1तिमोथि 1

1का पावल इदोइ पात्तारा लेखेदोङखा। का केलाइको मुक्ति दाता परमेस्वर कालाउ येसु ख्रिस्ट जाइता केलाइ आस ताअ्नाखे, का वाको छाल्न्हाका चात्या हिघा। 2का इदोइ पात्तारा तिमोथिहेङ लेखेदोङखा, नाअ् काङको ताइकोङ चान भाइका हिना हाइपालिपानु नाअ् बुङ येसु ख्रिस्टता खाङधुरि पाखेना। का प्रार्थाना पाखा, कि केलाइको आबा परमेस्वर कालाउ येसु ख्रिस्ट नासेहेङ आनुग्रह, क्रिपा कालाउ सान्ति प्याको।

धाताइका सिक्स्याको बिरोधता चेताउनि

3जेलाउ म्यासिडोनिया प्रदेस हानेलि तोमलाउ का आरोङ नेलाइहेङ आनुरोध पाखा कि, नेलाइ एफिसस सहरता दोङ हिसु कालाउ धाताइका सिक्स्या धिरपाका द्‍याङगेलाइहेङ एन्सा मापा दोअ्तेङ थाङका आग्या पि। 4का आरोङ बुङ नेलाइहेङ आनुरोध पातेङ दोअ्खा, कि नेलाइ इम्बालाइको दन्ते काथागेलाइ कालाउ पुर्खागेलाइको माओताका सुचिको काथागेलाइता सोमोइ खेर माथाइगिल्सु। इन्सिका काथा पोसुकालाइहोइ परमेस्वरको काम पालि मासाघाइखे, हाइपालिपानु परमेस्वरको काम वाकोता खाङधुरि पानाङ जेङखे। 5का नेलाइहेङ आदेस पिका उदेस्य इदोइ हि, कि नेलाइ एमिसो-भेनेङहेङ पुरा ह्रदयहोइ, प्रेम पासु, जेदोङ चाहि सुद्द मन, आसल बिबेक, कालाउ सत्ये खाङधुरिसो लोखे। 6हाइपालिपानु हेथेते धाताइका सिक्स्यकगेलाइ इङको गोताङ काथागेलाइ पालि लाअ्तेङ काम ब्यर्थको काथागेलाइ दोअ्लि तेङका हि। 7इदोइ धाताइका सिक्स्कगेलाइ मोसाको व्यवस्था धिरपाका द्‍याङगेलाइ भाइपाङ जेङलि इच्छा पाखे, कालाउ ताइमिङ दोअ्का काथा कालाउ ताइमिङ दाबि पातेङ दोअ्का काथागेलाइ इम्बालाइ ताइमिङ माबुझिखे।

8केलाइ गिनाखे, कि मोसाको व्यवस्था रेम्का हि कालाउ द्‍याङगेलाइ चाहि व्यवस्थाहेङ ठिकसो धिरपालि गोइखे। 9केलाइ या बुङ गिन्हाखे, कि मोसाको व्यवस्था आसल काम पाका द्‍याङको भाअ्सिङ पिका माको, भरु परमेस्वरको व्यवस्था माकिकालाइहेङ कालाउ आनाग्या कारिगेलाइको भाअ्सिङ हि, जाइ परमेस्वरको आराधाना मापाखे कालाउ जाइ लागातार पाप पातेङ हिखे, दुस्ट द्‍याङगेलाइ कालाउ परमेस्वरको आदार मापाकालाइ कालाउ ताइको आमाइ-आबागेलाइहेङ कालाउ आरु द्‍याङगेलाइहेङ सेअ्कालाइको भाअ्सिङ, 10कासिबिरिगेलाइको भाअ्सिङ, वाबालसो-वाबालहेङ कुसुमि पाकागेलाइको भाअ्सिङ, द्‍याङगेलाइहेङ बान्धाइतिको रुपता पिइकालाइको भाअ्सिङ, धाताइका काथा पाकागेलाइको भाअ्सिङ, कालाउ धाताइका केरा चाकालाइको भाअ्सिङ, कालाउ सत्ये सिक्स्याको बिरोधता काम पाकालाइको भाअ्सिङ जेङका हि। 11इदोइ सहि सिक्स्या केलाइको आधभुत परमेस्वरको महिमाको बारेता सुसमाचार दोफा सहमति हिखे, जाइ कासेहेङ प्राचार पाका जिम्माबारि सुम्पिका हि।

