1 कोरिन्थि 5
5
कासिबिरिको बारेता
1नेलाइको मन्डलिको माझाता कासिबिरि पाका हि दोअ्का काथा का आधिमि द्याङगेलाइसो हिङका हिघा, इसिका कासिबिरि ते परमेस्वरहेङ मानाल्कालाइको माझाता बुङ माजेङखे। नेलाइ मध्ये एमि ताइकोङ आमाइको जिम्धाहेङ ताअ्का हि दोअ्का काथा हिङका हिघा। 2नेलाइ चाहि इसिका काथाता दुखि जेङलि गोइका हिघाहि, कालाउ इसिका काम पाका द्याङहेङ ताइको मन्डलिसो ओल्लेपालि गोइधाङ, कालाउ नेलाइते घमन्ड कि पासुखेना। 3का नेलाइसो दुरे जेङलाउ बुङ काङको मन नेलाइ दोफाङ हि। का इन्ता मान्थुलाउ बुङ का इन्ता हिका भाइपा दोङ इन्सिका काम पाका द्याङको न्याय का पादोङखा। 4नेलाइ इसिका पालि गोइखे, कि जेलाउ नाअ् खान्धुराइगेलाइ नेलाइ दोफा प्रभु येसु ख्रिस्टको खाबारा हि दोअ्का काथा बुझितेङ ए दोफाङ जोम्सुखेना, का बुङ प्रभु येसुको सरबुङ दोफा ताइको मनता नेलाइ दोफाङ ह्याङका। 5उङको द्याङहेङ साइतानको आधिनता लाअ्पिसु, कालाउकि वाको पापि स्वभाव नासाताको, कालाउ वाको आत्मा चाहि प्रभु न्याय पाका दिनाता बान्चिपालि द्वाको।
6नेलाइ घमन्ड पालि लाअ्सु, हाइपालिपानु नेलाइहेङ थाहा दोङ हि, कि आतुइसा साउरिहोइ गोताङ धिकाउरिहेङ साउरि बानाइखे। इन्साङ पातेङ एमि द्याङहेङ पाप पालि पितेङ हिनु, धेमाङ आरुगेलाइ बुङ इन्साङ पालि पिताइयावा। 7जेसाङ यहुदिगेलाइ निस्तार पार्बा मानाइलि लाम्फा ताइको साअ्सो गोताङ साउरि ओल्लेपाखे, एन्साङ पातेङ दोङ नेलाइ बुङ इन्सिका पाप पाका द्याङहेङ ताइको मन्डलिसो ओल्लेपालि गोइखे। कालाउ नेलाइ साउरि माह्वाका सेले भाइका जेङस्वाना। हाइपालिपानु येसु ख्रिस्ट केलाइहेङ पापसो लाअ्पालि सिहि, जेसाङ निस्तार पार्बाको बेलाता यहुदिगेलाइ पान्ठा भोग पिखे। 8ओदोङ भाअ्सिङ केलाइ पुर्ना साउरि माकुनु मारेम्का स्वभाव कालाउ दुस्टताको साउरिहोइ माको, भरु पबित्तरोता कालाउ सत्येताको आखिमिरि सेलेहोइ निस्तारको पार्बा मानाइने।
9काङको लाम्फाको पात्ताराता नेलाइहेङ कासिबिरिको सङगतता माहिसु दोअ्तेङ लेखेका हिघा। 10याको माने, इदोइ सुमिङको कासिबिरिगेलाइ, चिचाहागेलाइ, धाताइकालाइ, मुर्ति पुजा पाकालाइ दोफा हेलाउ बुङ सङगत मापासु दोअ्का माको, माकुनुते नेलाइ सुमिङसोङ बाहार हानिलि गोइधास्वाना। 11कालाउ इन्सिकाको सङगत मापासु दोअ्तेङ का नेलाइहेङ लेखेघा, जाइ ताइमिहेङ खाङधुरि ओने दोअ्खे, कालाउ बास्ताबता उङको कासिबिरि, दिका, मुर्ति पुजा पाका, मन्दा माताका, गोरा म्हाका कालाउ धातुवा हि। इन्सिका द्याङगेलाइ दोफाते चालि बुङ मायोम्सु।
12हाइपालिपानु खाङधुरि मापाका द्याङगेलाइको न्याय पाका काम काङको माको। कालाउ नेलाइ ताइको मन्डलिता हिकालाइहेङ सुधिर पालि गोइखे। 13खाङधुरि मापाका द्याङगेलाइको न्याय परमेस्वर दोङ पाखे। धर्मसास्तरता इसिका दोअ्का हि,
“दुस्ट द्याङगेलाइहेङ ताइको जेरसो ओल्लेपासु।”
Currently Selected:
1 कोरिन्थि 5: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
