1तिमोथि 2
2
मन्डलिको भाअ्सिङ प्रार्थाना
1झाराङ खान्तेङ लाम्फा का आनुरोध पाङका, कि गोताङ द्याङको भाअ्सिङ परमेस्वर दोफा मोनोइ निबेदन, प्रार्थाना, बिन्ति कालाउ धन्यबाद पासु। 2राजागेलाइ कालाउ गोताङ आधिकारिगेलाइको भाअ्सिङ बुङ प्रार्थाना पासु। कालाउकि केलाइ सान्ति कालाउ सुरुक्स्याता जियाइतेङ परमेस्वरको आराधाना पालि दोवाइने कालाउ वा जेदोङ पालि भोखे इङको केलाइ पालि दोवाइने। 3इसिका प्रार्थाना ठिक हि, कालाउ केलाइको मुक्ति दाता परमेस्वर बुङ इदोइ दोङ काथा मन्दा ताअ्खे। 4गोताङ द्याङगेलाइ मुक्ति निनाको कालाउ इम्बालाइ सत्येको ग्यानता ल्वाको दोअ्का इच्छा वा पाखे। 5हाइपालिपानु परमेस्वर एमि खिनिङ हि, परमेस्वर कालाउ द्याङगेलाइको माझाता सान्ति चुमाका बुङ एमि खिनिङ मध्यस्थ हि, कालाउ उङको द्याङ चाहि येसु ख्रिस्ट हि। 6ख्रिस्ट गोताङ द्याङगेलाहेङ पाप कालाउ सिकाको सरबुङसो लाअ्पालि मोल तिरितेङ ताइमिहेङ बलिदान पिहि। कालाउ वाको सिकासो परमेस्वर झाराङ द्याङ बान्च्याको दोअ्तेङ ठिक सोमोइता प्रमान पिहि। 7याकोङ भाअ्सिङ परमेस्वर कासेहेङ सुसमाचारको प्राचार पालि कालाउ साल्न्हाका चात्याको रुपता नियुक्ति पाहि। कालाउ वा कासेहेङ खाङधुरि कालाउ सत्येको सिक्स्या गैर-यहुदिगेलाइहेङ धिरपालि साल्हि। कालाउ का धाताइतेङ दोअ्का माको, भरु का सत्ये धुइखा।
8का चाहिखा, कि जेलाउ बुङ नेलाइ परमेस्वरहेङ आराधाना पालि जोम्सुखेना, परमेस्वरहेङ ग्रहन योग्य जिबन जियाइका वाबालाइ ताइको पबित्तरो खुर तोल्हेतेङ बिना क्रोड कालाउ बिना माचेरसुसिङ प्रार्थाना पाको।
9एसाङ पातेङ का चाहिखा, कि खान्धुराइ बेबालाइ सोबाइका सुइकार योग्य कालाउ आदार योग्य लोखोन धाबा लागाइयाको। पुसुङहेङ हेन्जा साजाइतेङ, सोना, मोति कालाउ हेन्जा जाङका लोखोन धाबागेलाइ लागाइतेङ माको, 10कालाउ रेम्का कामगेलाइ पातेङ ताइमिहेङ सोबाइका बानाइलि, जाइ परमेस्वरको भक्ति पाका बेबालाइहेङ सोबाइखे।
11जेलाउ हिदोइ बुङ द्याङ खान्धुराइगेलाइहेङ धिरपातेङ हिखे, झाराङ बेबालाइ सान्त रुपहोइ कालाउ हेन्जा आदार पातेङ हिङलि गोइखे कालाउ धिरलि गोइखे। 12कालाउ बेबालाइ वाबालहेङ धिर्पाका कालाउ वाबालाइ ह्रुता खाबारा पाका कामता का आनुमति माप्याङका, कालाउ बेबालाइ चाहि हासु बुङ धिरपाका सोमोइता सिकापा हिलि गोइखे। 13का या काथा दोअ्खा हाइपालिपानु परमेस्वर लाम्फा वाबाल आदमहेङ कालाउ न्हुसो बेजान हब्बाहेङ सिरजाइहि। 14कालाउ भेनेङ कारन चाहि बेजानहेङ पुह्याँ धाताइहि कालाउ आदमहेङ माको, कालाउ एसापा हब्बा परमेस्वरको आग्याहेङ माकेम्हि। 15कालाउ जेलाउ थेकापा इम्बालाइ ख्रिस्टता खाङधुरि पातेङ हिहे पानु, आरुहेङ बुङ प्रेम पावा, कालाउ सुद्द कालाउ मोनोइ तरिकासो ब्याभार पाहे पानु परमेस्वर बेबालाइहेङ जामालको जोलोम पिकासो बान्चि पावा।
Currently Selected:
1तिमोथि 2: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
