1 Tasaloni 2
2
Pfong Bulut a Tasalonika
1Nyin ma ba̱wumbeyang, yi bvwo ba njit a da̱ nyin yin yet ba̱ a̱kpam ba. 2Yi bvwo nyyai zi ka̱n ba da̱ nyin ba zi sswa ka̱bvung nta̱mak bu ditok ka̱yaani Filibi. Ma Ka̱za a̱ za ryi cet rya na zi nin sseng i ya tyyei Ka̱sham Ba̱ryat nka ka ni, ko di ba̱yanyet nyin ba yin za rak ba̱gingang ni. 3Sa̱rei ba̱ryat ba zi ya tyyei ni, brik n shyi ba, di ba byyi ka̱ywap ko a̱ka̱tuk a̱huhwa ba, da̱ njit ba ya raai ba. 4Ka̱za a̱mi a̱ shim a̱ za ryi Ka̱sham Ba̱ryat ka zi tyyei ba̱nyet ba. Kyang a Ka̱za ka cat i, nkpa zi ryat. Da̱ njit ba ryat ba̱nyet a̱ ga hok ansham njit ba, ma zi gi myim Ka̱za ka a̱ mai a̱huhwa njit u ni. 5Nyin yi bvwo a nkyang a zi yin dyat i, zi yin ya cin ba, ko ba̱cincong, da̱ njit ba yin cat bvei diraa nshya krum ba -- Ka̱za a̱ yet shaida njit. 6Zi yin cat a̱didyep ba̱nyet ba, ko da̱ nyin ko ba̱yanyet ba̱yaan. 7Ma, di ba̱pfong Yesu ni, ku maai zi yet cot ba̱gingang da̱ nyin, ma zi yya ba̱ nyin ba̱shinshwon da̱ a̱naa bu na̱macincong na̱mawon ni. 8Bu Ka̱sham Ba̱ryat Ka̱za a̱mi zi yin ya ba mi ba, ma hat ba̱ a̱ccu njit ma zin tyyi, rot zi yin ya gwai ba̱t. 9Ba̱wumbeyang, yi yring ka̱sak ka zin yya mpfong a i ya di ka̱ra̱hywu njit i. Zi yya mpfong njit a, da̱ njit ban byyi ka̱ta̱nom ba ko ka̱tuk, rot zi yin cat yi rwan ba̱ njit ba ka̱ram ka zin ya tyyei Ka̱sham Ba̱ryat Ka̱za kani ni.
10Nyin ma yi yet shaida, Ka̱za a̱ ma̱n yet shaida, ka̱sak ka zin cong a̱zizrak ka̱cyet assi nyin ba̱nyet ba a̱ san ba̱ryat Ka̱za ba ni, da̱ nyin ba ryi ka̱ywap i ka̱cyet njit ka ba. 11Yi bvwo zi yin ya breng da̱ a̱tyyi na̱ nan yya bu na̱won nu ni. 12Zi ya ta̱gbak i ya tyei cet i ya naai ka̱sak ka yi nin cong a̱zizrak ka̱cyet assi Ka̱za na a̱ ya yei a̱ tyyi yi shya A̱gba̱dang Dityok nka nu ni.
13Kyang yaan ri bvat zi nan dyep Ka̱za, nkpa yet: ka̱ram ka zi bun ya tyyei ka̱sham ba̱ryat Ka̱za ba ni, yi yin ba̱ san di ba̱ryat ba̱nyet ni ba, ma di ba̱ryat Ka̱za ni, ba bo yet ba̱ryat Ka̱za ba. Mba a̱mi a̱ yya pfong a ka̱yat ndya nyin ka, nyin ba̱nyet ba ka̱ ryi ndya nyin na ni. 14Ba̱wumbeyang, kyang a ya ba ni yet bu kyang yring bu ba ba̱nyet tssup Yesu ba a̱ shyi Yahudiya ka ni. Ka̱sak ka yin sswa ka̱bvung di ba̱nyet nyin ba ni, a̱mi mba ba ma̱n sswa ka̱bvung ka di ba̱nyet Yahuda na. 15Ba̱nyet mba ba a̱mi a̱ hywat A̱gwam njit u Yesu a̱nta̱mak bu ba̱nyet tyyei ba̱ryat Ka̱za ba. Mba a̱ bo za nyying. Ka̱za a̱ pfong ansham mba ba, ba bo yet ba̱ra̱ndwan koyan. 16Ba kwan zwang n za bvwo zi tyyei kpikpit nwap a ka̱sak ka ba nin shya sucet i. Nkpa yet a̱gba̱dang a̱ka̱tukyya nu ba yya kozan ka̱ram ni, diryen Ka̱za ti ma̱n kyrek a̱za̱ mba.
Bulut a̱ cat bu nat ba̱ byyek
17Ba̱wumbeyang, ka̱baram ka zi yen ya wwon ni, zi ya wwon bu i rwam ma a̱huhwa njit u a̱ shyi ba̱ nyin, zi pfong ansham zin ya wwon ba, njit ba kwan diwat ti zi bu nin ya ryi ni. 18Zi cat bu brek ba da̱ nyin. Nzuk Bulut n ka̱n tyuk ba na na̱ram ba̱gingang, ma Ka̱ta̱nyrang a̱ za wwon ba. 19Ba̱nzan zin breng rya na, ba̱ nyin baa? Nyin a̱mi yet rawoni yet a̱ccu njit a, ba̱nyet ba zi nin ya gba a̱ta̱ssi A̱gwam Yesu ka̱tuk brek nu ka ni. 20Nyin a̱mi zi nywa, nyin bu yet shok njit ji.
Currently Selected:
1 Tasaloni 2: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
