तितस 2

सहि सिक्स्या

1कालाउ तितस नाअ् चाहि खान्धुराइगेलाइहेङ सहि सिक्स्यागेलाइ खिनिङ धिरपा। 2कालाउ वाराङ द्‍याङगेलाइहेङ ताइमिहेङ काबुता ताअ्लि, आदारको योग्य, समझदारिता जियाइलि, खाङधुरिता पाक्का, प्रेम कालाउ धर्यता बल्लियाका जेङलि धिरपा।

3एन्साङ पातेङ बेराङ बेबालाइ गोताङ काथाता परमेस्वरहेङ मन्दा ताअ्का जिबन जियाइयाको, बोमिको काथा पाका कालाउ हेन्जा गोरा-चि आम्का बानि माह्याको। कालाउ इम्बालाइ बो गेलाइहेङ रेम्का काथा पालि धिरपाको दोअ्तेङ इम्बालाइहेङ धिरपा। 4कालाउकि इम्बालाइ एनोङ आसल उधाहरन जेङतेङ धानिगेलाइ हेसा ताइको के कालाउ जामाललाइहेङ मायारु पालि गोइखे दोअ्तेङ साल्हा पिलि द्वाको। 5कालाउ इम्बालाइ ताइमिहेङ काबुता ताअ्का, ताइको के दोफा खाङधुरि योग्य जेङलि, दायाका, रेम्फा साअ् पातेङ चाका कालाउ के को आधिनता हिलि धिरपाको, कालाउकि परमेस्वरको बचनको निन्दा जेङलि मानिनाको।

6एन्साङ पातेङ धानागेलाइहेङ बुङ बुद्दिमानसो ब्यभार पाका आर्ति पि। 7नाअ् गोताङ काथाता जेलाउ बुङ आसल काम पाअ्‌ कालाउ आरुको भाअ्सिङ नामुना जेङतेङ तिङपा। जेलाउ नाअ् खान्धुराइगेलाइहेङ धिरपाना रेम्का मनसायहोइ धिरपा। कालाउकि इम्बालाइ नासेहेङ आदार पाको। 8कालाउ नाङको सिक्स्या जेलाउ बुङ सहि कालाउ हासु बुङ निन्दा पालि मादोअ्का ह्याको, कालाउकि नाअ् येसुको भाअ्सिङ पाका कामको बिरोध पालाउ, इम्बालाइ लेदेरलि गोयाको, कालाउ इम्बालाइ केलाइको बारेता हाइ दोङ मारेम्का काथा दोअ्लि मानिनाङ।

9कालाउ नाङको मन्डलिको बान्धाइतिगेलाइहेङ दिनाङ ताइको गिह्रिगेलाइको आग्या केम्लि धिरपा। कालाउ इम्बालाइहेङ ताइको खुसि पालि दोसु, कालाउ इम्बालाइ नुइ चाउका माजेनाको। 10इम्बालाइ माखुवाको, भरु ताइमिहेङ खाङधुरि योग्य तिङपाको। कालाउकि द्‍याङगेलाइ इम्बालाइको रेम्का ब्यभार तिनाको, कालाउ इम्बालाइको पाका रेम्का कामसो द्‍याङगेलाइ केलाइको मुक्ति दाता परमेस्वरको सन्‍देस हिङलि मन परियाको।

11खान्धुराइगेलाइहेङ एसापा धिरपा, हाइपालिपानु गोताङ द्‍याङगेलाइहेङ पापसो लाअ्पालि परमेस्वर ताइको आनुग्रह तिङपाका हि। 12हाइपालिपानु परमेस्वरको आनुग्रहहोइ केलाइहेङ मारेम्का जिबन जियाइलिसो रोकिखे, कालाउ वाको आनुग्रहसो केलाइ ताइमिहेङ काबुता ताअ्तेङ इदोइ सुमिङता सहि कालाउ आसल जिबन जियाइलि द्वाङ। जेदोङ चाहि परमेस्वरहेङ मन परिखे। 13कालाउ केलाइ आस पाका दिनाको दामा खाङतेङ हिनाखे: जेदोङ दिना येसु ख्रिस्ट, जाइ केलाइको माहान परमेस्वर मुक्ति दाता हि, वा ताइको गोताङ महिमा दोफाङ इदोइ प्रिथिबिता ल्वाङ। 14केलाइहेङ पापको सरबुङसो बान्चिपालि कालाउ पबित्तरो बानाइलि येसु ख्रिस्ट ताइमिहेङ बलिदान पिहि, कालाउकि केलाइ वाकोङ द्‍याङ जेङलि द्वाको। कालाउ आसल कामगेलाइ पालि द्वाको।

15तितस, का नासेहेङ धिरपाका काथा इन्ता क्रेट टापुता हिका खान्धुराइगेलाइहेङ धिरपा। कालाउ ताइको द्‍याङगेलाइहेङ हाउसाइपा कालाउ गोल्ति पानु इम्बालाइहेङ सच्याइपा नाअ् दोफा या पालि खाबारा हि। कालाउ हासु बुङ नासेहेङ हेला पालि माउका मापि।

Currently Selected:

तितस 2: DHINT

Highlight

Copy

Compare