1 कोरिन्थि 3
3
मन्डलि खेङन्हाका
1खान्धुराइ ओनेगेलाइ, का नेलाइ दोफा पबित्तरो आत्मा हिकालाइ भाइपा नुइ धुइलि मादोघा, भरु सुमिङको द्याङगेलाइ दोफा भाइपाङ धुइघा, कालाउ येसु ख्रिस्टको खाङधुरिता म्हुइका जामाललाइ भाइपा नेलाइ दोफा नुइ धुइलि गोइहि। 2लाम्फा का नेलाइहेङ परमेस्वरको बचन साधारन तरिकाहोइ धिरपाका हिघाखा, जेसाङ हासु बुङ म्हुइका जामालहेङ दुधे आम्पाखे। कालाउ का परमेस्वरको बचन लिता सोङ धिरपाका मान्थुघाखा, जेदोङ चाहि जाराउका उम भाइका हि, हाइपालिपानु नेलाइ इङको को भाअ्सिङ तियार जेङका मान्थु घासुखेना, कालाउ एला बुङ तियार मान्थु सुन्हा। 3हाइपालिपानु नेलाइ एलाङ बुङ सुमिङको द्याङगेलाइ भाइपा जिबन जियाइसुखेना। कालाउ नेलाइको माझाता डाहा कालाउ चेरसुका हिदोङ हि, इङकोहोइ तिङपाखे कि नेलाइ आझाइ बुङ सुमिङको द्याङगेलाइ भाइपा जियाइका हिसुन्हा। हाइ एन्सानु नेलाइ परमेस्वरहेङ खाङधुरि मापाका द्याङगेलाइ भाइपा बान्चितेङ हिसुन्हा? 4हाइपालिपानु हासु बुङ का “पावलको सिक्स्याहेङ पिताइखा” कालाउ भेनेङ दोअ्खे, “का आपुल्लोसको सिक्स्याहेङ पिताइखा” दोअ्न्हाखे पानु, हाइ नेलाइ सुमिङको द्याङगेलाइ भाइपा माभाइसुन्हा रो?
5आपुल्लोस हासु रो? कालाउ का पावल हासु रो? किधिन्हेमिते परमेस्वरको सेवक खिनिङ हिनाहि, जाइ नेलाइहेङ येसु ख्रिस्टको खाङधुरिता चुमाहि। केलाइ झाराङ ते परमेस्वर केलाइहेङ खाटाइका काम खिनिङ पान्हाखे। 6का दोङ नेलाइहेङ लाम्फा सुसमाचार प्राचार पाघा, कालाउ न्हुसो आपुल्लोस ओदोङ काम जारि तातेङ नेलाइहेङ खाङधुरिता बल्लियाका जेङलि साघाइहि, कालाउ परमेस्वर दोङ नेलाइहेङ आत्माता बारालि साघाइहि। 7ओदोङ भाअ्सिङ सुसमाचार प्राचार पाका द्याङ कालाउ खाङधुरिता बल्लियाका बानाइलि साघाइका बार्का माको, भरु परमेस्वर खिनिङ बार्का हि, जाइ नेलाइहेङ आत्माता बारालि साघाइखे। 8का नेलाइहेङ सुसमाचार प्राचार पाघा कालाउ आपोल्लोस ओदोङ काम जारि ताअ्हि, ओदोङ भाअ्सिङ केलाइ ए-सामान हिन्हाहि। परमेस्वर झाराङहेङ ता-ताइको मेहेनत आन्सार इनाम प्यावा। 9हाइपालिपानु केलाइ झाराङ काम पाका परमेस्वरको खेतालागेलाइ हिन्हाहि, कालाउ नाअ् कोरिन्थ सहरको खान्धुराइगेलाइ चाहि परमेस्वरको मिलिङ भाइका हिसुन्हा, कालाउ का नेलाइको तुलाना इङको साअ् दोफा पालि द्वाङका जेदोङ साअ् परमेस्वर धाम्लि तोम्का हि।
