱za a̱ ni ba ba̱ mba bu Yesu.

15Zi ya tyyei kyang a Yesu di ka̱nu nu na̱ yin hywa ni. Nkpa yet: ka̱ram ka A̱gwam njit u na̱ nin ba ni, njit u ri shyi bu sucet i zi ni yet ka̱son ba̱nyet ka a̱ ka̱n kwi ni ba. 16Zi bu hok diwan a̱gba̱dang a̱pfong Ka̱za ti kam, ba bo tyyak digba Ka̱za ti, wwon A̱gwam njit u diccu nu a̱ kyrek nyyai Tazwa. Ba̱nyet ba a̱ ka̱n kwi ba tssup Kristi ni a̱ yet ka̱son a̱ ta̱za. 17Njit ba̱nyet ba ri shyi a̱cet i ba za sook a̱nta̱mak bu kpikpit a ka̱yat a̱ninyyan, zi si mon ba̱ A̱gwam njit u ka̱yat a̱ninyyan ka. A̱mi zi nin swrang ba̱ A̱gwam njit har a̱ba̱da. 18Rot a̱mi yi ta̱gbak ba̱yaan di ba̱ryat bani.

Currently Selected:

1 Tasaloni 4: kaj

Highlight

Copy

Compare