1 कोरिन्थि 4
4
येसुको काम पालि छाल्न्हाका यात्यागेलाइ
1एसापा द्याङगेलाइ केलाइहेङ ख्रिस्टको बान्धाइति कालाउ परमेस्वरको म्होन्हाका जातिङको काथाको बाख्या पाका काम पिका हि। 2सेवक चाहि वाको ग्रिहिको पिका काम प्रति खाङधुरि योग्य हिलि गोइखे। 3कासेहेङ नेलाइ माकुनु आरु हासु बुङ नाअ् खाङधुरि योग्य मान्थुन्हा दोअ्हे पानु कासेहेङ हिदोइ बुङ चिन्ता मान्थु। का खाङधुरि योग्य हिघा याते मान्थुघा का ताइमिङ दोअ्लि माद्वाङका। 4काङको ताइकोङ बिचारता हाइ दोङ गल्ति पाका हिघा दोअ्का कासेहेङ थाहा मान्थु, कालाउ याको माने या माज्याङ कि, का निरदुसि हिघा। हाइपालिपानु काङको न्याय ते प्रभु खिनिङ हि। 5ओदोङ भाअ्सिङ प्रभु लोलि खान्तेङ लाम्फा हासुको बुङ न्याय मापा, वा दोङ गोताङ द्याङगेलाइको बिचारता हिका काथागेलाइ दोअ्प्यावा कालाउ इम्बालाइको ह्रदयता हिका उदेस्यगेलाइ देखाल पापियावा। कालाउ इङको बेला गोताङ द्याङगेलाइ परमेस्वरसो निङलि गोइका बाखिन निनावा।
6खान्धुराइ ओनेगेलाइ, का ताइको कालाउ आपुल्लोसको उधाहरन पितेङ नेलाइको भालाइको भाअ्सिङ इदोइ गोताङ काथा लेखेका हिघा, कालाउकि नेलाइ केलाइसो धिरसु कालाउ धर्मसास्तरता लेखेका काथा खान्तेङ बाहार मान्हेसु। कालाउ एमि भारि लागितेङ भेनेङहेङ हेला मापासु। 7हाइपालिपानु हासु बुङ नेलाइहेङ आरु खान्तेङ बार्का बानाइका मान्थु। हाइपालिपानु नेलाइ दोफा हिका गोताङ काथा परमेस्वर दोङ नेलाइहेङ पिका हि। जेसापा नाङको दोफा हिका गोताङ काथा परमेस्वरको हि पानु, नाङको दोफा घमन्ड पाका कारन मान्थु।
8नेलाइहेङ लागिखे कि, नेलाइ दोफा आत्मिक रुपता गोइका गोताङ काथा हि। कालाउ नेलाइ बिचार पासुखेना कि, नेलाइ दोफाते पबित्तरो आत्माको बरदानगेलाइ हि। कालाउ नेलाइहेङ इसिका बुङ लागिखे कि, केलाइ माकोसिङ नेलाइ राजा भाइपा सासन पालि दोस्वाना। जेसापा नेलाइ जातिङको सासन पाकानु का खुसि जेङधाङघा, कालाउ केलाइ बुङ नेलाइ दोफाङ सासन पालि दोअ्धाङ। 9हाइपालिपानु कासेहेङ इसिका लागिखे, कि परमेस्वर केलाइ छाल्न्हाका चात्यागेलाइहेङ झाराङ खान्तेङ लेताको थामेता ताअ्का हि। कालाउ परमेस्वर दोङ केलाइहेङ स्वर्गदुतगेलाइ कालाउ सुमिङको द्याङगेलाइको आगाता ज्यान साजाइ निङका द्याङगेलाइ कोनिङ तामासा बानाइका हि। 