फिलेमोन 1

1का पावल इदोइ पात्तारा लेखेदोङखा, का झ्याल्खानाता हिघा हाइपालिपानु का येसु ख्रिस्टको बारेता प्राचार पाघा। का कालाउ का दोफाङ काम पाका खान्धुराइ सानाइति तिमोथिसो नाअ् फिलेमोन केलाइको आनाउ सानाइति कालाउ साघाइकाहेङ सेउपाखा। 2कालाउ केलाइको खान्धुराइ बेजान ओने आप्फिया कालाउ वाजान ओने आर्खिपसहेङ जाइ प्रभुको सेवा सिपालाइ भाइपा पाखे कालाउ नाङको साअ्ता जोम्का खान्धुराइगेलाइहेङ बुङ लेखेदोङखा।

3का प्रार्थाना पाखा कि, केलाइको आबा परमेस्वर कालाउ केलाइको प्रभु येसु ख्रिस्ट नासेहेङ आनुग्रह पाको कालाउ सान्ति प्याको।

धन्यबाद कालाउ प्रार्थाना

4जेलाउ बुङ का नाङको भाअ्सिङ प्रार्थाना पाखा, का जेलाउ बुङ नाङको भाअ्सिङ परमेस्वरहेङ धन्यबाद पिखा। 5हाइपालिपानु का प्रभु येसुता नाङको खाङधुरि कालाउ गोताङ परमेस्वरको जनगेलाइको भाअ्सिङ नाङको प्रेमको बारेता हिङका हिघा। 6का प्रार्थाना पाखा कि नाङको खान्धुराइगेलाइ दोफाको सङगति आझै बारातेङ हानाको। कालाउ परमेस्वर केलाइहेङ पिका गोताङ आसल काथागेलाइ नाअ् रेम्फा बुझिलि दोअ्। कालाउ या ख्रिस्टको महिमाको भाअ्सिङ ज्याको। 7हाइपालिपानु काङको खान्धुराइ ओनेगेलाइ, का हेन्जा लेङचाका हिघा कालाउ आरु दोफाको नाङको प्रेम तिङतेङ हाउसाइतेङ हिघा, हाइपालिपानु नाअ् पाहासो परमेस्वरको जनगेलाइ हाउसाइका जेङका हि।

ओनेसिमसको भाअ्सिङ पावलको बिन्ति

8-9का नासेहेङ हाइ दोङ काम पालि दोअ्खा कालाउ नाअ् इङको काम पालि गोयाना। का नासेहेङ इदोइ आग्या पिलिको भाअ्सिङ ख्रिस्ट दोङ कासेहेङ पिका खाबारा प्रयोग पालि द्वाङका, कालाउ का ते मापाङका। वाको सात्ताता का या पालि दोअ्दोङखा हाइपालिपानु केलाइ एमिसो-भेनेङहेङ कालाउ परमेस्वरको द्‍याङगेलाइहेङ प्रेम पानाखे। का पावल एला नासेहेङ एमि वाराङ द्‍याङ दोङ दोअ्का भाइपा हिअ्खा, जाइहेङ द्‍याङगेलाइ झ्यालखानाता ह्वाका हि, हाइपालिपानु का येसु ख्रिस्टको सेवा पाखा। 10का ओनेसिमसको भाअ्सिङ निबेदन पादोङखा, जाइ काङको भाअ्सिङ चान भाइकाङ जेङका हि। का इता झ्यालखानाता हिलाउ वा ख्रिस्टता काङको चान जेङहि। 11इङको दिनागेलाइता ओनेसिमस नाङको भाअ्सिङ बेक्कामको हिघाहि। कालाउ एला नाङको भाअ्सिङ कालाउ काङको भाअ्सिङ काम लागिका जेङका हि। 12का ओनेसिमसहेङ नाङकोता आरोङ पिगिल्खा, जाइहेङ का पुरा ह्रदयहोइ प्रेम पाखा। 13का ओनेसिमसहेङ झ्यालखानाता सुसमाचार प्राचार पालि साघाइलिको भाअ्सिङ इता का दोफाङ ताअ्लि खाङघाखा। वा नाङको सात्ताता कासेहेङ साघाइलि दोअ्धावा, हाइपालिपानु का गिखा कि नाअ् कासेहेङ साघाइलि भोखेना। 14कालाउ नाङको आनुमति बिना का इङको हाइ दोङ पालि माचाहिखा। कालाउकि नाङको साघाइ करकापहोइ माको, भरु नाङकोङ इच्छाहोइ जेनाको।

