तितस 3

जेदोङ आसल हि ओदोङ पासु

1सासकगेलाइ कालाउ आधिकारिगेलाइको आदार पाअ्‌ कालाउ इम्बालाइको आग्या किलि दोअ्तेङ इन्ताको खान्धुराइगेलाइहेङ फोम पा-पाअ्‌, कालाउ आरुको भाअ्सिङ रेम्का काम पालि दोअ्। 2इम्बालाइ हासुको बुङ बिरोध मापाको कालाउ माचेरस्वाको, मोनोइ कालाउ गोताङ द्‍याङगेलाइ दोफा मिलितेङ हिका जेनाको।

3हाइपालिपानु केलाइ खान्धुराइ जेङलि खाङतेङ लाम्फा केलाइ मुर्ख, परमेस्वरको आग्या माकिका कालाउ द्‍याङगेलाइ केलाइहेङ धोका पिघाहि। कालाउ केलाइ गोताङ मारेम्का इच्छा कालाउ मारेम्का कामगेलाइको काबुता हिघान्हाहि, कालाउ केलाइ बो गेलाइहेङ डाहा, मन्दा माताघान्हाहि कालाउ एमिसो-भेनेङहेङ हेला पाघान्हाखे।

4कालाउ केलाइ इन्सिका ब्यभार पालाउ बुङ मुक्ति दाता केलाइको परमेस्वर केलाइहेङ वाको दाया कालाउ प्रेम तिङपाहि। 5कालाउ केलाइको ताइकोङ रेम्का कामसो माको, कालाउ वाको ताइको दायाहोइ केलाइहेङ केलाइको पापको दन्डसो बान्चिपाहि, कालाउ वा केलाइहेङ पबित्तरो आत्मा पिहि, जाइ केलाइको पापगेलाइ झाअ्पिहि कालाउ नावा जिबन पिहि कालाउ नावा तरिका जियाइलि धिरपाहि। 6परमेस्वर इङको पबित्तरो आत्मा केलाइको मुक्ति दाता येसु ख्रिस्ट पाहासो केलाइहेङ गेनेगेल्पा पिहि। 7परमेस्वर इसिका पाहि, कालाउकि वाको आनुग्रह पाहासो केलाइ ठिक थोहोरिलि कालाउ वाको सान्तान जेङलि द्वाको, कालाउ केलाइ आस ताअ्का आनान्त जिबन बुङ निङलि द्वाको। 8इदोइ भनाइ सत्ये हि, जेदोङ एलाङ खिनिङ का नासेहेङ दोअ्का हिघा, का भोखा कि जेलाउ नाअ् खान्धुराइगेलाइहेङ धिरपाखेना इदोइ काथागेलाइता जोर पिसु, कालाउकि जाइ परमेस्वरता खाङधुरि ताअ्का हि ताइमिहेङ रेम्का काम पालि मन लागाइलि द्वाको। हाइपालिपानु इदोइ सिक्स्यागेलाइ गोताङ द्‍याङगेलाइको भाअ्सिङ रेम्का कालाउ फाइदा जनक बुङ हि।

9कालाउ आनाइ जालबाजिगेलाइ, पुर्खागेलाइको माओताका सुचि, बेकारको काथागेलाइ कालाउ मोसाको व्यवस्थाको बिसोइता चेरसुका काथागेलाइसो दुरे हिसु, हाइपालिपानु इङको ब्यर्थको काम मालागिका काथागेलाइ दोङ हि। 10जेसापा हिदोइ बुङ द्‍याङ मन्डलिता फाटो चुमाखे पानु, उङकोहेङ एखे माकुनु न्हेखे एन्सा पालि लाअ् दोअ्तेङ चेताउनि पि, कालाउ न्हुसो उङको द्‍याङ दोफा हिदोइ बुङ सामान्दा माअ्ता। 11इसिका खाल्को द्‍याङगेलाइ सत्येसो आवाइ तुगिल्का हि दोअ्तेङ नाअ् गिलि गोइखे। कालाउ इम्बालाइ ताइकोङ पापसो दुसिका थोहोरिका हि।

आखिरि साल्लाहा

12का आर्तिमास माकुनु तुखिकसहेङ नाङको हिका थामे क्रेट टापुता दिङगिल्लाङका। जेलाउ इम्बालाइ नाङकोता थुकातावा नाअ् कासेहेङ भेतिलि निकोपोलिस सहरता जेसालाउ बुङ लोलि कोसिस पाअ्‌। हाइपालिपानु इङकोङ निकोपोलिसता का चुङका सोमोइ भरि हिलि बिचार पाका हिघा। 13जेलाउ जेनास मिङ हिका वकिल कालाउ आपुल्लोस मिङ पाका भेनेङ द्‍याङ ताइको दामा तेलि तेनावा, इम्बालाइहेङ पाक पाकाता गोइका गोताङ आमेनेको खाचो मापरियाको दोअ्तेङ इम्बालाइहेङ साघाइसु। 14इङको खिनिङ माको, कालाउ खान्धुराइगेलाइहेङ रेम्का काम पातेङ हि दोअ्तेङ धिरपा, कालाउकि इम्बालाइ खाचोता परिका द्‍याङगेलाइहेङ साघाइलि द्वाको, कालाउ इदोइ कामसो खान्धुराइगेलाइ जिबनको उदेस्य हाइ दोअ्तेङ गिलि द्वाको।

15इङको झाराङ जाइ खान्धुराइगेलाइ का दोफा हि नासेहेङ सेउपाखा पिगिल्का हि, कालाउ इन्ता क्रेट टापुता हिका केलाइहेङ प्रेम पाका खान्धुराइगेलाइहेङ बुङ केलाइको सेउपाखा दोअ्पि। का प्रार्थाना पाङका कि परमेस्वरको आनुग्रह नेलाइ झाराङ दोफा हितेङ ह्याको।

Currently Selected:

तितस 3: DHINT

Highlight

Copy

Compare