10द्याङगेलाइ केलाइहेङ मुर्ख थानिखे, हाइपालिपानु केलाइ येसु ख्रिस्टको बिसोइता प्राचार पान्हाखे, कालाउ नेलाइ गोल्तिहोइ सोचिसुखेना कि नेलाइ हेन्जा बुद्दिमानि खान्धुराइ हिसुन्हा। कालाउ हेन्जा द्याङगेलाइ केलाइ दोफा हिदोइ बुङ खाबारा मान्थु दोअ्तेङ थानिखे। कालाउ नेलाइ घमन्डसोङ दोअ्सुखेना केलाइ दोफा परमेस्वरको सरबुङ हि। कालाउ द्याङगेलाइ केलाइको आदार मापाखे भरु नेलाइकोङ आदार पाखे। 11नानि थेकापा बुङ केलाइ म्हितुपाङ कालाउ चि आम्लि किपा हिनाहि, कालाउ पुर्ना थेअ्का लोखोन धाबा लागाइका हिन्हाहि, केलाइ दानाइ निङचाका हिन्हाहि कालाउ केलाइको हिदोइ बुङ साअ् मान्थु। 12बान्चिलिको भाअ्सिङ केलाइ ताइकोङ खुरसो मेहेनत पान्हाखे। द्याङगेलाइ केलाइहेङ साराप पिलाउ केलाइ इम्बालाइहेङ आसिरबाद पिन्हाखे। कालाउ द्याङगेलाइ केलाइहेङ साताइलाउ केलाइ सहिन्हाखे। 13केलाइको निन्दा पालाउ केलाइ प्रेमहोइ जोबाफ पिन्हाखे, कालाउ बुङ द्याङगेलाइ केलाइहेङ आदार मापाखे। इम्बालाइ दोअ्खे केलाइको हिदोइ बुङ दाम मान्थु।
14नेलाइहेङ लेदेरपालिको भाअ्सिङ का या काथा लेखेका माको, कालाउ नेलाइहेङ आर्ति पिलि खाङखा, हाइपालिपानु नेलाइ काङको मायारु जामाललाइ कोनिङ हिसुन्हा। 15हाइपालिपानु ख्रिस्टता नेलाइहेङ धिरपाका ते-हाजार सिक्स्यकगेलाइ हिलाउ बुङ, का खिनिङ नेलाइको आबा भाइपा हिघा। हाइपालिपानु सुसमाचार हिङपातेङ नेलाइहेङ येसु ख्रिस्टता खाङधुरि पापाका का दोङ हिघा। 16ओदोङ भाअ्सिङ नेलाइ बुङ का भाइपाङ जेङसु दोअ्तेङ का बिन्ति पाखा। 17ओदोङ भाअ्सिङ का तिमोथिहेङ नेलाइकोता दिङगिल्दोङखा। प्रभुता वा काङको मायारु कालाउ खाङधुरि योग्य चान भाइका हि। का गोताङ थामेगेलाइको मन्डलिता धिरपाका आन्सार येसु ख्रिस्टता काङको जिबन हिसिका हि तिमोथि नेलाइहेङ दोअ्तावा।
18नेलाइ मध्ये हेमि घमन्ड पातेङ हि, हाइपालिपानु इम्बालाइ सोचिखे कि, का आरोङ नेलाइकोता माल्वाङका। 19कालाउ जेसापा या प्रभुको इच्छा जेङनु नेलाइकोता मार्फाङ ल्वाङका, कालाउ का उङको घमन्डि द्याङगेलाइको सिक्स्या खिनिङ माको, भरु इम्बालाइको सरबुङ चाहि हाइ कुनु इङको पट्टा पाङका। 20हाइपालिपानु परमेस्वरको सासन काथाता खिनिङ माको, भरु परमेस्वरको सरबुङ पाहासो जियाइलि हि। 21का नेलाइकोता लोलाउ नेलाइ काङकोसो हाइ चाहिसुखेना? जेसापा नेलाइ एलाउ बुङ खाराब कामगेलाइ लाअ्का मान्थु सुन्हा पानु, का नेलाइहेङ मारेम्फाङ हाकाराइयाङका। कालाउ जेसापा मारेम्का कामगेलाइ लाअ्का हिसुन्हा पानु, का सुकापा प्रेमहोइ ब्यभार पाङका।
Currently Selected:
1 कोरिन्थि 4: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
