Zefanya Uram 3

Yerusalem atei nang aryi yu dinyi ukuramnyi ati wenen uram ebmou deyok.

3:1-8

1Er Iya Erebdobnyi biryi ato ebmou, “Sun Yerusalem atei nang ara Er Imtamnyi uram asi tatan atei nang kunung. Tonda, Er Imtamnyi urasintam aryi bai donokmanto dinyi kununung. Tonda, ninyi sun yuk nang asi mambul dinyi akwe takurdeindarur atei nang e. Ato kundarur deyok aryi Er Iya Erebdobnyi biryi sunsi wenebkwansir. 2Akatei nang ara yuk nang aryi sunti eteren uram ena ara diboka kum kekenung. Ba, yuk nang aryi sunti wenen uram erkarenmangnyi ura, sunci, ‘Ara, nunti telebto kubdobting tenen enmasing,’ kum tenenung. Ba, Er Iya Erebdobnyi bisi ara diboka diba kum tenenung atei nang kunung. Ba, sun Israel nang Molonungnyi Imtamnyi bisi, ‘Nun Nai,’ eboka ton kirona kum atei nang kunung. 3Ba, akatei kalingnaming sien nang ara yu weik nang kunungci, bai kam singa kamubde burande ato nang kunung. Ba, malyi deyok lilin nang ara malyi deyok diboka kum lirirdeirinung. Eda, sunbabyi iya malyi kun dinyi kunuraming. A nang ara bai kam ato kuraming. Bai kam aryi lukunda yina obdobci ura, ambutum dinyi ton tangdongona kum uca, nirya yirongnande ato nang kunung. 4Ba, sun kankan aryi kuboka nabi nang ara Er Imtamnyi uram ermurun nang diboka kum kunung. Eda, sunda tatan uram eramingiryi, tola uram akwe doboka ermururaming. Ba, sun Er Imtamnyi biti ninyi dama deirin nang ara Er Imtamnyi wa diboka kum inung. Eda, sunci iya teleb dinyi Imtamnyi biti dama deirin dinyi asi beterminingnung. Ba, sunci ‘Ato kubdarur-ato kuna mem,’ en uram asi dangubminikoka malyito kuboka eterenung. 5Ato kursininung bok, Er Iya Erebdobnyi bira Yerusalem atei dam asi tuba kurur. Erda malyi dinyi ara iya ton kum kururnyi kurur, eda iya teleb dinyi akwe kunururnyi kurur. Erci berentam tuba-tuba teleb dinyi karesurur. Ara, ‘Ato kubdarur-ato kuna mem,’ en uram karesurur. Ani, Erci kiting ururukna talak ababyi ton tangdongona kum kusurur. Ato kusurur bok, sun yu kanya akwe bonung nang ara, ‘Nai e, nun ilil,’ ton tenerdena kum uca, yu dinyi akwe ukunung.” 6Er Imtamnyi biryi ato ebmou, “Niryi ninyi yala yuk-yuk kum danabdeibse. Ba, sun atei mikib atei ababyi nirya kum danabdeibse. Sun yiban bisik ara nirya sekoka libsinibse ba, ninyi yibana ton kum kunung. Sun doamnyi atei nirya ara dakoka kum daneibse ura, akatei kuramnyi nang ara nirya oboka kum daneibse deyok aryi akatei ara ninyi singsing kum dansekwe. 7Ura, Ni kanya tenebse ara, ‘Ura, Yerusalem atei nang ara sirya bikmangci, Nisi ilil tenebkwaning. Ba, Niryi erdeirin uram ara diboka dibnilibkwaming. Tonda, Niryi sunsi weneboka ukuanyi dinyi asi sun kanya teneibdeboka bikwaming,’ tenebse. Uca, sunci ato kuna kum kunung, eda yu lulub akwe kunung. 8A deyok aryi Niryi sun malyi kuramunyi dinyi nirya lilibdeibkwansin uki berekwande tum ati dibde buknindarur. Niryi sengkweten uram ton doboka sirya deibse, ‘A uki tum aryi Niryi im dangna nang tukwe dangna nang nirya bulubdeibkwan. A talak aryi Niryi Ni yu dinyi karebniryi, sun weik sien nang talen mutuk yuk-yuk nirya asi wenebkwan. Ni ninyi taruk ati yu ara uk buk angnande to kunurur dinyi aryi, im dangna mutuk nang tukwe dangna mutuk nang nirya asi uk yaliboka yirande to kubkabokwan,’ ato eboka dobdeibse,” eboka Er Iya Erebdobnyi biryi ebmou.

