2 थेस्लोनिकि 3
3
प्रार्थानाको भाअ्सिङ बिन्ति पाका
1खान्धुराइ ओनेगेलाइ, आखिरता केलाइको भाअ्सिङ प्रार्थाना पाअ्पिसु, कालाउ प्रभुको बचन धेमाङ द्यापाहाङ फाइलाइयाको कालाउ द्याङगेलाइ साम्मान पालि द्वाको जेसाङ नेलाइ बुङ साम्मान पाका हिघासुखेना। 2कालाउ प्रार्थाना पाअ्सु, कि परमेस्वर केलाइहेङ दुस्ट द्याङगेलाइसो जेङका हान्तिसो बान्चि पाको, हाइपालिपानु सुसमाचार हिङकालाइ हेन्जा जोसो द्याङगेलाइ इदोइ काथाता खाङधुरि मापाखे। 3कालाउ नेलाइ परमेस्वरता भोरोसा पालि दोस्वाना। कालाउ वा दोङ नेलाइहेङ आत्मिक रुपता बल्लियाका बानाइयावा कालाउ साइतानसो जोगाइतेङ ताअ्ताङ। कालाउकि साइतान नेलाइहेङ हिदोइ बुङ हान्ति मापाको। 4केलाइ जेदोङ काथाको आग्या पिन्हाखे, इङको नेलाइ लागातार पासुखेना बुङ दोअ्का केलाइ नेलाइको बारेता प्रभुता खाङधुरि पानाखे। 5परमेस्वर नेलाइहेङ हेथे प्रेम पाखे ख्रिस्ट नेलाइहेङ देखाल पापियाङ, कालाउ कस्ट सहिलि दोका बानाइलि द्वाको जेसाङ ख्रिस्ट ताइमिङ कस्ट बुङ सहिहि।
कुरियाहेङ चेताउनि
6एला खान्धुराइ ओनेगेलाइ, केलाइको प्रभु येसु ख्रिस्ट पिका खाबारासो केलाइ नेलाइहेङ आग्या पिन्हाखे, कि केलाइसो नेलाइ दोङ निङका सिक्स्याता मालागिका गोताङ कुरिया खान्धुराइ ओनेगेलाइको सङगत मापासु। 7हाइपालिपानु, नेलाइ दोङ हेसा केलाइको भाइपाङ जियाइलि गोइखे इङको गोताङ नेलाइ ताइमिङ गिसुखेना, हाइपालिपानु जेलाउ केलाइ नेलाइ दोफा हिलाउ कुरिया मान्थु घानाहि भरु काम पातेङ हिन्हाहि। 8कालाउ केलाइ हासुको बुङ तोले एन्साङ माचान्हाहि। कालाउ केलाइ नेलाइता भर मापरियाङ दोअ्तेङ केलाइ न्हिसिन-नितिमा परिस्रोम पातेङ काम पान्हाहि। 9साघाइ निङलि केलाइको होक मानिङका दोअ्तेङ माको, कालाउ केलाइ नेलाइको भाअ्सिङ नामुना जेनाइने दोअ्तेङ केलाइ थाङका परिस्रोम पान्हाहि। 10जेलाउ नेलाइ दोफा हिलाउ केलाइ नेलाइहेङ प्राय दोअ्घान्हाखे, “हासु बुङ काम मापानु वा उम बुङ माचाको।”
11हाइपालिपानु केलाइ हिङनाखे, कि नेलाइ मध्येता हेथेते कुरिया जिबन बितिपातेङ हिसुना। नेलाइ ताइमि चाहि हाइ दोङ काम मापा सुखेना कालाउ बोमिको कामता बेकारता दक्खल पासुखेना। 12प्रभु येसु ख्रिस्ट पिका खाबारासो केलाइ इसिका द्याङगेलाइहेङ आर्ति कालाउ आग्या प्याङ, कि इम्बालाइ सिकापा ताइको काम पाको कालाउ ताइकोङ मेहेनेतहोइ कामाइतेङ जिबन चालाइयाको। 13खान्धुराइ ओनेगेलाइ, नेलाइ रेम्का काम पालि मामाइसु।
14इदोङ पात्ताराता केलाइको दोअ्का सन्देस जेसापा हासु बुङ किलि माकिखे पानु उङको द्याङहेङ झाराङ नाल्तेङ ताअ्सु, कालाउ वा दोफा हाइ दोङ सङगत मापासु, कालाउ उङको ताइमिङ लेदेरयावा। 15कालाउ बुङ वासेहेङ ताइकोङ सतुरु भाइपा ब्याभार मापासु, कालाउ ताइकोङ ओनेहेङ सम्झाइका भाइपा वासेहेङ सम्झाइ।
आखिरि सेउपाखा
16का प्रार्थाना पाङका, कि प्रभु जाइ सान्तिको मुलि हि, वा नेलाइहेङ जेलाउ बुङ सान्ति प्याको कालाउ का आरोङ बुङ प्रार्थाना पाङका, कि प्रभु नेलाइ झाराङ दोफा जेलाउ बुङ ह्याको।
17का पावल, ताइकोङ खुरसो इदोइ सेउपाखा लेखेदोङखा। एसापा दोङ का काङको गोताङ पात्ताराको भाग ओतापाखा, कालाउकि झाराङ थाहा निनाको कि इदोइ पात्तारा काङकोसो लेखेका हि।
18का प्रार्थाना पाखा, कि केलाइको प्रभु येसु ख्रिस्टको आनुग्रह नेलाइ झाराङ दोफा हितेङ ह्याको।
Currently Selected:
2 थेस्लोनिकि 3: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
