Ovagalate 2

Paulus ma varwa i ovaapostele ovakwao

1 # Oviu 11:30; 15:2 Kombunda yozombura omurongo na ine ami mba yarukire rukwao kOjerusalem puna Barnabas ne twaerere Titus wina. 2Ami mba ire ngo, Ndjambi tjinga e ndji vandururira kutja hi yende. Nu indji Ombuze Ombwa, ndji mbi zuvarisira imba mbe he ri Ovajuda, mbe i handjaurira ovanane ovananḓengu mombongarero yapeke, orondu ami hi vangere kutja oviungura vyandje vyoruveze ndwa kapita poo vyanambano vi rire omungandjo. 3Nangarire kutja Titus, ngwa ri puna ami, eye Omugrike, ka kondjisirwe okusukarekwa. 4Nu hapo pa ri ovandu mbaa ve vanga kutja Titus a sukare, nungwari owo va ri ovandu, mba nyonḓorokera mombongo otja ozohoze, nu mbaa ve tjiti aayo ovakambure ovakwetu. Ondando yawo yatjiri ya ri ingwi okutjiwa nawa ongarero yetu youyara mbu tu na wo mu Kristus Jesus, kokutja ve tu ise po ovakarere rukwao. 5Neṱe katu rorere nangarire kaṱiṱi okuitavera komakondjisiro wawo, kokutja imbwi ouatjiri wOmbuze Ombwa u karerere pu eṋe.

6 # Deu 10:17 Nu ovanane wombongo mba (kutja rukuru va ri oowaṋi, ami kape ndji twaerere; nu Ndjambi ka tara kotjivara tjomundu) kave na tji va weza ko kOmbuze Ombwa ami ndji mbi zuvarisa. 7Nowo va muna kutja Ndjambi we ndji pa otjiungura tjokuzuvarisa Ombuze Ombwa ku imba mbe he ri Ovajuda tjimuna tja yandja ku Petrus ihi otjiungura tjokuzuvarisa Ombuze Ombwa kOvajuda. 8Nu momasa we Ndjambi eye ngwa isa po Petrus omuapostele wOvajuda, wina ongwe ndji isa po omuapostele wa imba mbe he ri Ovajuda. 9Nu Jakobus na Petrus na Johanes mbe varwa otja ozongunḓe zombongo va tjiwa kutja Ndjambi we ndji pa otjiungura tjapeke hi; owo otji va yandja omake ku ami na ku Barnabas otja otjiraisiro tjokutja eṱe atuhe oweṱe ovotjiungura tjimwe. Twa zuvasana kutja ami na Barnabas matu ungura mokati kaimba mbe he ri Ovajuda, nowo ave ungura mokati kOvajuda. 10Nu ihi porwatjo owo tji va ningira a ri ingwi okutja eṱe tu zemburuka ovasyona wombongo ya Jerusalem. Nu ihi hapo ootjiṋa tji mba ri amba panḓiparera okutjita.

Paulus ma tena Petrus mOantiokie

11Petrus tje ere kOantiokie, ami mbe mu pirukira komurungu waavehe, tjinga ari ongahukiro kutja ihi tja tjita katja ri otjisemba. 12Novarumendu tjiva mba hindirwe i Jakobus ngunda ave hiye ya, Petrus tjandje u rya puna ovakambure mba mbe he ri Ovajuda. Nungwari ovarumendu mba tji ve ya, eye we rihumba na ha vanga okurya puna imba mbe he ri Ovajuda, tjinga aa tira imba mbaa ve ṋiṋikiza omasukarekero. 13NOvajuda ovakwao wina va uta okuhorera kotjavivi tja Petrus; nu nandarire Barnabas wina wa horera kotjavivi tjawo. 14Nu tji mba muna kutja owo va yepe mondjira osemba youatjiri wOmbuze Ombwa, arire tji mba tja ku Petrus komurungu waavehe: “Oove Omujuda, nungwari u hupa otja omundu ngu he ri Omujuda, nu ko hupu otja Omujuda. Okutjavi tji mo ṋiṋikiza ovandu komasa mbe he ri Ovajuda kutja ve hupe otja Ovajuda.”

Ovajuda na imba mbe he ri Ovajuda ve yamwa i ongamburiro

15Tjiri, eṱe oweṱe Ovajuda mokukwatwa, nu kaweṱe ovanauvi mba za moviwaṋa mbi ha tjiwa Omatwako wa Ndjambi. 16#Psa 143:2; Rom 3:20 Rom 3:22Eṱe matu tjiwa kutja omundu ka varwa otja omusemba komurungu wa Ndjambi mena rokuyenenisa Omatwako wa Moses, nungwari u varwa otja omusemba mena rongamburiro mu Jesus Kristus porwayo. Eṱe wina twa kambura mu Kristus Jesus kokutja tu varwe otja ovasemba komurungu wa Ndjambi mena rongamburiro yetu mu Kristus, nu kamena rokuyenenisa inga Omatwako wa Moses; orondu kape nomundu ngu varwa otja omusemba komurungu wa Ndjambi mena rokuyenenisa inga Omatwako. 17Nungwari eṱe tji matu paha okuvarwa otja ovasemba komurungu wa Ndjambi moruwano rwetu na Kristus, eṱe otji matu rire ovarunde tjimuna imba mbe he ri Ovajuda nu ihi matji hee kutja Kristus omukarere wouvi are? Kako! 18Nungwari ami tji mba utu okuyarura ko inḓa ozondyero zOmatwako nḓu mba isa po, ami omuini me riraisa kutja owami omukatuke wazo. 19Nu otja ku ami omuini ami mOmatwako mba ṱira Omatwako, kokutja mbi kare nomuinyo mu Ndjambi. Mba paperwa kotjikoroise pamwe na Kristus. 20Nu kawami ngu mbi nomuinyo, nungwari oKristus ongu nomuinyo mu ami. Nomuinyo mbu mbi na wo nambano, mbi nomuinyo mongamburiro mOmuna wa Ndjambi, ngwe ndji suverere nu ngwe riyandjera ami omuinyo we. 21Ami hi nakunakaura ko otjari tja Ndjambi, nungwari omundu tji ma varwa otja omusemba komurungu wa Ndjambi mena rokuyenenisa inga Omatwako, okutja mape hee kutja Kristus wa ṱomungandjo!

Currently Selected:

Ovagalate 2: HRR-UNI

Highlight

Copy