10परमेस्वर पिका बरदान आन्सार साअ् धाम्का सिपालु मिस्तिरि भाइपाङ का साअ्को जग योम्पाघा, कालाउ बोगेलाइ चाहि इङको ह्रुता साअ् धाम्काताङ हानिखे। इङको ह्रुता साअ् धाम्का गोताङ द्याङ हेसा धाम्लि गोइका हि दोअ्तेङ रेम्फा बिचार पाको। 11जेदोङ जग योम्पालि दोका हि उङको येसु ख्रिस्ट हि, इङको बाहेक हिदोइ बुङ द्याङ भेनेङ जग योम्पालि मादोखे। 12जेसापा हासु बुङ परमेस्वर पिका ठिक सिक्स्या धिरपाखे पानु, इम्बालाइ जाङका आमेनेगेलाइ सोना, चान्दि, जाङका उन्ठुइगेलाइहोइ साअ् धाम्का भाइका दोङ हि। कालाउ जेसापा इम्बालाइ धाताइका सिक्स्या धिरपाखे पानु, इम्बालाइ सोस्ट आमेनेगेलाइ फाला, घासि, नारा मिलिपातेङ साअ् धाम्का भाइका दोङ हि। 13गोताङ द्याङको रेम्का मारेम्का काम परमेस्वर न्याय पाका दिनाता जाचिन्हाङ, हाइपालिपानु इङको दिना इम्बालाइको पाका काम हिसिका हि, मेता ह्वातेङ जाचियाङ। 14जेसापा जग योम्पाका द्याङको काम मेता माओहे पानु वा इनाम निनावा। 15जेसापा हिदोइ बुङ द्याङको काम परमेस्वर रेम्का मान्थु दोअ्नु, वा हाइ दोङ बुङ इनाम मानिनाङ, कालाउ वा ताइको आनान्त जिबन मागुमाइपाङ जेदोङ परमेस्वर वासेहेङ पिका हि।
16नेलाइहेङ थाहा दोङ हि, नेलाइ परमेस्वरको मुन्दिर हिसुना, कालाउ पबित्तरो आत्मा नेलाइता बासा हिखे। 17जेसापा हासु बुङ परमेस्वरको द्याङगेलाइको एक्ताहेङ नासा पाखे, वासेहेङ परमेस्वर साजाइ प्याङ। हाइपालिपानु परमेस्वरको मुन्दिर पबित्तरो हिखे, कालाउ इङको मुन्दिर चाहि नेलाइ दोङ हिसुन्हा।
18हासु बुङ ताइमिहेङ धोका माप्याको, नेलाइ मध्येसो हासुलाउ बुङ इदोइ सुमिङता ताइमिहेङ बुद्दिमानि सम्झिखे पानु, उङको हाइ दोङ मागिका जेनाको, कालाउकि वा परमेस्वरको आगाता जातिङकोङ बुद्दिमानि जेङलि द्वाको। 19हाइपालिपानु सुमिङको बुद्दि परमेस्वरको आगाता आनाइ दोङ हि, हाइपालिपानु धर्मसास्तरता लेखेका हि,
“परमेस्वर बुद्दिमानि द्याङगेलाइहेङ
ओबालाइकोङ ताइको चालाखता फसेपावा।”
20भेनेङ थामेता धर्मसास्तरता इसिका बुङ लेखेका हि,
“बुद्दिमानि द्याङको बिचार बेकामको जेङखे दोअ्का प्रभु गिखे।”
21ओदोङ भाअ्सिङ हासु बुङ खास आगुवा द्याङहेङ पिताइयाङका दोअ्तेङ घमन्ड मापाको। हाइ पानु परमेस्वर गोताङ आनेमाने नेलाइको भालाइको भाअ्सिङ पिका हि। 22चाहे पावल, आपुल्लोस, पतरुस#3:22 पतरुस केफास, इदोइ सुमिङको आमेनेगेलाइ, जिबन माकुनु सिका, बर्तमान, भबिस्यता, या गोताङ काथा परमेस्वर नेलाइको भालाइको भाअ्सिङ दोङ पिका हि। 23कालाउ नेलाइ येसु ख्रिस्टको आधिनता हिसुन्हा, कालाउ येसु ख्रिस्ट चाहि परमेस्वरको आधिनता हि।
Currently Selected:
1 कोरिन्थि 3: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