पावलहेङ प्रभुको आनुग्रह

12कासेहेङ सरबुङ पिका ख्रिस्ट येसु केलाइको प्रभुहेङ का धन्यबाद पिखा, हाइपालिपानु ताइको सेवाको कामको भाअ्सिङ वा दोङ कासेहेङ खाङधुरि योग्य थानिहि। 13का खान्धुराइ जेङलि खान्तेङ लाम्फा ख्रिस्टहेङ निन्दा पाघाखा कालाउ खान्धुराइगेलाइहेङ साताइघाखा कालाउ हान्ति पाघाखा। कालाउ का इङको गोताङ कामगेलाइ मागितेङ कालाउ खाङधुरि मापासिङ पानाङ ख्रिस्ट कासेहेङ दाया हि। 14कालाउ केलाइको प्रभु कासेहेङ वाको आसिम आनुग्रह लागातार तिङपाहि। वा दोङ कासेहेङ वा ह्रुता खाङधुरि पाका बानाइहि, कालाउ आरुहेङ प्रेम पालि धिरपाहि, हाइपालिपानु का येसु ख्रिस्ट दोफा ए जेङतेङ हिघाखा। 15इदोइ भनाइ सत्ये हि, कालाउ यासेहेङ खाङधुरि पालि द्वाङ, कि केलाइ पापिगेलाइहेङ उद्दार पालि येसु ख्रिस्ट सुमिङता लोहि, कालाउ पापिगेलाइता का झाराङ खान्तेङ हेन्जा पापि हिघा। 16कालाउ येसु ख्रिस्ट कासेहेङ क्रिपा तिङपाहि, कि का पापिगेलाइ मध्येसो हेन्जा पापि हिलाउ बुङ स्यामा पितेङ तिङपाहि कि, वा ओसारापाङ सहनसिल हि। कालाउकि का न्हुसो वाको ह्रुता खाङधुरि पातेङ आनान्त जिबन निङकागेलाइको भाअ्सिङ का एनोङ उधाहरन जेङलि द्वाको। 17एला आनान्त काल थेकापा सासन पाका राजा, जेलाउ बुङ बान्चितेङ हिका कालाउ तिङलि बुङ मादोका एमि खिनिङ परमेस्वरहेङ आदार कालाउ महिमा जेलाउलाउ बुङ ज्याको। आमेन।

18काङको चान तिमोथि, का नासेहेङ या आग्या पिदोङखा, कि नाङको बिसोइता लाम्फासोङ परमेस्वरको बाक्ता दोअ्का काथा नाअ् फोम ताअ् कालाउकि नेलाइ धाताइका सिक्स्यकगेलाइको बिरोधता आसल धुम पालि दोसु। 19नाअ् ख्रिस्टता लागातार खाङधुरि पातेङ हिलि गोइखे कालाउ आसल बिचार पातेङ हिलि गोइखे आधिमि द्‍याङगेलाइ ताइको आसल बिचार इन्कार पाका हि, कालाउ इम्बालाइ ख्रिस्टता खाङधुरि पालि लाअ्का हि। 20इङको मध्येता हुमेनियस कालाउ आलेक्जेन्डर बुङ हि, का इम्बालाइहेङ परमेस्वरको निन्दा पालि लाअ्ताको दोअ्तेङ साइतानको खुरता सुम्पिका हिघा, कालाउकि इम्बालाइ परमेस्वरको निन्दा पालि माएल दोअ्का काथा धिराको।

Currently Selected:

1तिमोथि 1: DHINT

Highlight

Copy

Compare