“Lemna dinyi karebkwan,” ebmou uram deyok

3:9-20

9Ura, Er Iya Erebdobnyi biryi sun Yerusalem atei nang ati ton ato ebmou, “Sirya wenebmanyi ura, Niryi sun yuk mutuk nang asi kanya teleb dinyi karebkwan. Ara, lek kanya karebkwan ba, sunda malyi uram tuba taba kum sisikwaming. Eda, sun nirya ara kwemdeina molon dinyi takloboka Ni si asi naboka si weik eboka molobkwaning. 10Ara, Etiopia mutuk me kouboka otam era mutuk kuramingnyi nang aryi yandoka Nisi si weik eboka molobkwaning. Ba, sun Ni si weik eramingnyi nang ara dantam mutuk-dantam mutuk bokwalwalabdandoka kuramingnyi nang nirya aryi yandoka sun dama boboka Niti uk daryankwaning. 11Ato kubkwaming uki tum ara sun Yerusalem atei nang kankan aryi Ni urasintam aryi teleb kun nang ara alyi kum dobkwandum. Bok, sun kankan dam aryi Ni uram asi lebesengnanumunyi nang ara Niryi yakdonokoka kum daneibkwan. A nang ara wingdan kanya bon nang asi Niryi sun kankan dam aryi yakdonokwan. Uca, Niryi wibdeibse mutuk kon teleb mutuk kon Sion dub ai aryi kanya dub erebdandoka wingdaraming nang ara tubto kum kubkwaming. 12Ba, sun kankan dam aryi Nira Iya Erebdobnyi biryi takdongobnyi ba, a mutuk dam kubkwaming nang ara luknubdob kanya ab, namin kanya bon nang ab asi kubkwaming. Ara, sun a kubkwaming nang ara Ni si ingkirikoka lebdandobkwaming nang akwe kubkwaming. 13Sun ordana nang aryi iyandoka Israel nang ilinto obingiryok, ninyi ton nang ara takdongobkwaming. A takdongoamingnyi nang ara ato kubkwaming. Sunda yu dinyi ton kum kunubkwaming. Ani, tola en uram ara ton kum ebkwaming. Sun silalum dam ara tola en uram ara ton kum anabkwande. Yo, sun kubkwaming to ara mangkau akwe kubkwaming. Bisam domba sungsunga kankan mol kwabdeibmangnyi ai asi yu kam aryi dumderyangana kum uca, ur mangkau sungsunga yiboka mabde kurande to kubkwaming,” Er Iya Erebdobnyi biryi ato ebmou. 14We, mutuk Sion dub ai kubdob nang a. Sun kanya kilkil asa aryi mot sebdobdarur. We, Israel mutuk nerabwe. Sun kanya karyi asa aryi mot sebdobdarur. We, Yerusalem atei nang a. Sun kanya nirya ara kilkil kubsurur. 15Ara, sun mambul dorandum dinyi ara Er Iya Erebdobnyi biryi dobkabokmasir ati, sun kanya teleb kuboka mot sebdarur. Ani, Erci sun mar ordana atei nang nirya ara sirya yakdonokmar. Ura, Israel nang sun Weik Sienyi Er Iya Erebdobnyi bira sun kankan dam kubmar. A deyok aryi mambul dinyi sun dam tubto tamuboka ton kum kunubkwansir ati, sun kanya ilil kusina mem.

16Ato kubkwande uki tum ara yuk nang aryi Yerusalem atei nang asi ato ebkwaming. “We, mutuk Sion dub atei nang a. Sun kanya ilil kusina mem. Sun taruk koulkoulya dangsina mem. 17Er Iya Erebdobnyi, sun Nai sun Molondarurnyi bira sun kankan dam kurur. Erda mikib weiknyi kuboka sun mar bormilisinanyi kibmarci, sunti sun mar ordana nang asi muna obdongobmar. Sunda Ersi milirandum deyok aryi Er kanya teleb kubmar. Erci boukwe kibmasirci sunsi ukuryok teleb kuron dinyi karebmasir. Sunda Ersi milirandum deyok aryi Er Imtamnyi biryi kanya kilkil kuboka mot semdur. 18Er Iya Erebdobnyi bira sunti mot sebmilibmasir ara weik kwalina kwalibmangnyi tum aryi kilkil asa aryi mot semnaming to kuboka mot sebmilibmasir,” ebkwaming. Ura, Er Imtamnyi biryi ato ebmou, “Niryi mambul don dinyi sun dam kusurur dinyi ara dobkabokwan. Ba, mambul dinyi aryi sunsi tubto tamuboka kum obminikwansir. 19Eda, diba ati, a uki berekwande tum aryi Niryi mikib doboka mambul dinyi boramunyi dinyi nirya dobkabokwan. Ba, sun kankan dam asi yan lirlising eryibaramingnyi nang ara Niryi lebdeibkwan. Ba, sun bokwalwalabdandoka yuk-yuk da kuramingnyi nang ara neik ai bulubdeibkwan. Ba, sun alyi ati urasin kanubdongoboka kuramingnyi nang ara urasin erebdeibkwan. Ukubsinyi ba, sun im dangna tukwe dangna nang nirya aryi sun si weik eboka kisal dakwansing. 20A uki berekwande tum aryi Niryi sun bokwalwalabdandoka kundarur nang nirya bulubdeibsiniryi, Yerusalem atei tamuboka bobinkwansin. Ara, ato deyok aryi Niryi sunsi sun minob kuamunyi atei tamuboka bobinkwansin: Sunda minob mangkau akwe kurandau to, Niryi sunsi tamuboka mangkau dinyi akwe karebkwansin. Ukubsinyi ba, sun im dangna tukwe dang nang aryi asing eibmangnyi ba, sunci, ‘Nai e,’ tenebingiryi, sunsi kisal dakwansing. A deyok ati, Niryi sunsi Yerusalem atei tamuboka bobinkwansin,” eboka Er Iya Erebdobnyi biryi ato ebmou.

Currently Selected:

Zefanya Uram 3: MTG

Highlight

Copy

Compare