15जेङलि दोनु परमेस्वर ओनेसिमसहेङ नाअ्सो आले सोमोइको भाअ्सिङ हानिलि पि कालाउकि वा ख्रिस्ट ह्रुता खाङधुरि पाको, कालाउ वा जेलाउ बुङ नाअ् दोफा हिलि द्वाको। 16एला नाअ् वासेहेङ ताइको बान्धाइति खिनिङ मासोचे, भरु उङको बान्धाइति खान्तेङ हेन्जा बार्का हि। वाते एला खान्धुराइ जेङका हि, जाइहेङ नाअ् प्रेम पालि द्वाना। का वासेहेङ हेन्जा मायारु पाखा कालाउ नाअ् वासेहेङ ताइको बान्धाइति कालाउ ख्रिस्टता ओने न्हेमि दोङ जेङनाङ झन हेन्जा मायारु पालि गोइखे। 17ओदोङ भाअ्सिङ कासेहेङ ताइकोङ सानाइति सम्झिखेना पानु, जेलाउ ओनेसिमस नाङकोता घुरितेङ लोखे, नाअ् कासेहेङ स्‍वागत पाना भाइपाङ वासेहेङ बुङ खुसिहोइ स्‍वागत पाअ्‌। 18जेसापा ओनेसिमस नासेहेङ हाइ दोङ खाराबि पाका लाउ बुङ, माकुनु जेसापा वा हाइ दोङ रिनि तिरिलि हिनु, का इङको रिन नासेहेङ तिरि प्याङका। 19का पावल, इदोइ काङकोङ खुरहोइ लेखेदोङखा, इङको रिन का स्वयम तिरि प्याङका। नासेहेङ थाहा दोङ हि, जेसापा का नासेहेङ मासाघाइकानु, नाअ् ताइमिङ नावा जिबन निङलि माअ्दोधाना। ओदोङ भाअ्सिङ नाअ् ताइकोङ जिबनको भाअ्सिङ काङको रिनि हिना। 20काङको आनाउ सानाइति, नाङकोसो ख्रिस्टता हाइ दोङ फाइदा ज्याको दोअ्का का चाहिखा। खान्धुराइ सानाइति पाका कोनिङ या काम पातेङ कासेहेङ हाउसाइपा। 21का इदोइ पात्तारा नासेहेङ लेखेका हिघा, हाइपालिपानु का भोरोसा पाङका, कि काङको दोअ्का भाइपा नाअ् पाना। बास्ताबता कासेहेङ थाहा हि, कि का दोङ नासेहेङ दोअ्का खान्तेङ हेन्जा नाअ् पाना।

22या दोफाङ नाङको साअ्ता काङको भाअ्सिङ एनोङ कोठाको ब्यबस्था पापि। हाइपालिपानु का आस पाखा कि परमेस्वर नाङको प्रार्थानाको उत्तारा पियाङ कालाउ का इन्ता ल्वाङका कालाउ नासेहेङ भेत्याङका।

23इपाफ्रास बुङ का दोफा झ्यालखानाता हि, हाइपालिपानु वा बुङ येसु ख्रिस्टको सेवा पाखे, वा बुङ नासेहेङ सेउपाखा पिगिल्का हि। 24एन्सा पातेङ का दोफा प्रभुको काम पाका मर्कुस, आरिस्ताखर्स, डेमास कालाउ लुका को बुङ नासेहेङ सेउपाखे।

25का प्रार्थाना पाखा कि प्रभु येसु ख्रिस्ट नेलाइ दोफा आनुग्रहकारि जेनाको। आमेन।

Currently Selected:

फिलेमोन 1: DHINT

Highlight

Copy

Compare