Ovagalate 3

Omatwako poo ongamburiro

1Vagalate ovehinazondunge eṋe, owaṋi ngwe mu purukisa ozondunge? Jesus Kristus wa raisiwa ongahukiro momeho weṋu kutja mu mu mune otja tja paperwa kotjikoroise. 2Me vanga okumupura embo rimwe ndi uriri: Eṋe mwa pewa Ombepo ya Ndjambi mena rokuyenenisa inga Omatwako wa Moses poo mena rokuzuva Ombuze Ombwa nokukambura mu yo are? 3Nangwari oweṋe ovehinazondunge pu pe ṱeki mba? Eṋe mwa utira mOmbepo ya Ndjambi, nu nambano mamu vanga okukayandera momasa weṋu oveni are? 4Omauzeu weṋu aehe ya ri omungandjo are? Tjiri, owo kaya ri omungandjo! 5Ndjambi u mu pa Ombepo Ondjapuke nu u ungura ovihimise mokati keṋu motjimbe tjokutja mu yenenisa Omatwako poo omotjimbe tjokutja mu zuva Ombuze Ombwa namu kambura mu yo are?

6 # Gen 15:6; Rom 4:3 Ripureye na Abraham; omatjangwa maye tja: “Eye wa kambura mu Ndjambi, nu mena rongamburiro ye Ndjambi we mu vara otja omusemba.” 7#Rom 4:16Notji mu sokutjiwa kutja ozondekurona za Abraham ozo ovandu mba mbe nongamburiro. 8#Gen 12:3Omatjangwa ya tjivisa rukuru kutja Ndjambi imba mbe he ri Ovajuda meve vara otja ovasemba mena rongamburiro. Omatjangwa opu ya zokuraera Abraham Ombuze Ombwa ndji: “Move ondaya.” 9Abraham wa kamburire na serwa ondaya; navehe mbu mave kambura otji mave serwa ondaya otja Abraham.

10 # Deu 27:26 Avehe mbe riyameka kokuyenenisa Omatwako ve ri kehi yosengiro. Orondu omatjangwa maye tja: “Nga sengwe ngamwa auhe ngu hi nokukara nonḓuviro komambo aehe nga tjangwa mEmbo rOmatwako.” 11#Hab 2:4Nambano ongahukiro kutja kape nomundu ngu ma varwa otja omusemba komurungu wa Ndjambi motjimbe tjOmatwako, omatjangwa tjinga amaye tja: “Omundu ngwi ngu ma varwa otja omusemba komurungu wa Ndjambi mena rongamburiro, eye ongu ma kara nomuinyo.” 12#Lev 18:5Omatwako kaye notjiṋa nongamburiro, nungwari inga omatjangwa maye tja: “Ingwi ngu ma yenenisa avihe mbi ri mOmatwako, eye ongu ma kara nomuinyo.”

13 # Deu 21:23 Kristus we tu randa kutja e tu kuture kosengiro ndja etwa i Omatwako, eye tjinga a karirira eṱe osengiro. Orondu omatjangwa maye tja: “Ngamwa auhe ngwa paperwa kotjikoroise nga sengwe!” 14Kristus wa tjita nai kokutja ondaya Ndjambi ndja kwizikira Abraham i yandjewe ku imba mbe he ri Ovajuda mu Kristus Jesus, nokutja mena rongamburiro eṱe tu pewe Ombepo Ndjambi ndja kwizika.

Omatwako nomakwizikiro

15Vakwetu, ami me mu pe omasasanekero otja komuhingo mbu kara po: Ovandu vevari tji va zuvasana otjiṋa nave tjanga omazuvasaneno nga, kape nomundu ngu me ye rundurura poo ngu ma weza ko otjiṋa. 16Nambano Ndjambi wa tjita omakwizikiro we ku Abraham na kondekurona ye. Omatjangwa kaye nokutja “ozondekurona”, okutja ovandu ovengi, nungwari maye tja “ondekurona”, okutja omundu umwe uriri, neye oKristus. 17#Eks 12:40Nai me hee kutja Ndjambi wa tjita omerikutiropamwe na Abraham na kwizike okuyeṱakamisa. NOmatwako, nga yandjerwe kombunda yozombura omasere yane nomirongo vitatu kaye nokuyandeka omerikutiropamwe nga nokuisa po omakwizikiro wa Ndjambi ku Abraham. 18#Rom 4:14Orondu ihi Ndjambi tja kwizikirire Abraham tji matji zu mOmatwako wa Moses, otjo kamaatji zire momakwizikiro we: Nungwari Ndjambi wa yandja otjari tje ku Abraham motjimbe tjomakwizikiro we.

19Nu indji ondando yOmatwako ooiṋe? Owo ya wezirwa okuraisa kutja omasa wouvi ye ṱeki pi. Owo ya tyerwa okukarerera nga ondekurona ya Abraham, ku kwa tjitirwe inga omakwizikiro, tji ye ya. NOmatwako nga ya yandjerwe i ovaengeri kotjiwaṋa ape nomuungure wopokati. 20Nungwari tji pena umwe uriri ngu ma ungura, kahepero kutja pe kare omuungure wopokati. Nu Ndjambi iumwe.

Ondando yOmatwako wa Moses

21Nu ihi matji hee kutja Omatwako wa Moses ye pirukira omakwizikiro wa Ndjambi are? Kako ka tjiperi! Orondu andakuzu omundu wa perwe etwako, ndi eta omuinyo, omundu auhe atja varwa otja omusemba komurungu wa Ndjambi mena rokukara nonḓuviro ku ro. 22Nungwari omatjangwa maye tja ouye auhe u ri kehi yomahonaparero wourunde; omakwizikiro opu ya zokuyandjewa kovakambure mena rongamburiro porwayo mu Jesus Kristus.

23Nu ongamburiro ngunda ai hiye ya, Omatwako ye tu patera motjovakamburwa nga oruveze rwongamburiro ndji tji rweya. 24NOmatwako ye tu tjevera tjinene nga Kristus tje ya, kokutja eṱe tu varwe otja ovasemba komurungu wa Ndjambi mena rongamburiro. 25Nu nambano oruveze rwongamburiro tjinga arwe ya, Omatwako kaye tji nakututjevera rukwao.

26Nu mena rongamburiro ndji mu Kristus Jesus eṋe amuhe oweṋe ovanatje va Ndjambi, 27orondu eṋe amuhe mbu mwa wana na Kristus mombapitisimo mwa sokukara nomuinyo otja mbu mu ri ova Kristus. 28Otji pe ha sokukara ombangu pokati kOmujuda na ingwi ngu he ri Omujuda, pokati komukarere nomundu ngu ri mouyara na pokati komurumendu nomukazendu. Eṋe amuhe oweṋe vemwe mu Kristus Jesus. 29#Rom 4:13Nu tji mu ri ova Kristus, okutja oweṋe ozondekurona za Abraham, nu mamu pewa imbi Ndjambi mbya kwizika.

Currently Selected:

Ovagalate 3: HRR-UNI

Highlight

Copy